អ្នកជំនាញក្នុងឧស្សាហកម្មដឹកជញ្ជូន បាននិយាយថា បើទោះបីជាឈូងសមុទ្រនៅជាប់ប្រទេសកម្ពុជាត្រូវបានគេហៅថា ឈូងសមុទ្រថៃ ប៉ុន្តែគឺកម្ពុជាមានសិទ្ធិស្របច្បាប់ក្នុងការប្រើប្រាស់ផ្លូវទឹកនេះ ព្រោះវាជាច្រកសមុទ្រដែលត្រូវបានប្រើរួមគ្នាជាមួយប្រទេសជាច្រើនដូចជា កម្ពុជា ម៉ាឡេស៊ី វៀតណាម និងថៃ។
ការលើកឡើងនេះ គឺបន្ទាប់ពីយោធាថៃកាលពីថ្ងៃទី១៤ ខែធ្នូ បានស្នើក្រុមប្រឹក្សាសន្តិសុខជាតិរបស់ខ្លួន ឱ្យទប់ស្កាត់ការផ្គត់ផ្គង់ប្រេង និងសម្ភារយោធាមកកាន់ប្រទេសកម្ពុជា តាមរយៈឈូងសមុទ្រថៃ។
ប្រភពពីសារព័ត៌មានថៃកាលពីថ្ងៃទី១៤ ខែធ្នូ បានឱ្យដឹងថា យោធាថៃបានដាក់សំណើជាបន្ទាន់ទៅកាន់ ក្រុមប្រឹក្សាសន្តិសុខជាតិ(NSC) ដើម្បីបិទឈូងសមុទ្រចំពោះការផ្គត់ផ្គង់ប្រេង និងសម្ភារយោធាមកកាន់ប្រទេសកម្ពុជាដឹកឆ្លងកាត់ឈូកសមុទ្រថៃ។
ប្រធានសមាគមពាណិជ្ជករដឹកជញ្ជូនទំនិញ និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានប្រាប់ភ្នំពេញប៉ុស្តិ៍ក្នុងថ្ងៃទី១៦ ខែធ្នូថា ជាការគោលការណ៍ច្បាប់ ឈូងសមុទ្រថៃ គឺគ្រាន់តែជាឈ្មោះប៉ុណ្ណោះ ប៉ុន្តែការប្រើប្រាស់ច្រកសមុទ្រតាមច្បាប់អន្តរជាតិគឺត្រូវប្រើរួមគ្នាដែលមានប្រទេសកម្ពុជា ម៉ាឡេស៊ី វៀតណាម និងថៃ។ ចំពោះ ការលើកឡើងរបស់ភាគីថៃនេះ គឺគ្រាន់តែជាសំណើប៉ុណ្ណោះ ដោយមិនទាន់មានសេចក្តីសម្រេចជាផ្លូវការនៅឡើយទេ។
លោកបានបន្ថែមថា សព្វថ្ងៃ ប្រទេសកម្ពុជាអាចដឹកជញ្ជូនទំនិញចេញ-ចូល ដោយសេរីស្របតាមច្បាប់ទៅកាន់ប្រទេសនានាលើពិភពលោកតាមច្រកសំខាន់ៗពីរគឺ តាមរយៈកំពង់ផែស្វយ័តក្រុងព្រះសីហនុ និងតាមរយៈកំពង់ផែស្វយ័តភ្នំពេញទៅកាន់កំពង់ផែប្រទេសវៀតណាម មុនពេលបន្តដំណើរទៅសមុទ្រចិនភាគខាងត្បូង។
លោកបានថ្លែងថា៖«ការដឹកជញ្ជូនតាមផ្លូវទឹកនៅពេលនេះ គឺកម្ពុជាមានការដឹកជញ្ជូនទំនិញតាមច្រកពីរដែលសំខាន់ៗ គឺតាមរយៈកំពង់ផែស្វយ័តក្រុងព្រះសីហនុទៅកាន់បណ្តាប្រទេសផ្សេងៗ និងការដឹកជញ្ជូនតាមរយៈកំពង់ផែស្វ័យភ្នំពេញឆ្លងកាត់ទៅវៀតណាម មុននឹងបន្តទៅកាន់បណ្តាប្រទេសផ្សេងៗទៀតដោយសារប្រទេសវៀតណាម មានដែនសមុទ្រដោយអាចទៅខាងសមុទ្រចិនខាងត្បូង រួចចូលទៅសមុទ្រអន្តរជាតិបាន។
លោកប្រាប់ទៀតថា សម្រាប់ការដឹកជញ្ជូនផ្លូវទឹកនាពេលនេះ(ថ្ងៃទី១៦ ខែធ្នូ) គឺមានសភាពធម្មតា។
អ្នកនាំពាក្យក្រសួងសាធារណការ និងដឹកជញ្ជូនកម្ពុជា លោក ផន រឹម កាលពីថ្ងៃទី១៥ ខែធ្នូ បានសរសេរនៅលើបណ្តាញសង្គមផ្ទាល់ខ្លួនថា ប៉ុន្មានថ្ងៃមកនេះឃើញមានកាសែតថៃដកស្រង់សំដីមន្ត្រីជាន់ខ្ពស់ថៃពាក់ព័ន្ធការព្រមានបិទ រាំងខ្ទប់ ដំណើរនាវាចរដឹកទំនិញតាមផ្លូវសមុទ្រឆ្លងកាត់ឈូងសមុទ្រថៃចូលមកកាន់ប្រទេសកម្ពុជា ដោយពួកទាំងនោះយកលេសផ្សេងៗមកសំអាងក្នុងគោលដៅចិញ្ចឹមមហិច្ឆតាឈ្លានពាន បង្កសង្គ្រាម ពង្រីកជម្លោះជាមួយកម្ពុជា។
លោកអះអាងថា៖«កម្ពុជាមិនមែនក្មេងបៀមដៃ។ កម្ពុជាបានគិតគូររឿងនេះ និងបានត្រៀមលក្ខណៈរួចរាល់ឆ្លើយតបគ្រប់ទម្រង់ចំពោះមហិច្ឆតាបង្កសង្គ្រាមពង្រីកទំនាស់របស់ថៃ»។ លោកបានបន្ថែមថា៖«កម្ពុជាមានច្រកដឹកទំនិញសមុទ្រចម្រុះ និងប្រទាក់ក្រឡាដែលមានសក្តានុពល និងធានាបាននូវឯករាជ្យភាព និងម្ចាស់ការលើគ្រប់ទម្រង់ ស្របតាមច្បាប់ និងវិធានអន្តរជាតិ»៕