គម្រោងចំនួន ១៣៤ ក្នុងចំណោមគម្រោងសរុប ៤១២ ដែលរាជរដ្ឋាភិបាលផ្តល់អាទិភាពឱ្យស្ថិតក្រោម«កម្មវិធីពិសេសជំរុញការវិនិយោគក្នុងខេត្តព្រះសីហនុ» បញ្ចប់ការសាងសង់ ឬជួសជុលរួចរាល់ហើយ ខណៈចំនួន ១១៦ នៅមិនទាន់មានសកម្មភាពសាងសង់ ឬជួសជុលអ្វីទំងអស់។
នេះបើយោងតាមខ្លឹមសារនៃកិច្ចប្រជុំក្រុមការងារជំរុញការវិនិយោគក្នុងខេត្តព្រះសីហនុ (The Preah Sihanouk Province Investment Promotion Working Group) កាលពីថ្ងៃទី ២៥ ខែ ធ្នូ ឆ្នាំ ២០២៥ ដែលដឹកនាំដោយ លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ។ ពិធីនេះក៏មានការចូលរួមពីលោក ម៉ាង ស៊ីណេត អភិបាលខេត្តព្រះសីហនុ រួមទាំងតំណាងក្រសួង-ស្ថាប័នពាក់ព័ន្ធជាច្រើនទៀត។
ជាកិច្ចចាប់ផ្តើមលោក សាហ៊ីប បានលើកឡើងថា រយៈពេល ២ឆ្នាំ គឺឆ្នាំ២០២៤-២០២៥ ក្រុមការងារបានសម្រេចជាគោលការណ៍ផ្ដល់ការលើកទឹកចិត្ត ការអនុគ្រោះ ការសម្រួលនីតិវិធី និងការសម្របសម្រួលដោះស្រាយវិវាទចំនួន ៤១២ គម្រោង ក្រោមទុនវិនិយោគប្រមាណ ៧,៩៧ ពាន់លានដុល្លារ ដោយអាចបង្កើតការងារបានប្រមាណ ៥២ ពាន់កន្លែង។
លោកបន្តថា សម្រាប់ក្នុងឆ្នាំ២០២៥ ក្រុមការងារបានសម្រេចផ្តល់គោលការណ៍លើកទឹកចិត្តពិសេសចំនួន ១៩៩ គម្រោង ស្មើនឹង ១៣៣% លើសគោលដៅសូចនាករសមិទ្ធកម្មដែលបានកំណត់ត្រឹម ១៥០ គម្រោង ដែលក្នុងនោះគម្រោងពាក់ព័ន្ធនឹងអគារកំពុងជាប់គាំងចំនួន ៩២ គម្រោង គម្រោងគម្រោងថ្មីចំនួន ៩០ គម្រោង ការពង្រីកគម្រោងចំនួន ៩ គម្រោង និងគម្រោងវិនិយោគ/ធុរកិច្ចដែលមានស្រាប់ចំនួន ៨គម្រោង ដោយគ្របដណ្តប់លើវិស័យអចលនទ្រព្យ ឧស្សាហកម្ម ទេសចរណ៍ និងអប់រំ ជាដើម។
លោកបានថ្លែងថា៖«សម្រាប់រយៈពេល ២ឆ្នាំ(២០២៤-២០២៥) ក្នុងចំណោម ៤១២ គម្រោងដែលបានទទួលគោលការណ៍លើកទឹកចិត្តពិសេស គឺគម្រោងដែលបញ្ចប់ការសាងសង់ ជួសជុល និង/ឬ កែលម្អរួចរាល់មានចំនួន ១៣៤ គម្រោង ស្មើនឹង ៣៣%។ សម្រាប់គម្រោងដែលកំពុងអនុវត្តការសាងសង់ ជួសជុល និង/ឬកែលម្អ មាន ១៦២ គម្រោង ស្មើនឹង ៣៩% និង គម្រោងដែលមិនទាន់ចាប់ផ្ដើមដំណើរការសាងសង់ ជួសជុល និង/ឬ កែលម្អ មាន ១១៦ គម្រោង ស្មើនឹង ២៨%»។
លោកបន្ថែមថា ផ្អែកលើកិច្ចខិតខំប្រឹងប្រែង និងលទ្ធផលសម្រេចបានទំាងនេះ រាជរដ្ឋាភិបាលបានសម្រេចបន្តអនុវត្តកម្មវិធីពិសេសនេះរយៈពេល ២ឆ្នាំបន្ថែមទៀត រហូតដល់ដំណាច់ឆ្នាំ២០២៧ ដោយរក្សាវិធានការដដែល និងបន្ថែមវិធានការចំនួន ៤ ទៀតរួមមាន ១. សម្របសម្រួល និងជំរុញការវិនិយោគក្នុងស្រុក ២. សម្របសម្រួលការបណ្តុះបណ្តាលជំនាញដល់វិនិយោគិន ធុរជន និយោជិត និងកម្មករ ៣. ជំរុញការប្រើប្រាស់កម្លាំងពលកម្មក្នុងស្រុក និងការផ្ទេរជំនាញ និងបច្ចេកវិទ្យា និង ៤. ជំរុញការប្រើប្រាស់ធាតុផ្សំ និងទំនិញដែលផលិតក្នុងស្រុកនៅតាមសហគ្រាស និងរោងចក្រក្នុងខេត្តព្រះសីហនុ ដោយសហការជាមួយក្រសួង-ស្ថាប័នមានសមត្ថកិច្ច និង រដ្ឋបាលខេត្តព្រះសីហនុ។
ក្នុងឱកាសនោះផងដែរ លោក សាហ៊ីប ក៏បានដាក់ចេញទិសដៅការងារបន្តសម្រាប់ឆ្នាំ២០២៦ និងឆ្នាំ២០២៧ សម្រាប់ក្រុមការងារដើម្បីអនុវត្ត ព្រមទាំងណែនាំឱ្យលេខាធិការដ្ឋានក្រុមការងារបន្តកិច្ចខិតខំប្រឹងប្រែងបំពេញភារកិច្ច និងយកចិត្តទុកដាក់ខ្ពស់ក្នុងការសហការ ជាមួយក្រសួង-ស្ថាប័ន និងអាជ្ញាធរមូលដ្ឋានផងដែរ។
ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រះសីហនុ លោក អ៊ឹម សេងហួ (Senghour Im) បានប្រាប់ភ្នំពេញប៉ុស្តិ៍ថា តាមរយៈកិច្ចខិតខំរបស់អាជ្ញាធរខេត្ត បច្ចុប្បន្នខេត្តព្រះសីហនុ គឺមានសន្តិសុខ សណ្តាប់ធ្នាប់ និងបរិយាកាសវិនិយោគល្អប្រសើរ ដែលបានទាក់ទាញការវិនិយោគ និងភ្ញៀវទេសចរក្នុងចំនួនច្រើន និងច្រើនជាតិសាសន៍ឱ្យចូលមកវិនិយោគ និងកម្សាន្ត។
លោកបានថ្លែងថា៖«ខេត្តព្រះសីហនុកំពុងវិវឌ្ឍន៍ខ្លួនក្លាយជាមជ្ឈមណ្ឌលនៃការអភិវឌ្ឍពហុបំណង និងជាប៉ូលសេដ្ឋកិច្ចដ៏សំខាន់របស់កម្ពុជា»៕
