រដ្ឋមន្ត្រីការពារជាតិកម្ពុជា រំពឹងថា ភាគីថៃ នឹងអនុវត្តតាមស្មារតីនៃកិច្ចប្រជុំពិសេស GBC ដែលភាគីទាំងពីរយល់ព្រមឈប់បាញ់ចាប់ពីថ្ងៃត្រង់ ថ្ងៃទី២៧ ខែធ្នូ និងដោះលែងទាហានកម្ពុជា ១៨រូប ក្រោយការអនុវត្តវិធានការនេះបាន ៧២ម៉ោង។
លោក ទៀ សីហា រដ្ឋមន្ត្រីការពារជាតិកម្ពុជា បានបង្ហោះលើបណ្ដាញសង្គមថា ក្រោយបទឈប់បាញ់ត្រូវបានអនុវត្តដោយពេញលេញ រយៈពេល៧២ម៉ោង យោធិនកម្ពុជា១៨ រូបនឹងត្រូវដោះលែង ត្រលប់មកកម្ពុជាវិញ ស្របតាមស្មារតីនៃសេចក្តីថ្លែងការណ៍រួមទីក្រុងគួឡា ឡាំពួ ដែលបានចុះហត្ថលេខានៅថ្ងៃទី២៦ ខែតុលា ឆ្នាំ២០២៥។
លោកថ្លែងថា៖ «ខ្ញុំសង្ឃឹមថាភាគីថៃ នឹងអនុវត្តតាមស្មារតីនៃកិច្ចប្រជុំពិសេសនេះប្រកបដោយតម្លាភាព ស្មោះត្រង់ គោរពបទឈប់បាញ់ដើម្បីសុខសន្តិភាពរបស់កងទ័ព និងប្រជាជននៃប្រទេសទាំងពីរ។ យើងត្រូវធ្វើការរួមគ្នាដើម្បីទទួលបាននូវជំនឿទុកចិត្ត និងការវិលទៅប្រក្រតីភាពឡើងវិញ»។
លោករំពឹងដែរថា ឆ្នាំ២០២៦ខាងមុខនេះ នឹងពោរពេញទៅដោយសុខសន្តិភាព សុវត្ថិភាព និងសេចក្តីសុខជូនទៅដល់ប្រជាពលរដ្ឋទាំងកម្ពុជា និងថៃ កើតចេញពីការគោរពបទឈប់បាញ់គ្នានេះ។
កាលពីថ្ងៃទី២៧ ធ្នូ មានមតិយល់ច្រឡំថា បទឈប់បាញ់មានសម្រាប់តែរយៈពេល ៧២ម៉ោង។ ការណ៍នេះត្រូវបានរដ្ឋមន្ត្រីក្រសួងព័ត៌មាន លោក នេត្រ ភក្ត្រា ពន្យល់ថា បទឈប់បាញ់គឺមានរយៈពេលយូរឈានទៅរកសន្តិភាពពិតប្រាដក ចំណែកលក្ខខណ្ឌ ៧២ម៉ោង គឺសម្រាប់តែការដោះលែងទាហានកម្ពុជា ១៨ រូបប៉ុណ្ណោះ៕