ជើងហោះហើរជាតិ និងអន្តរជាតិសរុបជាង ២៣ ពាន់ជើងបានធ្វើដំណើរចេញ-ចូល តាមរយៈអាកាសយានដ្ឋានអន្តរជាតិទាំង ៣ នៅកម្ពុជានារយៈពេល ៤ខែដើមឆ្នាំ២០២៦ ដោយកើនឡើងតិចតួចបើធៀបនឹងរយៈពេលដូចគ្នាកាលពីឆ្នាំ២០២៥ ខណៈចំនួនអ្នកដំណើរមានជាង ២ លាននាក់។
ទិន្នន័យរបស់រដ្ឋលេខាធិការអាកាសចរណ៍ស៊ីវិល បានបង្ហាញថា ចន្លោះពីខែមករា-មេសា ឆ្នាំ២០២៦ មានជើងហោះហើរចេញ-ចូល(ទ្វេទិស)ចំនួន ២៣ ២០៤ ជើងបានធ្វើចរាចរណ៍ឆ្លងកាត់អាកាសយានដ្ឋានអន្តរជាតិទាំង ៣ របស់កម្ពុជា(អាកាសយានដ្ឋានអន្តរជាតិតេជោ សៀមរាបអង្គរ និងខេត្តព្រះសីហនុ) ដែលចំនួននេះគឺកើនឡើងប្រមាណ ២% បើធៀបនឹងរយៈពេលដូចគ្នាកាលពីឆ្នាំ២០២៥។ ចំណែកអ្នកដំណើរចេញ-ចូល(ទ្វេទិស)មានចំនួន ២ ៤២៨ ០០៩ នាក់ ថយចុះប្រមាណ ៤%។ ដោយឡែកទំនិញតាមផ្លូវអាកាសចេញ-ចូល(ទ្វេទិស) មានចំនួន ៣០ ៤៤៨ តោន កើនឡើង ៣៦%។
អ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ឺន ចាន់សិរីវុត្ថា បាននិយាយថា សកម្មភាពជើងហោះហើរនៅកម្ពុជា នារយៈពេល ៤ ខែដើមឆ្នាំ២០២៦ គឺប្រហាក់ប្រហែលនឹងឆ្នាំ២០២៥ ដោយគិតត្រឹមថ្ងៃទី១៥ ខែឧសភានេះ គឺមានក្រុមហ៊ុនអាកាសជាតិ និងអន្តរជាតិចំនួន ៣៣ កំពុងមានប្រតិបត្តិការនៅកម្ពុជា ក្នុងនោះ ៤ ជាក្រុមហ៊ុនក្នុងស្រុក និង ២៩ ជាក្រុមហ៊ុនអាកាសចរណ៍អន្តរជាតិ។
បើតាមលោក ចាន់សិរីវុត្ថា ក្នុង ១សប្តាហ៍អាកាសយានដ្ឋានអន្តរជាតិតេជោ មានជើងហោះហើរជាមធ្យម ៧០៨ ជើង/សប្តាហ៍, អាកាសយានដ្ឋានអន្តរជាតិសៀមរាបអង្គរចំនួន ២២៤ ជើង/សប្តាហ៍, និងអាកាសយានដ្ឋានអន្តរជាតិខេត្តព្រះសីហនុ មានចំនួន ៥០ជើង/សប្តាហ៍។ ជាមួយគ្នានេះអាកាសយានដ្ឋានតារាសាគរ គឺមានជើងហោះហើរចំនួន ៤ ជើង/សប្តាហ៍(ទ្វេទិស) ជាជើងហោះហើរក្នុងស្រុករវាងអាកាសយានដ្ឋានអន្តរជាតិតេជោ និងអាកាសយានដ្ឋានតារាសាគរ។
ទាក់ទងនឹងសកម្មភាពហោះហើរ លោក សិរីវុត្ថា អះអាងថា ដោយសារសេដ្ឋកិច្ចពិភពលោកមានបញ្ហាមួយចំនួន មានធ្វើឱ្យជើងហោះហើរចេញ-ចូល របស់ក្រុមហ៊ុនអាកាសចរណ៍ឡាវ(Lao Airlines) មកកាន់អាកាសយានដ្ឋានអន្តរជាតិសៀមរាបអង្គរ ត្រូវបានផ្អាកជាបណ្តោះអាសន្ន ខណៈជើងហោះហើរចេញ-ចូលរវាងទីក្រុងបាងកក-ភ្នំពេញ-បាងកក ត្រូវបានកាត់បន្ថយខ្លះ។
ក្នុងឆ្នាំ២០២៥ ភ្ញៀវធ្វើដំណើរតាមផ្លូវអាកាសមានចំនួន ៦,៩៩ លាននាក់ កើនឡើង ១២% និងទំនិញដឹកជញ្ជូនតាមផ្លូវអាកាស ៩៣ ៨៨៩តោន កើន ២១%។ នេះបើយោងតាមទិន្នន័យរបស់រដ្ឋលេខាធិការដ្ឋានអាកាសចរណ៍ស៊ីវិល៕ ភ្នំពេញប៉ុស្តិ៍
