ភ្នំពេញ៖ ស្ដ្រីទីមួយ និងអង្គការមនុស្សធម៌កម្ពុជាអំពាវនាវរកជំនួយជាបន្ទាន់ និងពង្រីកបន្ថែមទៀត ខណៈការប៉ះទង្គិចគ្នាឡើងវិញតាមបណ្តោយព្រំដែនកម្ពុជា-ថៃ បានជំរុញឱ្យជនភៀសសឹកយ៉ាងច្រើន និងធ្វើឱ្យកុមារ ក៏ដូចជាគ្រួសាររាប់ម៉ឺននាក់ប្រឈមនឹងហានិភ័យកើនឡើង។
អាជ្ញាធរបានរាយការណ៍ថា គិតត្រឹមម៉ោង ៧:០០ ព្រឹក ថ្ងៃទី ១៦ ខែធ្នូ គ្រួសារសរុបចំនួន ១២៦,៥០៨ គ្រួសារ ដែលស្មើនឹងមនុស្ស ៤២២,៦៩៨ នាក់ ត្រូវបានជម្លៀសពីខេត្តចំនួន៧ រួមមានព្រះវិហារ ឧត្តរមានជ័យ បន្ទាយមានជ័យ បាត់ដំបន់ ពោធិ៍សាត់ កោះកុង និងសៀមរាប។
ក្នុងចំណោមវិបត្តិដែលកំពុងកើនឡើង ស្ដ្រីទីមួយ ពេជ ចន្ទមុន្នី បានអំពាវនាវឱ្យប្រជាពលរដ្ឋរួបរួមគ្នាជួយជនភៀសខ្លួន និងទាហាននៅសមរភូមិរហូតដល់ស្ថិរភាពត្រូវបានស្តារឡើងវិញ។
លោកស្រីបានថ្លែងក្នុងអំឡុងពេលលើកទឹកចិត្តក្រុម Eat More បន្តបេសកកម្មរបស់ខ្លួនថា៖ «យុវជន និងប្រជាពលរដ្ឋនៅសមរភូមិក្រោយរួមគ្នាជួយដល់វិរៈកងទ័ព និងជនភៀសសឹកជាប់ជានិច្ចរហូតដល់គ្រាលំបាកមួយនេះឆ្លងផុតដោយជោគជ័យ»។
សន្ទុះនៃការកើនឡើងជនភៀសសឹកក្នុងខែធ្នូ ឆ្នាំ ២០២៥ គឺមានចំនួនមិនធ្លាប់មានពីមុនមកសម្រាប់ប្រទេសកម្ពុជា។
អង្គការទស្សនៈពិភពលោកបានជួយដល់មនុស្សជាង ៤៤៦០០ នាក់ក្នុងទីតាំងជម្លៀសខ្លួនចំនួន ៣០ ចន្លោះថ្ងៃទី ១១ និង ១៤ ខែធ្នូ។ រូបថត សហការី
អង្គការទស្សនៈពិភពលោកកម្ពុជា បានឱ្យដឹងថា ការកើនឡើងជាបន្តបន្ទាប់នេះបានបង្ខំឱ្យជនស៊ីវិលភៀសខ្លួននៅទូទាំងខេត្តភាគពាយ័ព្យ និងភាគខាងលិច ដែលធ្វើឱ្យប៉ះពាល់ដល់ជម្រក ការផ្គត់ផ្គង់ស្បៀងអាហារ សេវាទឹក និងអនាម័យ និងការថែទាំសុខភាព។
យោងតាមអង្គការទស្សនៈពិភពលោកកម្ពុជា បានឱ្យដឹងថា៖ «កុមារកំពុងប្រឈមមុខនឹងភាពអាសន្នដែលមើលមិនឃើញ។ កុមារស្ថិតក្នុងចំណោមអ្នករងផលប៉ះពាល់ធ្ងន់ធ្ងរបំផុត។ ខណៈស្បៀងអាហារ និងជម្រកជាតម្រូវការបន្ទាន់ ផលប៉ះពាល់ដែលមើលមិនឃើញលើកុមារ របួសផ្លូវចិត្ត ការរំខានដល់ការរៀនសូត្រ និងការបាត់បង់ស្ថិរភាពកំពុងកើនឡើងយ៉ាងឆាប់រហ័ស»។
យោងតាមក្រសួងអប់រំ យុវជន និងកីឡា សាលារៀនចំនួន ១០៣៩ទីតាំង ត្រូវបានបិទគិតត្រឹមថ្ងៃទី ១៥ ខែធ្នូ ដែលរំខានដល់ការរៀនសូត្ររបស់សិស្សជាង ២៤២៨០០ នាក់។
ដោយសារជម្រកសុវត្ថិភាព និងទម្លាប់ប្រចាំថ្ងៃត្រូវបានបាត់បង់ អង្គការបានឱ្យដឹងថា កុមាររាប់ម៉ឺនពាន់នាក់ឥឡូវនេះត្រូវការការការពារ ការគាំទ្រផ្លូវចិត្តសង្គម ការបន្តការសិក្សា និងការថែទាំសុខភាពផ្លូវចិត្តជាបន្ទាន់។
ុុំសាលារៀនចំនួន ១០៣៩ទីតាំង ត្រូវបានបិទគិតត្រឹមថ្ងៃទី ១៥ ខែធ្នូ ដែលរំខានដល់ការរៀនសូត្ររបស់សិស្សជាង ២៤២៨០០ នាក់។ រូបថត ហុង រស្មី
រដ្ឋាភិបាល អាជ្ញាធរមូលដ្ឋាន និងសប្បុរសជនបានផ្តល់ជំនួយ រួមទាំងជម្រកបណ្តោះអាសន្ន អាហារ ទឹក ឧបករណ៍អនាម័យ និងសេវាសុខភាពជាមូលដ្ឋាន។
អង្គការទស្សនៈពិភពលោកកម្ពុជា បានបន្ដថា ទំហំនៃភៀសសឹកកំពុងតែមានចំនួនច្រើន ដែលនាំឱ្យជម្រក សន្តិសុខស្បៀងអាហារ ទឹក និងអនាម័យ និងសេវាសុខភាពមិនពេញលេញ។
វាបានធ្វើឱ្យប្រតិបត្តិការសង្គ្រោះបន្ទាន់នៅក្នុងខេត្តដែលរងផលប៉ះពាល់ រួមមាន ព្រះវិហារ បន្ទាយមានជ័យ សៀមរាប បាត់ដំបន់ និងឧត្តរមានជ័យ។
លោក ជេនេស អ៊ីម៉ានូអ៊ែល នាយកប្រចាំប្រទេសនៃអង្គការទស្សនៈពិភពលោកអន្តរជាតិ ប្រចាំនៅកម្ពុជា បានឱ្យដឹងថា ៖ «គ្រួសារដែលត្រូវបានបង្ខំឱ្យផ្លាស់ទីចេញពីផ្ទះសម្បែងរបស់ពួកគេកំពុងប្រឈមមុខនឹងតម្រូវការបន្ទាន់ និងជាបន្តបន្ទាប់»។
ុំលោកបន្ដថា៖ «អង្គការទស្សនៈពិភពលោក កំពុងពង្រីកវិសាលាយ៉ាងសកម្មនូវការការពារកុមារ អនាម័យ និងជំនួយសង្គ្រោះជីវិត ប៉ុន្តែតម្រូវការនៅតែបន្តកើនឡើង។ ការគាំទ្រទាន់ពេលវេលា និងអាចបត់បែនបានពីដៃគូ និងសប្បុរសជន ពិតជាមានសារៈសំខាន់ណាស់ក្នុងការការពារកុមារ និងជួយសង្គ្រោះជីវិតរបស់ពួកគេ»។
ទំហំនៃភៀសសឹកកំពុងតែមានចំនួនច្រើន ដែលនាំឱ្យជម្រក សន្តិសុខស្បៀងអាហារ ទឹក និងអនាម័យ និងសេវាសុខភាពមិនពេញលេញ។ រូបថត ហុង រស្មី
ចន្លោះពីថ្ងៃទី ១១ ដល់ថ្ងៃទី ១៤ ខែធ្នូ ក្រុមការងាររបស់អង្គការបានជួយដល់មនុស្សជាង ៤៤៦០០នាក់នៅទូទាំងទីតាំងជម្លៀសចំនួន ៣០ ដោយផ្តល់សេវាកម្មការពារកុមារ ការគាំទ្រទឹក និងអនាម័យបន្ទាន់ និងជំនួយមិនមែនអាហារ។
អង្គការនេះបានបង្កើតកន្លែងសម្រាប់កុមារចំនួន ៣០ ដំឡើងបង្គន់ចំនួន ៣៧ និងធុងទឹកចំនួន ១៩ ចែកចាយឧបករណ៍មិនមែនអាហារចំនួន ១៥៦០ និងបានផ្តល់ការបណ្តុះបណ្តាលអំពីការយល់ដឹងផ្លូវចិត្តដល់មនុស្សជាង ១២០០ នាក់។
អង្គការមានគម្រោងពង្រីកការឆ្លើយតប ដើម្បីទៅដល់មនុស្សជាង ២២ម៉ឺននាក់ ខណៈដែលតម្រូវការនៅតែបន្តកើនឡើង៕