ក្រុមការងារចម្រុះនៃមន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែង រួមទាំងមន្ទីរបរិស្ថានខេត្ត កងរាជអាវុធហត្ថ និងរដ្ឋបាលខេត្ត-ស្រុក បានធ្វើប្រតិបត្តិការកៀងចាប់សត្វទន្សោងចំនួន ៩ ក្បាលចេញពីតំបន់ហានិភ័យខ្ពស់ ហើយយកទៅព្រលែង នៅដែនជម្រកសត្វព្រៃសៀមប៉ាង ដោយសុវត្ថិភាព។
តាមសេចក្តីប្រកាសរបស់ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី ៥ ខែកុម្ភៈនេះ បានឱ្យដឹងថា ប្រតិបត្តិការកៀង និងព្រលែងសត្វទន្សោងចំនួន ៩ក្បាលនេះ ត្រូវបានឡើងកាលពីថ្ងៃទី២ ដល់ថ្ងៃទី៤ ខែកុម្ភៈ ដោយមានកិច្ចសហការពីអង្គការអភិរក្សសៀមប៉ាង និងក្រុមហ៊ុនរ៉ាយហ្សីងហ្វូនិក។
សេចក្តីប្រកាសដដែលនេះ បានបញ្ជាក់ថា៖ «សត្វទន្សោង គឺជាពូជគោព្រៃដ៏ស្រស់ស្អាតមួយ ហើយត្រូវបានគេចាត់ទុក ជាបុព្វបុរសរបស់ពូជគោស្រុកប្រចាំតំបន់អាស៊ីអាគ្នេយ៍ ហើយដោយមើលឃើញការគំរាមកំហែងពីការប្រមាញ់ដោយជនខិលខូច ក្រុមការងារនេះ ត្រូវបានបង្កើតឡើង ដើម្បីល្បាតការពារ និងរៀបចំប្រតិបត្តិការជម្លៀសចេញពីតំបន់ហានិភ័យទៅជម្រកសត្វព្រៃវិញ»។
តាមរយៈវីដេអូខ្លី នៃការកៀងចាប់សត្វទន្សោងចំនួន ៩ ក្បាល ចេញពីតំបន់ហានិភ័យខ្ពស់នេះ គឺក្រុមការងារចម្រុះនៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង រួមទាំងភាគីពាក់ព័ន្ធ បានប្រើតង់ហ៊ុមព័ន្ធកន្លែងរស់នៅរបស់សត្វទន្សោង ហើយយកឡានបើកដេញបំបោលសត្វទន្សោង ចេញពីទីតាំងមួយ ទៅកាន់ទីតាំងមួយទៀតទៅតាមការរៀបចំ រហូតចាប់បានពួកវា ដាក់ក្នុងឡាន ដើម្បីដឹកទៅព្រលែង នៅដែនជម្រកសត្វព្រៃសៀមប៉ាង ដោយសុវត្ថិភាព។
ក្រសួងកសិកម្ម បានបញ្ជាក់ថា នៅឆ្នាំ ២០២៥ កន្លងមកនេះ ក្រុមការងារបានអនុវត្តប្រតិបត្តិការកៀងចាប់ និងព្រលែងសត្វទន្សោងចំនួន ១៦ ក្បាល ដោយជោគជ័យ ហើយប្រតិបត្តិការឆ្នាំ២០២៦នេះ នឹងបន្តដល់ថ្ងៃទី៧ ខែកុម្ភៈ ដើម្បីកៀងចាប់សត្វទន្សោង នៅសេសសល់។
ក្រសួងបន្តថា ក្រសួងកសិកម្ម រុក្ខប្រមាញ់ និងនេសាទ ព្រមទាំងគ្រប់ស្ថាប័នពាក់ព័ន្ធ បានប្តេជ្ញាចិត្ត បន្តការការពារធនធានសត្វព្រៃ នៅកម្ពុជា ដូចជាសត្វទន្សោង ឱ្យមាននិរន្តរភាពសម្រាប់អ្នកជំនាន់ក្រោយ៕
