ការប្រឡងបាក់ឌុបឆ្នាំ ២០២៦ ចាប់ផ្ដើមនៅព្រឹកថ្ងៃទី១០ សីហានេះ ដោយរដ្ឋមន្ត្រីក្រសួងអប់រំ និងមន្ត្រីនៃអង្គភាពប្រឆាំងអំពើពុករលួយ ថ្លែងថា នឹងមិនមានសកម្មភាពណាមួយប៉ះពាល់ដល់ការប្រឡងទេ ទោះបីមានភ្លៀងធ្លាក់បន្តិចបន្តួចនៅភ្នំពេញ និងខេត្តមួយចំនួន។
ការប្រឡងបាក់ឌុបឆ្នាំនេះ មានបេក្ខជនជាង ១៥ម៉ឺននាក់ ក្នុងនោះថ្នាក់វិទ្យាសាស្ត្រាមានជាង ៣ម៉ឺន៧ពាន់នាក់ និងថ្នាក់វិទ្យាសាស្ត្រសង្គមជាង ១៣ម៉ឺននាក់។
ថ្លែងនៅក្នុងពិធីបើកការប្រឡងនៅព្រឹកនេះនៅរាជធានីភ្នំពេញ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឲ្យដឹងថា ការប្រឡងបាក់ឌុបឆ្នាំនេះមានសភាពល្អប្រសើរជាងឆ្នាំមុនបន្តិច ដោយហេតុថា បាក់ឌុបឆ្នាំ២០២៥ ធ្វើឡើងនៅថ្ងៃទី២៨ សីហា គឺក្នុងរយៈពេល ១ខែគត់ ក្រោយការប៉ះទង្គិចប្រដាប់អាវុធលើកទី១ នៅព្រំដែនកម្ពុជា-ថៃ។
លោកថ្លែងថា៖ «ឆ្នាំមុនដូចយើងដឹងស្រាប់ហើយ គឺជាឆ្នាំដែលថៃឈ្លានពានមកលើប្រទេសកម្ពុជា។ នៅខេត្តឧត្តរមានជ័យ សិស្សខ្លះគាត់រៀននៅលើគោយន្ត ប៉ុន្តែយ៉ាងណាក៏ដោយ សិស្សយើងម្នាក់ដែលខ្ញុំបានជួបសម្រេចបាននិទ្ទេស A ហើយបានចូលរៀននៅឧត្តមសិក្សាមួយដែលមានគុណភាព»។
លោករដ្ឋមន្ត្រីអប់រំ ថ្លែងថា បច្ចុប្បន្ននេះ មានសាលាចំនួន ២៥ នៅខេត្តជាប់ព្រំដែននៅតែបន្តបិទទ្វារ ដោយសារស្ថិតក្រោមការឈ្លានពានរបស់ថៃ ដែលធ្វើឲ្យសិស្សមិនទាន់អាចត្រឡប់ទៅរៀនវិញបាន។
លោកថ្លែងថា៖ «រាជរដ្ឋាភិបាលកំពុងទាមទារធ្វើយ៉ាងណាឲ្យសិស្សនៃសាលាទាំងអស់អាចត្រឡប់ទៅរៀនវិញបាន។ មានតែសិស្សពីអនុវិទ្យាល័យមួយគឺ អនុវិទ្យាល័យបន្ទាយមានរិទ្ធ នៅខេត្តឧត្តរមានជ័យ ដែលសិស្សកំពុងរៀននៅជំរំបណ្ដោះអាសន្ន»។
ពាក់ព័ន្ធនឹងភាពត្រឹមត្រូវនៃការប្រឡងបាក់ឌុប លោកថ្លែងថា នឹងមិនមានអំពើពុករលួយនៅក្នុងការប្រឡងនោះទេ ដោយសារតែការរៀបចំត្រឹមត្រូវ ការរឹតបន្តឹង និងមានការចូលរួមឃ្លាំមើលពីភាគីពាក់ព័ន្ធ។
មន្ត្រីជាន់ខ្ពស់នៃអង្គភាពប្រឆាំងអំពើពុករលួយថ្លែងថា អង្គភាពរបស់លោកបានដាក់ពង្រាយភ្នាក់ងារត្រួតពិនិត្យជាង ៤ពាន់នាក់ គឺជាចំនួនដែលដូចទៅនឹងឆ្នាំមុនដែរ៕
