ដើម្បីពង្រីកវត្តមានសត្វនេះនៅលើទឹកដីកម្ពុជា ក្រសួងបរិស្ថានសហការជាមួយដៃគូអភិវឌ្ឍន៍នានា ក្នុងការរៀបចំផែនការសកម្មភាពសម្រាប់ការអភិរក្ស និងស្តារសត្វក្តាន់ឆ្នាំ ២០២៥-២០៣៥ ស្របទៅនឹងយុទ្ធសាស្ត្រចក្រាវិស័យបរិស្ថាន ដែលមានសសរស្តម្ភ៣គឺភាពស្អាត ភាពបៃតង និងចីរភាព។ យុទ្ធសាស្រ្តជំរុញការការពារប្រភេទសត្វកំពុងរងគ្រោះថ្នាក់ជិតផុតពូជ និងជាសម្បត្តិធម្មជាតិដ៏មានតម្លៃរបស់កម្ពុជា និងពិភពលោក។

អ្នកនាំពាក្យក្រសួងបរិស្ថាន លោក ខ្វៃ អាទិត្យា បានឱ្យដឹងថា ការរកឃើញសត្វក្តាន់រត់ចូលភូមិនេះជាថ្មីនេះ បង្ហាញថា ប្រភេទនេះនៅមានវត្តមាននៅក្នុងព្រៃរបស់កម្ពុជា ព្រោះវាប្រភេទសត្វព្រៃជិតផុតពូជបំផុតនៅក្នុងពិភពលោកផងដែរ។ ការរកឃើញឡើងវិញនៃវត្តមានសត្វក្តាន់នៅខេត្តក្រចេះ ក៏បានក្លាយក្តីសង្ឃឹមថ្មីសម្រាប់ការរស់រានមានជីវិតរបស់ពួកគេ។

លោកបានអំពាវនាវឱ្យមានការចូលរួមអភិរក្សសត្វព្រៃទាំងអស់គ្នា ដោយចៀសវាងការដេញបាញ់ ឬធ្វើបាបវា នៅពេលសត្វព្រៃរត់ចូលភូមិ ព្រោះវាអាចនឹងភ័យស្លន់ស្លោរហូតបង្កគ្រោះថ្នាក់ និងអាចបណ្តាលឱ្យសត្វព្រៃស្លាប់ បាត់បង់ធនធានជីវៈចម្រុះ និងសម្បត្តិវប្បធម៌កម្រនិងជិតផុតពូជរបស់មនុស្សជាតិ។

លោកបានលើកទឹកចិត្តឱ្យសាធារណជន ជួយរាយការណ៍ជាបន្ទាន់ទៅអាជ្ញាធរមូលដ្ឋាន មន្ត្រីបរិស្ថាន ឬជំនាញពាក់ព័ន្ធ ប្រសិនបើមានសត្វព្រៃ ជាពិសេសប្រភេទសត្វមានដោយកម្រ ដូចជាដំរីអាស៊ីជាដើម ឬសត្វដែលអាចបង្កគ្រោះថ្នាក់ដល់អាយុជីវិត ដើម្បីអន្តរាគមន៍សង្គ្រោះទាន់ពេលវេលា៕