រដ្ឋាភិបាលអ៊ីស្រាអែលកាលពីថ្ងៃអាទិត្យបានអនុម័តផែនការដ៏ចម្រូងចម្រាសមួយដើម្បីធ្វើឲ្យវាកាន់តែងាយស្រួលសម្រាប់ជនជាតិអ៊ីស្រាអែលដែលតាំងលំនៅតំបន់ West Bank ក្នុងការទិញដីធ្លីនៅតំបន់នេះដែលពួកគេកាន់កាប់។ ការនេះធ្វើឲ្យអាជ្ញាធរប៉ាឡេស្ទីនខឹងសម្បា។
ក្រោមសេចក្តីសម្រេចនេះ អាជ្ញាធរអ៊ីស្រាអែលនឹងប្រកាសតំបន់ជាក់លាក់នានាដើម្បីធ្វើការចុះបញ្ជី ដែលតម្រូវឲ្យអ្នកណាដែលទាមទារដីធ្លីត្រូវបង្ហាញភាពជាម្ចាស់ ទោះបីជាភាពជាម្ចាស់នៃផ្នែកធំបំផុតនៃដីធ្លី West Bank មិនធ្លាប់ត្រូវបានចុះបញ្ជីជាផ្លូវការក៏ដោយ។
សេចក្តីសម្រេចរបស់គណៈរដ្ឋមន្ត្រីសន្តិសុខអ៊ីស្រាអែល បានអនុញ្ញាតឲ្យពលរដ្ឋអ៊ីស្រាអែលទិញដីធ្លី ហើយក៏បានប្តូរផ្នែកខ្លះនៃរដ្ឋបាលនៅក្នុងទឹកដីនេះពីការកាន់កាប់ដោយយោធាទៅឲ្យអាជ្ញាធរស៊ីវិលអ៊ីស្រាអែល។
អាជ្ញាធរប៉ាឡេស្ទីនបានច្រានចោលចំណាត់ការនេះ ដែលមិនធ្លាប់មាននៅតំបន់ West Bank ចាប់តាំងពីឆ្នាំ ១៩៦៧។ ការសម្រេចចិត្តរបស់អ៊ីស្រាអែលក៏បានបង្កឲ្យមានការរិះគន់ពីសហភាពអឺរ៉ុប និងរដ្ឋអារ៉ាប់មួយចំនួនផងដែរ។
ប្រទេសអាល្លឺម៉ង់បានថ្កោលទោសការអនុម័តរបស់គណៈរដ្ឋមន្ត្រីសន្តិសុខអ៊ីស្រាអែល ដោយអ្នកនាំពាក្យក្រសួងការបរទេសបានហៅវិធានការទាំងនេះថា «ជាជំហានមួយទៀតឆ្ពោះទៅរកការបញ្ចូលទឹកដីជាក់ស្តែង» ហើយបាននិយាយថាពួកគេបានរំលោភច្បាប់អន្តរជាតិ។
ពលរដ្ឋប៉ាឡេស្ទីនបានកាន់កាប់តំបន់នេះអស់ជាច្រើនទសវត្សរ៍ ហើយលក្ខខណ្ឌដើម្បីបញ្ជាក់ពីភាពជាម្ចាស់របស់ពួកគេគឺខ្ពស់ណាស់។ ប៉ុន្តែចំណាត់ការរបស់អ៊ីស្រាអែល អាចដកហូតសិទ្ធិរបស់ជនជាតិប៉ាឡេស្ទីនរាប់ពាន់នាក់ទៅលើដីធ្លីរបស់ពួកគេ។
ប្រធានាធិបតីប៉ាឡេស្ទីនបានថ្កោលទោសសេចក្តីសម្រេចនេះក្នុងសេចក្តីថ្លែងការណ៍មួយ ដោយហៅវាថាជា «ការកើនឡើងដ៏ធ្ងន់ធ្ងរ និងជាការរំលោភបំពានច្បាប់អន្តរជាតិយ៉ាងគឃ្លើន» ដែលស្មើនឹង «ការបញ្ចូលទឹកដីជាក់ស្តែង»។ ប៉ាឡេស្ទីនបានអំពាវនាវដល់សហគមន៍អន្តរជាតិ ជាពិសេសសហរដ្ឋអាមេរិក និងក្រុមប្រឹក្សាសន្តិសុខអង្គការសហប្រជាជាតិ ឲ្យអន្តរាគមន៍ជាបន្ទាន់។
ក្រុមហាម៉ាស់ក៏បានថ្កោលទោសការសម្រេចចុះបញ្ជីដីនៅតំបន់នេះ ជាដីរបស់រដ្ឋអ៊ីស្រាអអែលផងដែរ៕
