កម្លាំងសមត្ថកិច្ចបានបើកប្រតិបត្តិការចុះបង្ក្រាបទីតាំងចំនួន ២កន្លែងផ្សេងគ្នាក្នុងមជ្ឈមណ្ឌល ព្រីសន៍ ផ្លាហ្សា ជាប់មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅព្រឹកថ្ងៃទី១៦ ខែឧសភា ឆ្នាំ២០២៦នេះ បន្ទាប់ពីសង្ស័យថា មានការលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។
ប្រតិបត្តិការបង្ក្រាបនេះធ្វើឡើងនៅ អគារ A និងអគារ B ដោយមានការចូលរួមពីគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) អាជ្ញាធរ សមត្ថកិច្ច និងតំណាងអយ្យការ។
យោងតាម គ.ប.ឆ.ប. នៅក្នុងប្រតិបត្តិការនេះ កម្លាំងសមត្ថកិច្ចបានឃាត់ខ្លួនជនបរទេសសរុបចំនួន ១០៤ នាក់ (ស្រី ០៧ នាក់) មាន ០៦ សញ្ជាតិផ្សេងគ្នា ក្នុងនោះរួមមានៈ ជនសង្ស័យពាក់ព័ន្ធបទល្មើសឆបោក Online Scams ចំនួន ៨៣ នាក់ (ជនជាតិចិន ៨២ នាក់ និងវៀតណាម ០១ នាក់) និងជនបរទេសពាក់ព័ន្ធការស្នាក់នៅខុសច្បាប់ ចំនួន ២១ នាក់ (មាន ០៥ សញ្ជាតិ)។
សមត្ថកិច្ចដកហូតទូរស័ព្ត ៨០០គ្រឿង កុំព្យូរទ័រជាង ១០០គ្រឿង និងសម្ភារៈពាក់ព័ន្ធមួយចំនួនទៀត។
គ.ប.ឆ.ប.ថ្លែងថា៖ «តាមរយៈការធ្វើកោសល្យវិច្ច័យបច្ចេកទេសបឋម ជនសង្ស័យបានប្រើប្រាស់ទីតាំងខាងលើ ដើម្បីធ្វើសកម្មភាពឆបោកជនរងគ្រោះតាមរយៈប្រព័ន្ធបច្ចេកវិទ្យា ក្រោមរូបភាព អូសទាញឱ្យវិនិយោគ ដើម្បីបោកបញ្ឆោតយកប្រាក់ពីសាធារណជនក្នុង និងក្រៅប្រទេស»។
មជ្ឈមណ្ឌល ព្រីសន៍ ផ្លាហ្សា ក៏មានជាប់ពាក់ព័ន្ធនឹងស្ថាបនិកធនាគារព្រីនស៍ លោក ចេន ហ្ស៊ី ផងដែរ ដែលត្រូវសមត្ថកិច្ចចិននិងកម្ពុជា ចាប់បញ្ជូនទៅប្រទេសចិន ពាក់ព័ន្ធនឹងការឆបោកតាមអនឡាញ។
កម្ពុជាបានបង្កើតច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលត្រូវបានប្រកាសឲ្យប្រើចាប់តាំងពីថ្ងៃទី៧ ខែមេសា។ យ៉ាងណាក៏ដោយ ក្រុមជនល្មើសឆបោកតាមអនឡាញនៅតែត្រូវបានបង្ក្រាបជាបន្តបន្ទាប់ ដែលភាគច្រើនជាជនបរទេស៕
