សមាគមនាវាយុវជនអាស៊ីអាគ្នេយ៍កម្ពុជានឹងរៀបចំ «យុទ្ធនាការលើកទី៣ ដើម្បីគាំពារសុខភាពផ្លូវចិត្តសម្រាប់ជនភៀសសឹក ដែលរងគ្រោះដោយសារការឈ្លានពានពីយោធាថៃ» នៅតាមបណ្ដាខេត្តជាប់ព្រំដែន។
សមាគមននឹងបង្វែរទិសដៅទៅខេត្តបន្ទាយមានជ័យ ជាខេត្តជាប់ព្រំដែនប្រទេសថៃដែលមានចំនួនជនភៀសសឹកច្រើនជាងគេបង្អស់ គឺជាង៥ម៉ឺនគ្រួសារ ស្មើនឹងជាង១៧ម៉ឺននាក់។ យុទ្ធនាការលើកទី១ និងទី២ ត្រូវបានធ្វើឡើងនៅខេត្តព្រះវិហារ។
លោកស្រី អ៊ឹម រចនា ប្រធានសមាគមនាវាយុវជនអាស៊ីអាគ្នេយ៍កម្ពុជា បានគូសបញ្ជាក់ថា ការឈ្លានពានដោយកម្រោលនិងឥតរើសមុខពីសំណាក់យោធាថៃ នៅតាមខេត្តជាប់បណ្ដោយព្រំដែនកម្ពុជា-ថៃ បានបង្ខំឲ្យប្រជាជនច្រើនជាងកន្លះលាននាក់ ចាកចេញពីលំនៅស្ថានរបស់ខ្លួនមករស់នៅទីតាំងមានសុវត្ថិភាព ក្រោមជំនួយរបស់អាជ្ញាធរមានសមត្ថកិច្ច។
ក្រៅពីតម្រូវការជំនួយជាស្បៀង និងសម្ភារៈបរិក្ខា បម្រើដល់ការរស់នៅប្រចាំថ្ងៃ បងប្អូនជនភៀសសឹកទាំងអស់ ជាពិសេសស្ដ្រី និងកុមារ ទទួលរងនូវការប៉ះពាល់ផ្លូវចិត្ត បន្ទាប់ពីត្រូវជម្លៀសចេញពីផ្ទះសម្បែង និងមួយចំនួនត្រូវព្រាត់ប្រាស ឬបាត់បង់គ្រួសារជាដើម។លោកស្រីថា តាមរយៈយុទ្ធនាការនេះ សមាគមនឹងចុះជួយភៀសសឹក ដោយរៀបចំសកម្មភាពមួយចំនួនដូចជា ផ្តល់វិធីសាស្ត្រអប់រំផ្លូវចិត្ត លើកកម្ពស់សុខភាពផ្លូវចិត្តក្នុងព្រឹត្តិការណ៍សង្រ្គាម ផ្តល់ការឧបត្ថម្ភសម្ភារៈផ្សេងៗ និង រៀបចំកម្មវិធីលេងកម្សាន្តដល់កុមារមកពីតំបន់រងគ្រោះ។
សមាគមនាវាយុវជនអាស៊ីអាគ្នេយ៍កម្ពុជា អំពាវនាវដល់អតីតប្រតិភូគ្រប់ជំនាន់ និងសាធារណជនទូទៅ សូមចូលរួមយុទ្ធនាការគាំពារសុខភាពផ្លូវចិត្តជនភៀសសឹក តាមរយៈការបរិច្ចាគថវិកា ឬសម្ភារៈ និងចូលរួមដោយផ្ទាល់ ដើម្បីផ្តល់ការគាំទ្រ ផ្ដល់កម្លាំងចិត្ត និងសេចក្ដីស្រឡាញ់ ដល់បងប្អូនជនភៀសសឹក ដែលកំពុងទទួលរងផលប៉ះពាល់សុខភាពផ្លូវចិត្ត។
អ្នកមានចិត្តបរិច្ចាគអាចទាក់ទងតាមរយៈលេខទូរសព្ទ 093 719 013៕