ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន នៅថ្ងៃទី១៧ ខែធ្នូ បានព្រមានថា កម្ពុជាអាចនឹងដើរថយក្រោយប្រទេសអភិវឌ្ឍន៍បន្ថែមទៀត ប្រសិនបើបរាជ័យក្នុងការទទួលយកបញ្ញាសិប្បនិម្មិត ដោយជំរុញឱ្យសាកលវិទ្យាល័យនានាទទួលយកបច្ចេកវិទ្យានេះយ៉ាងឆាប់រហ័ស ប៉ុន្តែមានការទទួលខុសត្រូវ ដើម្បីពង្រឹងសមត្ថភាពចំណេះដឹងពិតប្រាកដ។
ថ្លែងនៅក្នុងពិធីប្រគល់សញ្ញាបត្រនៅសាកលវិទ្យាល័យខេមតិច លោក ណារ៉ុន បាននិយាយថា៖ «បញ្ញាសិប្បនិម្មិត AI ជួយសិស្ស-និស្សិតសិក្សារៀនសូត្របានលឿនជាងមុន ទទួលបាននូវចំណេះដឹងច្រើន និងជំរុញសេដ្ឋកិច្ចកែប្រែមុខមាត់ បដិវត្ដកម្មឌីជីថលលឿន ក៏ដូចជាប្រទេសរីកចម្រើនលឿន»។
យ៉ាងណាមិញ លោកបានព្រមានថា បើសិនជាកម្ពុជាចាប់យកបច្ចេកវិទ្យាបញ្ញាសិប្បនិម្មិតមិនទាន់ទេ វាធ្វើឱ្យមានគម្លាតកាន់តែខ្លាំងរវាងប្រទេសអភិវឌ្ឍ និងប្រទេសកំពុងអភិវឌ្ឍ។
លោក ណារ៉ុន ទទួលស្គាល់ថា បច្ចេកវិទ្យាបញ្ញាសិប្បនិម្មិតក៏មានផលប៉ះពាល់ច្រើនទាំងទៅលើវិស័យអប់រំ សេដ្ឋកិច្ច កសិកម្ម និងឧស្សាហកម្ម។
លោកថ្លែងថា៖ «នៅពេលអនាគត ជាពិសេស ប្អូនៗដែលរៀនផ្នែកវិទ្យាសាស្ដ្រ និងបច្ចេកវិទ្យា យើងនឹងឃើញថា ចំពោះវិស័យកសិកម្ម គេប្រើដ្រូនសិក្សាពីដី ដាក់ជី ដែលអាចធ្វើការទាំងយប់ ទាំងថ្ងៃ»។
លោកបានលើកឡើងពីអត្ថប្រយោជន៍ជាច្រើនទៀតចំពោះបច្ចេកវិទ្យាបញ្ញាសិប្បនិម្មិតក្នុងការអភិវឌ្ឍសង្គមសេដ្ឋកិច្ចនាពេលបច្ចុប្បន្ន និងថ្ងៃអនាគត។
ក្រៅពីគម្លាំងនៃការប្រើប្រាស់បច្ចេកវិទ្យារវាងប្រទេស និងប្រទេស វាក៏បានបង្កើតនូវគម្លាំងនៅក្នុងប្រទេសផងដែរ ដោយអាជីពការងារមួយចំនួនរងប៉ះពាល់ផងដែរ។
លោកបានបន្ដថា៖ «អាជីពមួយចំនួនទាក់ទងការសរសេរត្រូវបានជំនួសដោយ AI តែអាជីពមួយចំនួនទៀតមានការកើនឡើង។ AI ជួយដល់ការស្រាវជ្រាវរបស់និស្សិត ជួយការសិក្សាឱ្យមានប្រសិទ្ធភាព»។
យ៉ាងណាមិញ លោកបានលើកឡើងថា ការពឹងអាស្រ័យលើ AI សរសេរនិក្ខេបបទ មិនមែនជាការសិក្សារៀនសូត្រនោះទេ ពីព្រោះគំនិតនេះគឺជាការបង្កើតឡើងដោយ AI។
លោក ណារ៉ុន បានបញ្ជាក់ថា៖ «ទន្ទឹមនឹងការលើកទឹកចិត្ដឱ្យមានការប្រើប្រាស់ សកលវិទ្យាល័យមួយចំនួនចាប់ផ្ដើមប្រើប្រាស់ AI ឱ្យមានការទទួលខុសត្រូវ។ ក្រសួងអប់រំលើកទឹកចិត្ដដល់សកលវិទ្យាល័យនីមួយៗបង្កើតជាក្រមសីលធម៌»។
លោកបានពន្យល់ថា៖ «នៅក្នុងយុគសម័យ AI នេះ គ្រូត្រូវកែលម្អវិធីសាស្ដ្របង្រៀន ដើម្បីលើកទឹកចិត្ដឱ្យសិស្សធ្វើការស្រាវជ្រាវគំនិតខ្លួនឯង ស្រាវជ្រាវដោះស្រាយបញ្ហា ធ្វើការត្រេះរិះពិចារណា មានភាពជាអ្នកដឹកនាំ និងប្រើប្រាស់ AI ជាជំនួយ»លោករដ្ឋមន្ដ្រីលើកទឹកចិត្ដឱ្យមានការប្រឡងផ្ទាល់មាត់ ដែលឆ្លុះបញ្ចាំងពីចំណេះដឹងពិតប្រាកដ ដោយមិនអាចពឹងអាស្រ័យលើការសរសេរ ស្រាវជ្រាវពីបច្ចេកវិទ្យា AI។
យ៉ាងណាមិញ លោកទទួលស្គាល់ថា រាល់ទម្រង់នៃការសិក្សាទាំងអស់សុទ្ធតែល្អចំពោះសិស្ស-និស្សិតពីបច្ចេកវិទ្យាសិប្បនិម្មិត។
លោកស្រី លឹម លីណា តំណាងប្រធានក្រុមប្រឹក្សាភិបាលនៃសាកលវិទ្យាល័យខេមតិច បាននិយាយថា ការអប់រំ និងការអភិវឌ្ឍធនធានមនុស្ស គឺជាចំណុចស្នូលនៃការរីកចម្រើនរយៈពេលវែងរបស់កម្ពុជា។
លោកស្រីបានគូសបញ្ជាក់ពីការស្របគ្នារបស់សាកលវិទ្យាល័យជាមួយនឹងផែនការយុទ្ធសាស្ត្រ និងចក្ខុវិស័យឆ្នាំ២០៥០ របស់រដ្ឋាភិបាល។
លោកស្រីបានឱ្យដឹងថា៖ «ដោយមានកិច្ចសហប្រតិបត្តិការជិតស្និទ្ធជាមួយក្រសួងអប់រំ យុវជន និងកីឡា ខេមតិចបានបង្កើតដោយជោគជ័យនូវមន្ទីរពិសោធន៍បញ្ញាសិប្បនិមិត្តសម្រាប់ការអប់រំ (AILab4Education) សម្រាប់ការពង្រឹងសមត្ថភាពក្នុងវិស័យអប់រំ ស្រាវជ្រាវ និងអនុវត្តជាក់ស្តែងលើផ្នែកបច្ចេកវិទ្យា AI»។
ឃៀង សុធី សាកលវិទ្យាធិការ នៃសាកលវិទ្យាល័យខេមតិច បានឱ្យដឹងថា ខេមតិច មានគោលបំណងគាំទ្រដល់ការផ្លាស់ប្តូររបស់ប្រទេសកម្ពុជាឆ្ពោះទៅរកសេដ្ឋកិច្ចឌីជីថល និងឋានៈជាប្រទេសមានចំណូលមធ្យមនៅឆ្នាំ២០៣០ តាមរយៈការស្រាវជ្រាវអនុវត្ត និងការអប់រំដែលផ្តោតលើនវានុវត្តន៍។
លោកបានថ្លែងថា៖ «ក្នុងនាមជាស្ថាប័នដែលផ្តោតលើនវានុវត្តន៍ និងជាសហគ្រិន យើងខិតខំអភិវឌ្ឍប្រទេសកម្ពុជាទៅជាមជ្ឈមណ្ឌលនៃចំណេះដឹង បច្ចេកវិទ្យា និងការចាប់ផ្តើមអាជីវកម្ម»។
កញ្ញា គ្រី សុរចនា ជានិសិ្សតជ័យលាភីមួយក្នុងចំណោមនិស្សិតជំនាញវិទ្យាសាស្ត្រទិន្នន័យ និងបញ្ញាសិប្បនិម្មិតបានបញ្ជាក់ថា៖ «គ្រួសាររបស់ខ្ញុំតែងតែឱ្យតម្លៃខ្ពស់ទៅលើការអប់រំ ជាពិសេសជាមួយនឹងស្ថានភាពតានតឹងនៅតាមព្រំដែនដែលយើងឃើញសព្វថ្ងៃនេះ វាបានរំឭកខ្ញុំថា ការអប់រំ គឺជាទ្រព្យសម្បត្តិដែលមិនអាចកាត់ថ្លៃបាន»៕