ការវាយប្រហាររបស់ថៃមានភាពកាន់តែកំរោល ទាំងតាមផ្លូវអាកាស និងប្រើកាំភ្លើងធំ។ នៅថ្ងៃទី២៦ នេះ យន្តហោះចម្បាំងថៃ បានទម្លាក់គ្រាប់បែកជិត ៥០គ្រាប់ ទៅលើតំបន់ចំនួនពីរ គឺនៅឃុំអូរបីជាន់ ខេត្តបន្ទាយមានជ័យ និងនៅស្រុកស្រីស្នំ និងស្រុកវ៉ារិន ខេត្តសៀមរាប។ នេះបើតាមក្រសួងការពារជាតិ និងប្រភពពីពលរដ្ឋក្នុងមូលដ្ឋាន។
ក្រសួងការពារជាតិបានបញ្ជាក់ថា នៅមុនថ្ងៃត្រង់បន្តិច យន្តហោះចម្បាំងថៃបានទម្លាក់គ្រាប់បែក ៤០គ្រាប់ លើភូមិជោគជ័យ ខណៈដែលពលរដ្ឋម្នាក់នៅខេត្តសៀមរាប បានប្រាប់ភ្នំពេញ ប៉ុស្តិ៍ ថា យន្តហោះចម្បាំងថៃបានទម្លាក់គ្រាប់បែកប្រមាណ ១០គ្រាប់ នៅស្រុកស្រីស្នំ។ បន្ថែមពីលើនេះ ការវាយប្រហារក៏កើតមាននៅតំបន់អូរកូនតឹង ឃុំស្រែណូយ ស្រុកវ៉ារិន ខេត្តសៀមរាប។
បន្ថែមលើការប្រើយន្តហោះ ក្រសួងបានបន្ថែមថា ការបាញ់ផ្លោងរបស់ថៃបានកើនឡើងយ៉ាងខ្លាំងនៅក្នុងឃុំអូរបីជាន់ ដោយមានការបាញ់គ្រាប់កាំភ្លើងធំសរុបចំនួន ៣៦០គ្រាប់ ចូលទៅក្នុងភូមិជោគជ័យ និងភូមិព្រៃចាន់ ចាប់ពីម៉ោង ៧ព្រឹក ដល់ម៉ោង ២:៣០នាទីរសៀល។
ក្រសួងការពារជាតបានថ្លែងថា៖ «ទង្វើដ៏ឃោរឃៅខាងលើ គឺជាការវាយប្រហារដោយមិនរើសមុខរបស់កងទ័ពថៃ និងជាការរំលោភបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ»។
ក្រសួងបន្តថា៖ «ក្រោមការវាយប្រហារដោយកាំភ្លើងធំ តូច និងការទម្លាក់គ្រាប់បែករាប់មិនអស់ពីយន្តហោះចម្បាំងរបស់កងទ័ពឈ្លានពានថៃ កងកម្លាំងប្រដាប់អាវុធដ៏អង់អាចក្លាហានរបស់កម្ពុជា បានប្រើប្រាស់សិទ្ធិការពារខ្លួន និងបន្តឈរជើងយ៉ាងរឹងមាំ ដើម្បីការពារទឹកដី និងកិត្តិយសរបស់ជាតិកម្ពុជា»។
ការបង្កើនការវាយប្រហាររបស់ពួកគេ ធ្វើឡើងមួយថ្ងៃមុនកិច្ចប្រជុំពិសេសគណៈកម្មាធិការព្រំដែនទូទៅ GBC នៅថ្ងៃទី២៧ ខែធ្នូ រវាងរដ្ឋមន្ត្រីការពារជាតិនៃប្រទេសទាំងពីរ៕
