ភ្នំពេញ: រដ្ឋមន្ត្រីក្រសួងព័ត៌មាន លោក នេត្រ ភក្ត្រា បានចោទសួរលើការអះអាងជាបន្តបន្ទាប់របស់ថៃដែលថា ប្រតិបត្តិការយោធារបស់ខ្លួនប្រឆាំងកម្ពុជា បានផ្តោតតែលើគោលដៅយោធា ដោយលើកយកការស្លាប់ និងរបួសរបស់ជនស៊ីវិល ការខូចខាតផ្ទះសម្បែង ទីតាំងសាសនា និងបេតិកភណ្ឌវប្បធម៌ ការជម្លៀសប្រជាពលរដ្ឋទ្រង់ទ្រាយធំ និងគ្រាប់បែកចង្កោមមិនទាន់ផ្ទុះ មកធ្វើជាមូលដ្ឋានសម្រាប់អំពាវនាវឱ្យមានការផ្ទៀងផ្ទាត់ដោយឯករាជ្យក្រោមច្បាប់មនុស្សធម៌អន្តរជាតិ។
ក្នុងសារដ៏វែងមួយដែលបានបង្ហោះនៅថ្ងៃទី១៤ ខែសីហា លោក ភក្ត្រា បាននិយាយថា ការអះអាងរបស់ថៃថា ប្រតិបត្តិការយោធារបស់ខ្លួនគោរពច្បាប់មនុស្សធម៌អន្តរជាតិ និងកំណត់ត្រឹមគោលដៅយោធា គួរតែត្រូវបានវាស់វែងតាមភស្តុតាង និងផលវិបាកជាក់ស្តែងដែលបានកើតឡើងនៅលើទឹកដីកម្ពុជា អំឡុងការប្រយុទ្ធពីរលើកនៅខែកក្កដា និងខែធ្នូ ឆ្នាំ២០២៥។
លោកបានថ្លែងថា៖ «ការអះអាងមួយមិនអាចក្លាយជាការពិតដោយសារតែវាត្រូវបាននិយាយម្តងហើយម្តងទៀតនោះទេ។ វាត្រូវតែផ្ទៀងផ្ទាត់ជាមួយនឹងអង្គហេតុ ភស្តុតាង ប្រភេទអាវុធដែលបានប្រើ ទីតាំងដែលត្រូវបានវាយប្រហារ និងផលប៉ះពាល់ជាក់ស្តែងទៅលើជនស៊ីវិល»។
លោកបានចោទជាសំណួរថា ប្រសិនបើប្រតិបត្តិការរបស់ថៃផ្តោតតែទៅលើគោលដៅយោធា ហេតុអ្វីបានជាផ្ទះសម្បែង ភូមិឋាន ទីតាំងសាសនា ហេដ្ឋារចនាសម្ព័ន្ធស៊ីវិល និងបេតិកភណ្ឌវប្បធម៌ រងការខូចខាត។
ប្រាសាទព្រះវិហារ ខេត្តព្រះវិហារ ការលើកឡើងរបស់លោក ភក្ត្រា គឺជាការឆ្លើយតបដោយផ្ទាល់ទៅនឹងជំហរដែលអាជ្ញាធរថៃបានប្រកាន់ជាបន្តបន្ទាប់អំឡុងជម្លោះព្រំដែន។
នៅក្នុងសន្និសីទសារព័ត៌មានការទូតកាលពីថ្ងៃទី៨ ខែធ្នូ ឆ្នាំ២០២៥ ក្រសួងការបរទេសថៃបានអះអាងថា ប្រតិបត្តិការយោធារបស់ខ្លួនធ្វើឡើងក្នុងសិទ្ធិការពារខ្លួន ស្របតាមច្បាប់អន្តរជាតិ និងកំណត់ត្រឹមគោលដៅយោធា ដោយព្យាយាមជៀសវាងការបង្កគ្រោះថ្នាក់ដល់ជនស៊ីវិល។ រដ្ឋមន្ត្រីការបរទេសថៃ លោក Sihasak Phuangketkeow ក៏បានអះអាងថា ប្រតិបត្តិការទាំងនេះគោរពគោលការណ៍ភាពចាំបាច់ និងសមាមាត្រ។
ថៃបានបន្តជំហរដដែលនេះនៅថ្ងៃទី១៥ ខែធ្នូ ដោយអះអាងថា ប្រតិបត្តិការយោធារបស់ខ្លួនត្រូវបានអនុវត្ត «តែទៅលើគោលដៅយោធារបស់កម្ពុជាប៉ុណ្ណោះ» ខណៈចោទកម្ពុជាថាបានវាយប្រហារលើតំបន់ស៊ីវិលរបស់ថៃ។
ប៉ុន្តែលោក ភក្ត្រា បានអះអាងថា ការហៅទីតាំងណាមួយថា «គោលដៅយោធា» មិនមានន័យថា ការវាយប្រហារលើទីតាំងនោះស្របច្បាប់ដោយស្វ័យប្រវត្តិនោះទេ។
គ្រាប់ MK-84 ទម្លាក់ពីយន្ដហោះចម្បាំងនៅក្បែរផ្ទះពលរដ្ឋភូមិថ្មដូន ខេត្តឧត្តរមានជ័យ លោកថា ភាពស្របច្បាប់នៃការវាយប្រហារនីមួយៗ គួរតែត្រូវបានវាយតម្លៃថា តើគោលដៅនោះពិតជាគោលដៅយោធាឬអត់ តើអាវុធដែលប្រើសមស្របនឹងបរិបទដែរឬទេ តើមានវិធានការប្រុងប្រយ័ត្នដើម្បីកាត់បន្ថយគ្រោះថ្នាក់ដល់ជនស៊ីវិលដែរឬទេ និងតើការខូចខាតដែលរំពឹងទុកលើជនស៊ីវិលមានសមាមាត្រជាមួយអត្ថប្រយោជន៍យោធាដែលរំពឹងទុកដែរឬទេ។
លោកបានលើកឡើងពីការប្រើប្រាស់យន្តហោះចម្បាំង F-16 កាំភ្លើងធំ រ៉ុក្កែត និងអាវុធធុនធ្ងន់ផ្សេងទៀតក្នុងការប្រយុទ្ធ ដែលលោកថា ជាកត្តាសំខាន់សម្រាប់វាយតម្លៃផលប៉ះពាល់លើជនស៊ីវិល។
អង្គការ Human Rights Watch បានរាយការណ៍ក្រោយការប្រយុទ្ធខែកក្កដាថា យោធាថៃបានប្រើយន្តហោះ F-16 និងដ្រូនសម្រាប់ការវាយប្រហារតាមអាកាស ព្រមទាំងកាំភ្លើងធំ និងរ៉ុក្កែត ខណៈកងកម្លាំងកម្ពុជាក៏បានប្រើរ៉ុក្កែត និងកាំភ្លើងធំផងដែរ។
អង្គការនេះបានផ្ទៀងផ្ទាត់ទីតាំងភូមិសាស្ត្ររូបភាពដែលបង្ហាញពីការខូចខាតលើអគារ និងវត្តព្រះពុទ្ធសាសនាមួយនៅឃុំគោកមន ខេត្តឧត្តរមានជ័យ។ អាជ្ញាធរកម្ពុជានៅពេលនោះក៏បានរាយការណ៍ថា មានជនស៊ីវិលម្នាក់ស្លាប់ បន្ទាប់ពីគ្រាប់ពីភាគីថៃបានធ្លាក់លើវត្តដែលគាត់ចូលទៅជ្រកកោន។
លោកថា ផលវិបាករបស់អាវុធផ្ទុះធុនធ្ងន់ មិនអាចវាស់បានត្រឹមចំណុចដែលអាវុធត្រូវបានបាញ់ទៅនោះទេ ព្រោះផលប៉ះពាល់អាចរាលដាលទៅក្រៅគោលដៅ។
លោកបានបញ្ជាក់ថា ផលវិបាកមិនត្រឹមតែមានការស្លាប់ និងរបួសភ្លាមៗប៉ុណ្ណោះទេ ប៉ុន្តែរួមមានការខូចខាតអគារ ការរំខានដល់សេវាសុខាភិបាល និងអប់រំ ការបំផ្លាញហេដ្ឋារចនាសម្ព័ន្ធ និងបេតិកភណ្ឌវប្បធម៌ និងការបង្ខំឱ្យប្រជាពលរដ្ឋចាកចេញពីលំនៅឋាន។
គ្រាប់បែកចង្កោមភស្ដុងតាងសង្កត់លើការអះអាងរបស់ថៃ
លោក ភក្ត្រា បានផ្តោតជាពិសេសលើការប្រើប្រាស់គ្រាប់បែកចង្កោមរបស់ថៃអំឡុងការប្រយុទ្ធខែកក្កដា ឆ្នាំ២០២៥។
យោធាថៃដំបូងបានបដិសេធការចោទប្រកាន់របស់កម្ពុជា ប៉ុន្តែក្រោយមកកងទ័ពជើងគោកថៃបានទទួលស្គាល់ការប្រើប្រាស់អាវុធប្រភេទនេះ ដោយអះអាងថា វាត្រូវបានប្រើនៅពេលចាំបាច់ប្រឆាំងគោលដៅយោធា និងស្របតាមគោលការណ៍សមាមាត្រ។
ផ្ទះពលរដ្ឋក្រុងសំរោង ខេត្តឧត្តរមានជ័យ ត្រូវបានវាយប្រហារដោយស្រូបថៃកាលពីសង្គ្រាមលើកទីមួយ។
Human Rights Watch បានលើកឡើងថា ការប្រើប្រាស់គ្រាប់បែកចង្កោមនៅតំបន់មានប្រជាជនរស់នៅ អាចមានលក្ខណៈមិនរើសមុខដោយខុសច្បាប់។ ទាំងកម្ពុជា និងថៃមិនមែនជារដ្ឋភាគីនៃអនុសញ្ញាស្តីពីគ្រាប់បែកចង្កោមនោះទេ។
គ្រាប់បែកចង្កោមអាចបញ្ចេញគ្រាប់តូចៗជាច្រើនលើផ្ទៃដីធំ ហើយគ្រាប់ខ្លះមិនផ្ទុះភ្លាមៗទេ ដែលអាចនៅសល់ជាគ្រាប់មិនទាន់ផ្ទុះ និងបន្តគំរាមកំហែងប្រជាពលរដ្ឋក្រោយសង្គ្រាម។
លោក ភក្ត្រា បានលើកយកករណីកុមារា ស៊ឺន សុវណ្ណ អាយុ១០ឆ្នាំ ដែលបានស្លាប់នៅថ្ងៃទី២៥ ខែតុលា ឆ្នាំ២០២៥ នៅខេត្តព្រះវិហារ។
Human Rights Watch បានរាយការណ៍ថា កុមារបានយកវត្ថុមួយពីវាលនៅក្បែរផ្ទះ ហើយវាបានផ្ទុះ បណ្តាលឱ្យគាត់ស្លាប់ និងឪពុករងរបួសធ្ងន់។
មជ្ឈមណ្ឌលសកម្មភាពកម្ចាត់មីនកម្ពុជា (CMAC) បានកំណត់ថា គ្រឿងផ្ទុះនោះជាគ្រាប់ M-85 មិនទាន់ផ្ទុះ ដែលខ្លួនបានអះអាងថា ត្រូវបានបាញ់ចូលកម្ពុជាដោយយោធាថៃក្នុងការប្រយុទ្ធខែកក្កដា។
យោធាថៃបានបដិសេធការសន្និដ្ឋានរបស់ CMAC ដោយអះអាងថា ស្លាកស្នាមនៃការផ្ទុះមិនស្របទៅនឹងប្រភេទគ្រាប់បែកចង្កោមដែលថៃមានក្នុងស្តុក។
ក្រោយមក Human Rights Watch បានអំពាវនាវឱ្យមានការស៊ើបអង្កេតដោយស្ថាប័នអន្តរជាតិឯករាជ្យ និងមានសមត្ថកិច្ចលើករណីស្លាប់របស់កុមារ។
លោក ភក្ត្រា បានលើកឡើងថា ករណីនេះបង្ហាញថា ផលប៉ះពាល់របស់គ្រាប់បែកចង្កោម «មិនបញ្ចប់នៅពេលសំឡេងកាំភ្លើងស្ងប់ឡើយ»។
ស្ពានជ័យជំនះ ឬស្ពានមេទឹក នៅខេត្តពោធិ៍សាត់ ត្រូវបានថៃទម្លាក់គ្រាប់បែកកម្ទេចកាលពីសង្គ្រាមលើកទីពីរ
ការប្រយុទ្ធខែធ្នូបង្កការជម្លៀសទ្រង់ទ្រាយធំ
រដ្ឋមន្ត្រីក៏បានលើកយកទំហំនៃការជម្លៀសប្រជាពលរដ្ឋ នៅពេលការប្រយុទ្ធបានផ្ទុះឡើងវិញក្នុងខែធ្នូ ឆ្នាំ២០២៥។
របាយការណ៍ថ្ងៃទី២៧ ខែធ្នូ របស់ Humanitarian Response Forum ដែលរៀបចំឡើងជាមួយទីភ្នាក់ងារអង្គការសហប្រជាជាតិ និងដៃគូមនុស្សធម៌ បានកត់ត្រាការប្រើប្រាស់កាំភ្លើងធំ យន្តហោះ F-16 ដ្រូន និងអាវុធផ្សេងទៀត រួមទាំងនៅក្នុង និងជុំវិញតំបន់ដែលមានប្រជាជនរស់នៅ។
គិតត្រឹមថ្ងៃទី២៥ ខែធ្នូ របាយការណ៍បានកត់ត្រាប្រជាពលរដ្ឋជម្លៀសខ្លួនចំនួន ៦៤៤ ៥៨៩នាក់ ក្នុងនោះមានស្ត្រី ៣៣៦ ៣០២នាក់ និងកុមារ ២០៤ ៩៩២នាក់។ នៅពេលនោះ ក៏មានការរាយការណ៍ថា ជនស៊ីវិល ៣០នាក់បានស្លាប់ និង៨៨នាក់រងរបួស ខណៈសាលារៀនជាង១ ៣០០កន្លែងត្រូវបានបិទ ប៉ះពាល់សិស្សប្រមាណ ៣២២ ១០៣នាក់។
តួលេខផ្លូវការបន្ទាប់ដែលត្រូវបាន Humanitarian Response Forum ដកស្រង់ បង្ហាញថា ចំនួនអ្នកភៀសសឹកបានកើនដល់ប្រមាណ ៦៤៩ ០០០នាក់ គិតត្រឹមថ្ងៃទី២៧ ខែធ្នូ ខណៈក្រសួងមហាផ្ទៃកម្ពុជាបានរាយការណ៍ថា ជនស៊ីវិល ៣២នាក់បានស្លាប់ និង៩៤នាក់រងរបួសក្នុងការប្រយុទ្ធខែធ្នូ។
ការខូចខាតត្រូវបានរាយការណ៍ថា បានប៉ះពាល់ដល់ផ្ទះសម្បែង សាលារៀន មណ្ឌលសុខភាព ផ្លូវ ស្ពាន បណ្តាញអគ្គិសនី ទីតាំងសាសនា និងបេតិកភណ្ឌវប្បធម៌។
ការវាយតម្លៃផលប៉ះពាល់សេដ្ឋកិច្ច-សង្គមរបស់អង្គការសហប្រជាជាតិដែលចេញផ្សាយក្នុងខែមេសា ឆ្នាំ២០២៦ បានឱ្យដឹងថា កម្ពុជាបានជួបរលកជម្លៀសធំៗចំនួនពីរក្នុងឆ្នាំ២០២៥។ ជាង ១៧២ ០០០នាក់ត្រូវបានជម្លៀសក្រោយការប្រយុទ្ធខែកក្កដា ខណៈការប្រយុទ្ធឡើងវិញក្នុងខែធ្នូ បានបង្ករលកជម្លៀសធំជាងមុន ដែលឡើងដល់ជិត ៦៤៥ ០០០នាក់។
ភស្តុតាងនៃការខូចខាតលើតំបន់ស៊ីវិលក៏ត្រូវបានរាយការណ៍ក្រោយការប្រយុទ្ធខែកក្កដាផងដែរ។ ទីភ្នាក់ងារសារព័ត៌មាន AP បានរាយការណ៍ពីប្រជាពលរដ្ឋកម្ពុជានៅខេត្តឧត្តរមានជ័យ ដែលបានវិលត្រឡប់ទៅរកឃើញផ្ទះ និងទ្រព្យសម្បត្តិរបស់ពួកគេត្រូវបានដុត ឬរងការខូចខាត បន្ទាប់ពីបានរត់ភៀសខ្លួនចេញពីតំបន់ប្រយុទ្ធ។
លោក ភក្ត្រា បានថ្លែងថា ផ្ទះសម្បែង សាលារៀន មន្ទីរពេទ្យ ទីតាំងសាសនា និងហេដ្ឋារចនាសម្ព័ន្ធស៊ីវិល ជាទូទៅត្រូវបានចាត់ទុកជាវត្ថុស៊ីវិលក្រោមច្បាប់មនុស្សធម៌អន្តរជាតិ ហើយមិនអាចក្លាយជាគោលដៅវាយប្រហារបានទេ លុះត្រាតែវាបំពេញលក្ខខណ្ឌជាគោលដៅយោធាតាមច្បាប់។
បេតិកភណ្ឌវប្បធម៌ស្ថិតក្រោមហានិភ័យ
លោករដ្ឋមន្ត្រីក៏បានលើកឡើងពីការខូចខាត និងហានិភ័យដែលប៉ះពាល់ដល់ទីតាំងបេតិកភណ្ឌវប្បធម៌ រួមមានប្រាសាទតាក្របី និងប្រាសាទព្រះវិហារ ដែលជាសម្បត្តិបេតិកភណ្ឌពិភពលោករបស់ UNESCO។
នៅថ្ងៃទី១០ ខែធ្នូ ឆ្នាំ២០២៥ UNESCO បានបង្ហាញ «ក្តីព្រួយបារម្ភយ៉ាងខ្លាំង» ចំពោះការប្រយុទ្ធឡើងវិញរវាងកម្ពុជា និងថៃ រួមទាំងតំបន់នៅក្បែរប្រាសាទព្រះវិហារ។
អង្គការនេះបានរំឭកដល់ភាគីទាំងពីរអំពីកាតព្វកិច្ចក្រោមច្បាប់អន្តរជាតិ រួមទាំងអនុសញ្ញាទីក្រុងឡាអេ ឆ្នាំ១៩៥៤ ស្តីពីការការពារសម្បត្តិវប្បធម៌ក្នុងករណីជម្លោះប្រដាប់អាវុធ និងអនុសញ្ញាបេតិកភណ្ឌពិភពលោក។
UNESCO ក៏បានបញ្ជាក់ថា ខ្លួនបានផ្តល់កូអរដោនេភូមិសាស្ត្ររបស់ទីតាំងបេតិកភណ្ឌពិភពលោក និងទីតាំងសំខាន់ផ្សេងទៀតដល់ភាគីពាក់ព័ន្ធ ដើម្បីជួយទប់ស្កាត់ការខូចខាត។
លោក ភក្ត្រា បាននិយាយថា ការគោរពច្បាប់មនុស្សធម៌អន្តរជាតិ មិនអាចកំណត់ត្រឹមការអះអាងថា មិនមានចេតនាវាយប្រហារជនស៊ីវិលនោះទេ។
លោកបានលើកឡើងពីគោលការណ៍ស្នូលបីរបស់ច្បាប់សង្គ្រាម រួមមាន ការបែងចែករវាងជនស៊ីវិល និងយុទ្ធជន សមាមាត្ររវាងការខូចខាតដែលរំពឹងទុកលើជនស៊ីវិល និងអត្ថប្រយោជន៍យោធា និងការប្រុងប្រយ័ត្នដើម្បីកាត់បន្ថយគ្រោះថ្នាក់ដល់ជនស៊ីវិល។
លោកថា៖ «ប្រសិនបើយោធាថៃអះអាងថា រាល់ការវាយប្រហាររបស់ខ្លួនសុទ្ធតែស្របច្បាប់ និងផ្តោតតែទៅលើគោលដៅយោធា នោះការអះអាងនេះគួរតែអាចឆ្លងកាត់ការផ្ទៀងផ្ទាត់ឯករាជ្យបាន»។
លោកបានចោទជាសំណួរថា តើព័ត៌មានស៊ើបការណ៍អ្វីត្រូវបានប្រើដើម្បីកំណត់គោលដៅ តើវត្តមានជនស៊ីវិលត្រូវបានវាយតម្លៃមុនការវាយប្រហារឬទេ ហេតុអ្វីបានជាអាវុធដែលមានផលប៉ះពាល់លើផ្ទៃធំត្រូវបានប្រើ និងតើមានជម្រើសអាវុធ ពេលវេលា ឬវិធីសាស្ត្រផ្សេងទៀតដែលអាចកាត់បន្ថយគ្រោះថ្នាក់ដល់ជនស៊ីវិលបានដែរឬទេ។
ទោះយ៉ាងណា ភាគីទាំងពីរសុទ្ធតែបានចោទប្រកាន់គ្នាទៅវិញទៅមកថា បានវាយប្រហារលើតំបន់ស៊ីវិល។
ថៃបានអះអាងជាបន្តបន្ទាប់ថា កងកម្លាំងកម្ពុជាជាអ្នកចាប់ផ្តើមវាយប្រហារលើទឹកដី និងតំបន់ស៊ីវិលរបស់ខ្លួនមុន ហើយប្រតិបត្តិការរបស់ថៃគឺជាការការពារខ្លួនស្របច្បាប់។
នៅថ្ងៃទី១៩ ខែធ្នូ ក្រសួងការបរទេសថៃក៏បានបដិសេធការចោទប្រកាន់របស់កម្ពុជា ពាក់ព័ន្ធនឹងការវាយប្រហារដោយ F-16 នៅក្បែរប៉ោយប៉ែត ដោយអះអាងថា គោលដៅគឺជាទីតាំងស្តុករ៉ុក្កែត BM-21 នៅក្រៅតំបន់កណ្តាលទីក្រុង។
ថៃបានអះអាងថា ការវាយប្រហាររបស់ខ្លួនត្រូវបានធ្វើលើគោលដៅយោធាដែលបានផ្ទៀងផ្ទាត់ បន្ទាប់ពីការពិនិត្យផ្នែកស៊ើបការណ៍ យោធា និងផ្លូវច្បាប់ ខណៈចោទកងកម្លាំងកម្ពុជាថា បានដាក់សម្ភារយោធានៅជិតសហគមន៍ស៊ីវិល។
លោក ភក្ត្រា ទោះជាយ៉ាងណា បាននិយាយថា សេចក្តីថ្លែងការណ៍ និងការបដិសេធរបស់ភាគីណាមួយ មិនគួរជំនួសការពិនិត្យភស្តុតាងជាក់ស្តែងនោះទេ។
លោកបានអំពាវនាវឱ្យមានការកត់ត្រាភស្តុតាង ការផ្ទៀងផ្ទាត់ដោយឯករាជ្យ និងការវាយតម្លៃការវាយប្រហារនីមួយៗក្រោមច្បាប់មនុស្សធម៌អន្តរជាតិ ជំនួសឱ្យការទទួលយកការអះអាងរបស់ភាគីជម្លោះដោយស្វ័យប្រវត្តិ។
លោកបានថ្លែងថា៖ «អ្នកដែលអះអាងថាការវាយប្រហាររបស់ខ្លួនស្របច្បាប់ មិនគួរខ្លាចការផ្ទៀងផ្ទាត់ដោយឯករាជ្យឡើយ»។
លោកបន្តថា៖ «ប្រសិនបើគោលដៅទាំងអស់ពិតជាគោលដៅយោធា ប្រសិនបើគោលការណ៍សមាមាត្រត្រូវបានគោរព និងប្រសិនបើវិធានការប្រុងប្រយ័ត្រត្រូវបានអនុវត្តយ៉ាងពេញលេញ នោះភស្តុតាងគួរតែអាចបញ្ជាក់ការអះអាងនោះបាន»។
លោកបានបន្ថែមថា ការខូចខាតដែលសង្គ្រាមបានបន្សល់ទុក រួមទាំងជនស៊ីវិលស្លាប់ និងរបួស ផ្ទះសម្បែង និងទីតាំងសាសនាខូចខាត សហគមន៍ត្រូវបានជម្លៀស និងគ្រាប់មិនទាន់ផ្ទុះ មិនអាចត្រូវបានលុបបំបាត់ដោយការអះអាងដដែលៗថា ការវាយប្រហារផ្តោតតែទៅលើគោលដៅយោធានោះទេ។
លោកថា៖ «ការពិតត្រូវវាស់ដោយភស្តុតាងនៅលើដី មិនមែនដោយការអះអាង ឬការបដិសេធពីអ្នកដែលបានប្រើប្រាស់អាវុធយុទ្ធភណ្ឌនោះទេ»។
លោក ភក្ត្រា ក៏បានយោងទៅលើឯកសារផ្លូវការរបស់កម្ពុជាដាក់ជូនក្រុមប្រឹក្សាសន្តិសុខអង្គការសហប្រជាជាតិ ដែលបានរាយការណ៍ថា គ្រាប់បែកពីយន្តហោះ F-16 របស់ថៃបានធ្លាក់ចូលក្នុងបរិវេណវត្តតាមាន់សែនជ័យនៅថ្ងៃទី២៤ ខែកក្កដា ឆ្នាំ២០២៥ បណ្តាលឱ្យលោកអាចារ្យម្នាក់ស្លាប់ ហើយនៅថ្ងៃបន្ទាប់ក៏មានការវាយប្រហារតាមអាកាសបន្ថែមទៀត រួមទាំងនៅតំបន់ប្រាសាទតាក្របី។
