យោធាថៃបន្តបាញ់មកលើកម្ពុជា ដោយប្រើគ្រាប់បែកចង្កោម ដែលការបាញ់ចុងក្រោយធ្វើឡើងនៅថ្ងៃទី២៣ ធ្នូនេះនិងម្សិលមិញ។ នេះបើតាមលោក ហេង រតនា អគ្គនាយកអង្គភាពកម្ចាត់មីនស៊ីម៉ាក់។
លោកថ្លែងនៅលើបណ្ដាញសង្គមនៅថ្ងៃនេះថា៖ «នៅថ្ងៃទី២២-២៣ ខែធ្នូ ឆ្នាំ២០២៥នេះ ពួកទាហានសៀមបន្តបាញ់គ្រាប់បែកចង្កោមប្រភេទ M46 តាមរយៈគ្រាប់កាំភ្លើងធំ១៥៥មម ចូលបូរណភាពទឹកដីនៃព្រះរាជាណាចក្រកម្ពុជា។
លោកបន្តថា៖ «វាជាទង្វើរំលោភច្បាប់អនុសញ្ញាអន្តរជាតិអូស្លូ ហាមឃាត់ការប្រើប្រាស់គ្រាប់បែកចង្កោមយ៉ាងធ្ងន់ធ្ងរមួយទៅហើយ បន្ថែមលើនេះ ការបាញ់ប្រហារនេះមកលើភូមិឋានផ្ទះសំបែងប្រជាពលរដ្ឋដែលទង្វើនេះកាន់តែរំលោភបំពាន់លើច្បាប់អន្តរជាតិមួយចំនួនបន្ថែមទៀត»។
លោក ហេង រតនា បានបង្ហោះសារនេះជាមួយនឹងរូបភាពនៃគ្រាប់កាំភ្លើងធំ ១៥៥មម និងរណ្ដៅគ្រាប់បែក ប៉ុន្តែមិនបានបញ្ជាក់ថាកើតហេតុនៅខេត្តណាទេ។
កាលពីកន្លងទៅ ក្រសួងការពារជាតិបានបង្ហាញថា គ្រាប់បែកចង្កោមត្រូវបានបាញ់ជាច្រើនគ្រាប់នៅតំបន់ក្បែរប្រាសាទព្រះវិហារ។ អាជ្ញាធរមីនក៏បានរាយការណ៍អំពីបញ្ហាគ្រាប់បែកចង្កោមនេះទៅប្រទេសឡាវ ដែលជាប្រធានអនុសញ្ញាប្រឆាំងនឹងការប្រើប្រាស់គ្រាប់បែកចង្កោម។
គិតមកដល់រសៀលថ្ងៃទី២៣ ខែធ្នូនេះ យោធាថៃមិនទាន់ឈប់បាញ់ចូលដែនអធិបតេយ្យកម្ពុជានោះទេ។ នៅម៉ោង ១៣:៣៧នាទី យោធាថៃបានបន្តបាញ់ផ្លោងចំនួន ៤គ្រាប់ចូលទីប្រជុំជនដែលមានប្រជាជនរស់នៅច្រើនកុះករ ក្នុងភូមិសាស្ត្រភូមិស្ទឹងបត់ សង្កាត់ផ្សារកណ្តាល ខេត្តបន្ទាយមានជ័យ។ នេះបើតាមក្រសួងការពារជាត