កម្ពុជា និងថៃ បានឯកភាពគ្នាលើការឈប់បាញ់ជាបន្ទាន់ ដែលមានប្រសិទ្ធភាពចាប់ពីម៉ោង១២ថ្ងៃត្រង់ ថ្ងៃទី២៧ ខែធ្នូ នេះ ដោយរាប់បញ្ចូលទាំងអាវុធគ្រប់ប្រភេទ រួមទាំងការបញ្ឈប់ការវាយប្រហារលើជនស៊ីវិល ឧបករណ៍ និងហេដ្ឋារចនាសម្ព័ន្ធស៊ីវិល និងគោលដៅយោធារបស់ភាគីទាំងពីរ នៅគ្រប់ករណី និងគ្រប់តំបន់។
ភាគីទាំងពីរត្រូវជៀសវាងការបាញ់ប្រហារដោយគ្មានការបង្កហេតុ ឬការរុលទៅមុខ ឬការចល័តទ័ពទៅកាន់ទីតាំង ឬកងទ័ពរបស់ភាគីម្ខាងទៀត។ កិច្ចព្រមព្រៀងនេះមិនត្រូវបំពានក្នុងកាលៈទេសៈណាមួយឡើយ។ នេះបើតាមសេចក្តីថ្លែងការណ៍រួមដែលបានចុះហត្ថលេខាដោយរដ្ឋមន្ត្រីក្រសួងការពារជាតិ លោក ទៀ សីហា និងសមភាគីថៃ លោក ណាតាផុន ណាកផានិច នៅក្នុងកិច្ចប្រជុំពិសេសនៃគណៈកម្មាធិការព្រំដែនទូទៅ (GBC)នៅព្រឹកនេះ។
សេចក្តីថ្លែងការណ៍បានបញ្ជាក់ថា៖ «ភាគីទាំងពីរយល់ព្រមរក្សាទីតាំងកងទ័ពបច្ចុប្បន្ន ដោយមិនមានការផ្លាស់ទីបន្ថែមទៀតឡើយ។ មិនត្រូវមានការចល័តកងទ័ព រួមទាំងការល្បាតទៅកាន់ទីតាំងរបស់ភាគីម្ខាងទៀតនោះទេ»។
យោងតាមកិច្ចព្រមព្រៀងនេះ ភាគីទាំងពីរយល់ព្រមអនុញ្ញាតឱ្យជនស៊ីវិលដែលរស់នៅក្នុងតំបន់ព្រំដែនដែលរងផលប៉ះពាល់ អាចវិលត្រឡប់មកវិញឱ្យបានឆាប់បំផុត ដោយគ្មានការរារាំង និងប្រកបដោយសុវត្ថិភាព និងសេចក្តីថ្លៃថ្នូរ ទៅកាន់លំនៅឋាន និងការប្រកបរបរចិញ្ចឹមជីវិតជាធម្មតារបស់ពួកគេ នៅក្នុងតំបន់ដែលស្ថិតក្នុងទឹកដីរបស់ខ្លួន។
ភាគីទាំងពីរក៏បានឯកភាពគ្នាជៀសវាងការចូលទៅក្នុងដែនអាកាស និងទឹកដី ឬទីតាំងរបស់ភាគីម្ខាងទៀត ចាប់តាំងពីការឈប់បាញ់ចូលជាធរមាន។ ភាគីទាំងពីរយល់ព្រមជៀសវាងការសាងសង់ ឬការពង្រឹងហេដ្ឋារចនាសម្ព័ន្ធយោធា ឬកំពែងការពារហួសពីទឹកដីរបស់ខ្លួន។ ភាគីទាំងពីរយល់ព្រមមិនប្រើប្រាស់កម្លាំងគ្រប់ប្រភេទប្រឆាំងនឹងជនស៊ីវិល និងវត្ថុស៊ីវិលក្នុងគ្រប់កាលៈទេសៈទាំងអស់។
សេចក្តីថ្លែងការណ៍បានបន្ថែមថា៖ «ក្នុងស្មារតីនៃសេចក្តីថ្លែងការណ៍រួមទីក្រុងគូឡាឡាំពួ ចុះថ្ងៃទី២៦ ខែតុលា ឆ្នាំ២០២៥ ទាហានកម្ពុជាចំនួន ១៨នាក់ នឹងត្រូវបញ្ជូនត្រឡប់មកកម្ពុជាវិញ បន្ទាប់ពីការឈប់បាញ់ត្រូវបានអនុវត្តយ៉ាងពេញលេញរយៈពេល ៧២ម៉ោង»។
ក្រុមអ្នកសង្កេតការណ៍អាស៊ាន (AOT) ដើតួនាទីយ៉ាងសំខាន់ក្នុងការតាមដានការឈប់បាញ់នេះ និងការអនុវត្តដោយភាគីទាំងពីរ។
ទោះបីជាសេចក្តីថ្លែងការណ៍បានបញ្ជាក់ថា ភាគីទាំងពីរយល់ព្រមរក្សាការដាក់ពង្រាយកងទ័ពបច្ចុប្បន្នដោយមិនមានការផ្លាស់ទីបន្ថែមទៀតក៏ដោយ ប៉ុន្តែការវាស់វែង និងការបោះបង្គោលព្រំដែននឹងនៅតែបន្ត។ នេះបើតាមលោក ទៀ សីហា ដែលបានថ្លែងនៅក្នុងសន្និសីទសារព័ត៌មានក្រោយពេលចុះហត្ថលេខាលើបទឈប់បាញ់។
គិតត្រឹមថ្ងៃទី២៧ ខែធ្នូ នេះ មានរយៈពេល ២០ថ្ងៃហើយ ចាប់តាំងពីការប៉ះទង្គិចគ្នាបានផ្ទុះឡើងវិញកាលពីថ្ងៃទី៧ ខែធ្នូ។ ចាប់តាំងពីពេលនោះមក ជនស៊ីវិលកម្ពុជាត្រូវបានសម្លាប់ដោយការបាញ់ផ្លោងរបស់ថៃ មានចំនួន ៣១នាក់ និងជិត ១០០នាក់ផ្សេងទៀតបានរងរបួស។ ប្រជាពលរដ្ឋជាង ៦០០.០០០នាក់ ត្រូវបានផ្លាស់ទីលំនៅ ក្លាយជាជនភៀសសឹក៕
