អាជីវករលក់ទំនិញនៅផ្សារមួយក្នុងខេត្តបន្ទាយមានជ័យ។ សហការី
កម្ចីដែលមានការធានាពីសាជីវកម្មធានាឥណទានកម្ពុជា (CGCC) គិតត្រឹមដំណាច់ខែធ្នូ ឆ្នាំ២០២៥ មានជាង ៩ ពាន់គណនី(GAC) ស្មើនឹងទឹកប្រាក់កម្ចី(GLN) ប្រមាណ ៥២១,២៨ លានដុល្លារអាមេរិក។ កម្ចីទាំងនេះកំពុងចូលរួមចំណែកយ៉ាងសកម្មក្នុងការធានានិរន្តរភាពដំណើរការអាជីវកម្មរបស់សហគ្រាសធុនតូច និងមធ្យម(SMEs)នៅកម្ពុជា។
រាជរដ្ឋាភិបាលកម្ពុជាចាត់ទុកសហគ្រាសធុនតូច និងមធ្យម(SMEs) ថាកំពុងដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គមកម្ពុជា។ ការណ៍នេះជំរុញឱ្យរាជរដ្ឋាភិបាលដាក់ចេញនូវគោលនយោបាយជាច្រើនដើម្បីគាំទ្រផ្នែកហិរញ្ញវត្ថុដល់ SMEs តាមរយៈធនាគារសហគ្រាសធុនតូច និងមធ្យម(SME Bank) ធនាគារអភិវឌ្ឍន៍ជនបទ និងកសិកម្ម (ARDB) និងសាជីវកម្មធានាឥណទានកម្ពុជា។
ព្រឹត្តិបត្ររបស់ CGCC ឱ្យដឹងថា គិតត្រឹមដំណាច់ឆ្នាំ២០២៥ សាជីវកម្មធានាឥណទានកម្ពុជាបានផ្តល់ការធានាលើកម្ចីអាជីវកម្មដល់សហគ្រាសខ្នាតតូច និងមធ្យម(SMEs) ចំនួន ៩ ៥៥៦ កម្ចី ស្មើនឹងទំហំទឹកប្រាក់ឥណទាន ៥២១,២៨ លានដុល្លារ។ កម្ចីនេះបានផ្តល់លទ្ធភាពដល់សហគ្រាសឱ្យមានទុនបន្តនិរន្តរភាព និងពង្រីកអាជីវកម្មរបស់ខ្លួនឡើងវិញ បន្ទាប់ទទួលរងផលប៉ះពាល់ដោយសារការធ្លាក់ចុះសកម្មភាពសេដ្ឋកិច្ចសកល។
សាជីវកម្មធានាឥណទានកម្ពុជា មានតួនាទីសំដៅលើយន្តការធានាឥណទាន និងការចែករំលែកហានិភ័យជាមួយស្ថាប័នផ្ដល់កម្ចីដោយអនុញ្ញាតឱ្យសហគ្រាសធុនតូច និងមធ្យម អាចទទួលបានហិរញ្ញប្បទានដើម្បីវិនិយោគលើគំនិតផ្តួចផ្តើមទាក់ទងនឹងការប្រែប្រួលអាកាសធាតុ និងកាត់បន្ថយការបញ្ចេញកាបូនក្នុងការគាំទ្រដល់កំណើនសេដ្ឋកិច្ចប្រកបដោយចីរភាពនៅកម្ពុជា។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា រដ្ឋាភិបាលបានចាត់ទុក SME គឺជាសសរស្តម្ភ និងចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ។
លោកថ្លែងថា៖«សហគ្រាសធុនតូច និងមធ្យម បានចូលរួមចំណែកក្នុងការអភិវឌ្ឍ និងធានាភាពធន់នៃសេដ្ឋកិច្ចរបស់កម្ពុជាយ៉ាងច្រើន។ បើយើងមិនមានការជំរុញការផលិតរបស់សហគ្រាសធុនតូច និងមធ្យម គឺយើងនឹងមានកង្វះខាតផលិតផលប្រើប្រាស់ក្នុងស្រុកជាច្រើន។ ដូច្នេះយើងត្រូវការបញ្ជាទិញទំនិញពីបរទេស ដែលនេះមានន័យថាយើងនាំរូបិយប័ណ្ណបរទេសចេញ អ៊ីចឹងយើងនឹងលេចជ្រៀបសេដ្ឋកិច្ចខ្លាំងណាស់»។
លោកលើកឡើងទៀតថា គោលនយោបាយជំរុញសហគ្រាសធុនតូច និងមធ្យម គឺពិតជាមានសារសំខាន់ទាំងរដ្ឋ និងផ្នែកឯកជន ដោយលោកយល់ឃើញថា រាជរដ្ឋាភិបាលបានរៀបចំគោលនយោបាយជំរុញសហគ្រាសធូនតូច និងមធ្យម ជាច្រើនរួចរាល់មកហើយ ហើយព្រមទាំងបានទម្លាក់ដើមទុនរាប់លានដុល្លារបន្ថែមទៀតតាមរយៈធនាគារសហគ្រាសធុនតូច និងមធ្យម រួមទាំងធនាគារអភិវឌ្ឍន៍ជនបទ និងកសិកម្ម។
លោកបញ្ជាក់ថា៖«សាជីវកម្មធានាឥណទានកម្ពុជា គឺជាស្ថាប័នដែលបានរួមចំណែកផ្តល់កម្ចីប្រមាណ ៥២១ លានដុល្លារដល់សហគ្រាសធុនតូច និងមធ្យមនៅកម្ពុជា ដែលកម្ចីទាំងនេះកំពុងចូលរួមចំណែកជំរុញសហគ្រាសធុនតូច និងមធ្យមនៅកម្ពុជាឱ្យមានវឌ្ឍនភាពកាន់តែប្រសើរ»។
បើតាមលោក វណ្ណៈ ប្រាក់កម្ចីនេះក៏អាចផ្តល់កាលានុវត្តភាពយ៉ាងច្រើនតាមរយៈការកំណើនប្រាក់ចំណូលពីផលិតកម្មក្នុងស្រុក និងការកាត់បន្ថយការនាំចូលទំនិញពីក្រៅប្រទេស។
លោកបានបញ្ជាក់ថា៖«ភាគច្រើននៃសហគ្រាសធុនតូច និងធម្យមនៅកម្ពុជា គឺផលិតទំនិញដើម្បីជំរុញការនាំចេញ ជាពិសេស ការកែច្នៃផលិតផលកសិកម្ម។ ទាំងនេះ គឺជាចំណុចរបត់ដ៏សំខាន់ក្នុងការកែច្នៃ ដោយយើងមិនត្រឹមតែលក់ក្នុងស្រុកប៉ុណ្ណោះទេ ប៉ុន្តែយើងក៏ជំរុញការលក់ទៅទីផ្សារអន្តរជាតិ និងភ្ញៀវទេសចរបរទេសផងដែរ។ នេះគឺជាចំណុចរួមផ្សំជាមួយនឹងការជំរុញវិស័យសហគ្រាសធុនតូច និងមធ្យម នៅកម្ពុជាឱ្យកាន់តែរីកចម្រើន»។
របាយការណ៍ប្រចាំឆ្នាំ២០២៤ របស់ធនាគារ SME Bank បានបង្ហាញថា គិតត្រឹមដំណាច់ឆ្នាំ២០២៤ ធនាគារ SME Bank បានផ្តល់កម្ចីតាមរយៈគម្រោងផ្តល់ឥណទានដោយផ្ទាល់បានចំនួន ៤៥៧ សហគ្រាស ស្មើនឹងទឹកប្រាក់សរុប ១២២,៤លានដុល្លារ កើនឡើង ៤២% បើធៀបនឹងឆ្នាំ២០២៣។ ក្នុងនោះផ្តល់កម្ចីដល់វិស័យអាទិភាព រួមមាន កម្មន្តសាល ការកែច្នៃ និងកសិ-ឧស្សាហកម្ម៕