រាជរដ្ឋាភិបាលកម្ពុជា ក្នុងឆ្នាំ២០២៦ ខាងមុខនឹងមានថវិកាប្រមាណ ៩,៦ ពាន់លានដុល្លារសម្រាប់ប្រើប្រាស់ក្នុងដំណើរការកសាង អភិវឌ្ឍន៍ និងការពារប្រទេស ដោយចំនួននេះបានកើនឡើងតិចតួចបើធៀបនឹងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥។ សម្រាប់ក្រសួងការពារជាតិ គឺមានថវិកាប្រមាណជិត ៧៥០ លានដុល្លារ។
ព្រះរាជក្រមស្តីពី «ច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២៦» ដែលចុះហត្ថលេខាដោយព្រះមហាក្សត្រ នរោត្តម សីហមុនី កាលពីថ្ងៃទី១៧ ខែធ្នូ ឆ្នាំ២០២៥ ត្រង់មាត្រា ២ បង្ហាញថា ចំនួនទឹកប្រាក់ជាអតិបរមានៃឥណទានចំណាយថវិកាថ្នាក់ជាតិសម្រាប់ការគ្រប់គ្រងឆ្នាំ២០២៦ ត្រូវបានកំណត់ស្មើនឹង ៣៨ ៤៥២ ៦៥៨ លានរៀល (ប្រហែល ៩,៦១ ពាន់លានដុល្លារ)។ ចំនួននេះ គឺកើនឡើងប្រមាណ ៨,៦៣% បើធៀបនឹងឆ្នាំ២០២៥ ដែលមាន ៣៥ ៣៩៨ ១៧៥ លានរៀល (៨,៨៥ ពាន់លានដុល្លារ)។
ឯកសារឱ្យដឹងទៀតថា ក្នុងឆ្នាំ២០២៦ ក្រសួងការពារជាតិ នឹងមានថវិកាចំនួន ២ ៩៩៩ ៥៩៧ លានរៀល(៧៥០ លានដុល្លារ) កើនឡើង ១,១៨% ធៀបនឹងឆ្នាំ២០២៥។ ទឹកប្រាក់ក្រសួងការពារជាតិ មានចំណែកប្រមាណ ៧,៨% នៃគម្រោងចំណាយសរុបរបស់រដ្ឋាភិបាល ក្នុងឆ្នាំ២០២៦។
ជាមួយគ្នានេះ ក្នុងឆ្នាំ២០២៦ រដ្ឋាភិបាលនឹងបញ្ចេញចំណាយ ២ ០៤៤ ៣១០ លានរៀល (៥១១,០៨ លានដុល្លារ) សម្រាប់ក្រសួងមហាផ្ទៃ-សន្តិសុខសាធារណៈ ដោយកើនពី ២ ០៣៩ ៣០២ លានរៀល (៥០៩,៨២ លានដុល្លារ) កាលពីឆ្នាំ២០២៥។
ក្នុងកិច្ចប្រជុំជាមួយគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម(គណៈកម្មការទី២)នៃរដ្ឋសភា កាលពីពេលកន្លងមក លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បាននិយាយថា សេចក្តីព្រាងច្បាប់ស្តីពីហិរញ្ញវត្ថុសាធារណៈសម្រាប់ការគ្រប់គ្រងឆ្នាំ២០២៦ ត្រូវបានរៀបចំឡើងក្នុងបរិការណ៍ដែលរាជរដ្ឋាភិបាលនីតិកាលទី៧ នៃរដ្ឋសភា កំពុងបន្តជំរុញអនុវត្តយ៉ាងសស្រាក់សស្រាំនូវបេសកកម្មជាប្រវត្តិសាស្រ្តរបស់ខ្លួនជាមួយនឹងការប្តេជ្ញាចិត្តយ៉ាងមុតមាំ និងឥតរាថយក្នុងការការពារអធិបតេយ្យ បូរណភាពទឹកដី និងថែរក្សាសុខសន្តិភាព និងប្រជាជន។
លោកបន្តថា រដ្ឋាភិបាលអាណត្តិទី៧ ក៏ផ្ដោតលើការពន្លឿនកិច្ចអភិវឌ្ឍសង្គម-សេដ្ឋកិច្ច និងកិច្ចការកែទម្រង់កាន់តែស៊ីជម្រៅលើគ្រប់វិស័យលើមាគ៌ាបន្តឈានទៅសម្រេចឋាន:ជាប្រទេសមានចំណូលមធ្យមកម្រិតខ្ពស់(ឆ្នាំ២០៣០) នាពេលខាងមុខ។
លោកបានបញ្ជាក់ថា ថវិកាឆ្នាំ២០២៦ ត្រូវបានរៀបចំឡើងយ៉ាងហ្មត់ចត់ ស្របតាមក្របខណ្ឌហិរញ្ញវត្ថុសាធារណៈរយៈពេលមធ្យមឆ្នាំ ២០២៦-២០២៨ និងឈរលើការថ្លឹងថ្លែងគ្រប់ជ្រុងជ្រោយ ដោយផ្អែកលើទិដ្ឋភាពធំៗចំនួន ៣ រួមមាន ទី១ គឺនិន្នាការថមថយនៃចំណូល, ទី២ គឺសម្ពាធនៃតម្រូវការចំណាយដែលមានការកើនឡើងហើយដែលមុខសញ្ញាខ្លះត្រូវមានកំណើនជាចាំបាច់ ពិសេសកិច្ចការការពារអធិបតេយ្យ និងបូរណភាពទឹកដី ប្រាក់សោធន កម្មវិធីគាំពារសង្គម បដិភាគនៃការវិនិយោគ សេវាបំណុល, និងទី៣ គឺការស្រកស្រុតនៃប្រាក់សន្សំរបស់រាជរដ្ឋាភិបាលដោយសារផលវិបាកនៃវិបត្តិជំងឺកូវីដ-១៩ និង វិបត្តិផ្សេងទៀត ជាបន្តបន្ទាប់ ហើយដែលមិនទាន់អាចស្តារឡើងវិញបាននៅឡើយ។
លោកបានអះអាងថា៖«ទោះបីជួបប្រទះនឹងបញ្ហាប្រឈមយ៉ាងណាក៏ដោយ គម្រោងថវិកាឆ្នាំ២០២៦ ត្រូវបានរៀបចំដោយមានតុល្យភាព ដោយមិនប្រើប្រាស់ប្រាក់សន្សំរបស់រាជរដ្ឋាភិបាល ព្រមទាំងធានាបាននូវចីរភាពស្របតាម «ជំហរគោលនយោបាយពង្រឹងស័ក្តិសិទ្ធិភាពថវិកា ដើម្បីទ្រទ្រង់ស្ថិរភាព និងកំណើន ផ្តោតការយកចិត្តទុកដាក់ជាពិសេសលើការពង្រឹងសមត្ថភាពការពារអធិបតេយ្យជាតិ និងបូរណភាពទឹកដី ការអភិវឌ្ឍមូលធនមនុស្ស ការកែទម្រង់រដ្ឋបាលសាធារណៈ និងការកែទម្រង់រចនាសម្ព័ន្ធ ដែលមានអភិបាលកិច្ចជាស្នូល»៕
