ហ្វីលីពីន ប្ដេជ្ញាបន្តពង្រឹង និងពង្រីកកិច្ចសហប្រតិបត្តិការវិស័យយោធាជាមួយកម្ពុជា ជាពិសេសរវាងកងទ័ពជើងទឹក និងកងទ័ពអាកាស
អាសយដ្ឋានទីស្នាក់ការអង្គភាព សារព័ត៌មាន កម្ពុជាថ្ងៃថ្មី (www.sapormeanktnseven.com.kh) ស្ថិតនៅក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ / Phone 078 5555 12 / 015 22 3333 ។​ សូមអរគុណ...!

ហ្វីលីពីន ប្ដេជ្ញាបន្តពង្រឹង និងពង្រីកកិច្ចសហប្រតិបត្តិការវិស័យយោធាជាមួយកម្ពុជា ជាពិសេសរវាងកងទ័ពជើងទឹក និងកងទ័ពអាកាស

 ប្រទេស​ហ្វីលីពីន បាន​ប្តេជ្ញាបន្តពង្រឹង និងពង្រីក​កិច្ចសហ​ប្រតិបត្តិការ​ក្នុង​វិស័យ​យោធាជាមួយ​ប្រទេស​កម្ពុជា ជាពិសេសរវាងកងទ័ពជើងទឹក និងកងទ័ពអាកាស ឱ្យកាន់តែស៊ីជម្រៅបន្ថែមទៀត ហើយ​ហ្វីលីពីន ក៏បាននឹងកំពុង​ដឹកនាំ​ក្រុមអ្នកសង្កេតការណ៍អាស៊ាន (AOT) យ៉ាងសកម្មក្នុងការសម្របសម្រួលដោះស្រាយបញ្ហាព្រំដែន កម្ពុជា-ថៃ ផងដែរ។

ការ​ពង្រឹង និងពង្រីក​កិច្ចសហ​ប្រតិបត្តិការ​​ក្នុង​​វិស័យ​យោធា​របស់​ប្រទេស​ទាំង​២ ត្រូវបាន​លើក​ឡើង នៅក្នុងជំនួបពិភាក្សាការ​ងារ​​រវាង​​លោ​កនាយក​រដ្ឋមន្រ្តី ហ៊ុន ម៉ាណែត និង​លោក​នាយឧត្តមសេនីយ៍ Antonio G Natarrete នាយសេនាធិការកងទ័ពហ្វីលីពីន និងគណៈប្រតិភូ នៅវិមានសន្តិភាព កាលពី​ព្រឹក​​ថ្ងៃទី ២០ ខែតុលា ឆ្នាំ​២០២៦នេះ។

នៅក្នុងជំនួប​នោះ លោក Antonio G Natarrete បានរំឭក​ឡើងវិញ​នូវ​ទំនាក់ទំនង និងកិច្ចសហប្រតិបត្តិការដ៏ល្អ និង​យូរអង្វែង រវាងប្រទេស​​ហ្វីលីពីន និង​កម្ពុជា ជាពិសេសក្នុង​វិស័យការពារជាតិ និងសន្តិសុខ ហើយ​លោក​បាន​សម្ដែងនូវការពេញ​ចិត្ត​ចំពោះ​វឌ្ឍនភាពនៃ​​កិច្ចសហប្រតិបត្តិការរវាងកងទ័ពជើងគោកនៃប្រទេសទាំង​២។

ជាមួយគ្នានេះ លោក Antonio G Natarrete បានគូសបញ្ជាក់អំពីការប្ដេជ្ញាចិត្តរបស់​ហ្វីលីពីន ក្នុងការបន្តពង្រឹង និងពង្រីកកិច្ចសហប្រតិបត្តិការក្នុងវិស័យយោធាជាមួយ​កម្ពុជា ជាពិសេសរវាងកងទ័ពជើងទឹក និងកងទ័ពអាកាស ឱ្យកាន់តែស៊ីជម្រៅបន្ថែមទៀត។

ចំណែក​លោក ហ៊ុន ម៉ាណែត បានអបអរសាទរចំពោះ លោក Antonio G Natarrete ដែលត្រូវ​បាន​តែងតាំង​ជា​នាយ​សេនាធិការកងទ័ព​ហ្វីលីពីន នាពេលថ្មីៗនេះ ហើយ​លោក​បាន​បង្ហាញ​នូវការពេញចិត្ត និងវាយតម្លៃ​ខ្ពស់​ចំពោះ​វឌ្ឍនភាព​នៃទំនាក់ទំនង និង​កិច្ច​សហប្រតិបត្តិការ​ក្នុង​វិស័យការពារជាតិ​​នៃ​ប្រទេសទាំងពីរ ជាពិសេសកិច្ចសហប្រតិបត្តិការក្នុងការចែករំលែក និងផ្លាស់ប្ដូរបទពិសោធន៍ តាមរយៈការបណ្ដុះបណ្ដាល និងការកសាងសមត្ថភាពរវាងកងទ័ពជើងគោកនៃប្រទេសទាំងពីរ។

លោកនាយក​រដ្ឋមន្រ្តី បានបង្ហាញនូវក្ដីសង្ឃឹមយ៉ាងមុតមាំថា៖​ «កិច្ច​សហប្រតិបត្តិការ​រវាង​កងទ័ពជើងគោក​​នៃ​​ប្រទេសទាំងពីរ នឹងត្រូវ​​បាន​ពង្រឹង និងពង្រីកបន្ថែមទៀត ព្រម​ទាំ​ង​ឈាន​​ទៅ​​សម្រេច​បាន​នូវការ​ចុះ​ហត្ថលេខាលើ​កិច្ចព្រមព្រៀង​នៃ​កិច្ច​សហប្រតិបត្តិការ​រវាង​កងទ័ពជើងទឹក និង​កងទ័ព​អាកាស នាពេលខាងមុខ និង​ខិតខំប្រែក្លាយ​កិច្ច​ព្រមព្រៀងទាំងនេះ ឱ្យក្លាយជាសកម្មភាព​ និងលទ្ធផល​ជាក់ស្ដែង»។

បន្ថែមលើនេះ លោក ហ៊ុន ម៉ាណែត បានវាយតម្លៃខ្ពស់ចំពោះតួនាទីរបស់ក្រុមអ្នកសង្កេតការណ៍អាស៊ាន (AOT) និងជឿជាក់ថា ក្រោមការដឹកនាំរបស់ហ្វីលីពីន ក្រុម AOT នឹងបន្តចូលរួមចំណែកយ៉ាង​សកម្មថែមទៀតក្នុងការសម្របសម្រួលដោះស្រាយបញ្ហាព្រំដែន កម្ពុជា-ថៃ ដោយសន្តិវិធី។

លោក ម៉ាណែត ក៏​បាន​ប្រាប់​លោក Antonio G Natarrete និងគណៈប្រតិភូ នូវការវិវត្តថ្មីៗ នៃសភាពការណ៍ព្រំដែន កម្ពុជា-ថៃ និងបញ្ជាក់ពីជំហររបស់កម្ពុជាក្នុងការដោះស្រាយបញ្ហាព្រំដែនដោយសន្តិវិធី ផ្អែកលើកិច្ចព្រមព្រៀងទ្វេភាគី, អនុសញ្ញា និងសន្ធិសញ្ញាដែលមានស្រាប់ ព្រមទាំងច្បាប់អន្តរជាតិ។ កម្ពុជាប្ដេជ្ញាចិត្តយ៉ាងមុតមាំ​ក្នុង​ការគោរពនូវកិច្ចព្រមព្រៀង​ដែល​ប្រទេសទាំង​ពីរបាន​ឯកភាព​គ្នា នាពេល​កន្លងមក។

លើសពី​នោះ លោក ហ៊ុន ម៉ាណែត និង​លោក Antonio G Natarrete បានពិភាក្សា និងផ្លាស់ប្ដូរទស្សនៈអំពីការបន្តពង្រឹងកិច្ចសហប្រតិបត្តិការយ៉ាងជិតស្និទ្ធរវាងកងទ័ព​និងកងទ័ព ដើម្បីរួមគ្នាប្រយុទ្ធប្រឆាំងនឹងបទល្មើសឆ្លងដែន ដូចជាការបទល្មើស​ឆបោកតាមប្រព័ន្ធបច្ចេកវិទ្យា, ការប្រយុទ្ធប្រឆាំងនឹងអំពើភេរវកម្ម និងការវាយប្រហារតាមប្រព័ន្ធសាយប័រជាដើម សំដៅរួមចំណែកដល់ការថែរក្សាសន្តិភាព ស្ថិរភាព និងវិបុលភាព ក្នុងតំបន់ និងសកលលោក៕


Post a Comment (0)
Previous Post Next Post