ប្រទេសថៃបានរំលាយសភាហើយ បន្ទាប់ពីមានការប៉ះទង្គិចគ្នាជាថ្មីអស់រយៈពេលជិតមួយសប្តាហ៍នៅតាមបណ្តោយព្រំដែនជាមួយកម្ពុជា ដោយការបោះឆ្នោតសកលនឹងត្រូវធ្វើឡើងក្នុងរយៈពេលចន្លោះពី ៤៥ ទៅ ៦០ថ្ងៃ។
នៅក្នុងព្រះរាជក្រឹត្យដែលបានចេញផ្សាយកាលពីថ្ងៃសុក្រ នាយករដ្ឋមន្ត្រីថៃ អនុទីន ឆានវីរៈគុល (Anutin Charnvirakul) បានលើកឡើងអំពីជម្លោះព្រំដែនដែលបណ្តាលឱ្យមានមនុស្សស្លាប់ និងបញ្ហាប្រឈមផ្សេងៗទៀតដែលរដ្ឋាភិបាលសំឡេងភាគតិចរបស់លោកបានតស៊ូដោះស្រាយ ចាប់តាំងពីចូលកាន់តំណែងកាលពីបីខែមុន។
លោកថ្លែងថា៖ «ដំណោះស្រាយដ៏សមស្របគឺការរំលាយសភា... ដែលជាវិធីមួយដើម្បីប្រគល់អំណាចនយោបាយជូនប្រជាជនវិញ»។
លោក អនុទី ដែលជាសេដ្ឋីជំនួញម្នាក់ គឺជានាយករដ្ឋមន្ត្រីទីបីរបស់ប្រទេសថៃចាប់តាំងពីខែសីហា ឆ្នាំ២០២៣ មក។ នៅពេលដែលលោកចូលកាន់អំណាចក្នុងខែកញ្ញា លោកបាននិយាយថាលោកនឹងរំលាយសភានៅចុងខែមករា។
ទោះជាយ៉ាងណាក៏ដោយ ដោយសារលោកកំពុងប្រឈមមុខនឹងការបោះឆ្នោតមិនទុកចិត្តដែលនឹងមកដល់ឆាប់ៗនេះ លោក អនុទីន បានសម្រេចចិត្តរៀបចំការបោះឆ្នោតមុនកាលកំណត់។
លោកក៏រងការរិះគន់ផងដែរ ចំពោះការដោះស្រាយបញ្ហាទឹកជំនន់ដ៏ធ្ងន់ធ្ងរនៅភាគខាងត្បូងប្រទេសថៃកាលពីខែមុន៕