គោលដៅតែមួយគត់របស់កម្ពុជាក្នុងការចូលទៅកាន់កិច្ចប្រជុំរដ្ឋមន្ត្រីការបរទេសអាស៊ាន កាលពីថ្ងៃទី២២ ធ្នូ គឺបញ្ឈប់នូវទុក្ខវេទនារបស់ប្រជាជន និងបញ្ឈប់ការប្រយុទ្ធដែលបានបំផ្លិចបំផ្លាញទ្រព្យសម្បត្តិប្រជាជន។ នេះជាការលើកឡើងរបស់លោក ប្រាក់សុខុន រដ្ឋមន្ត្រីការបរទេសកម្ពុជា។
ថ្លែងប្រាប់ទូរទស្សន៍ជាតិនៅថ្ងៃទី២២ ធ្នូ នៅពេលត្រឡប់ពីកិច្ចប្រជុំពិសេសរដ្ឋមន្ត្រីការបរទេសអាស៊ាន លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ បានលើកឡើងថា លោកបានលើកឡើងនូវចំណុចចំនួន ៣ ដែលកម្ពុជាចង់បាន។
លោកថា៖ «ខ្ញុំបានអំពាវនាវឲ្យមានការឈប់បាញ់គ្នា ការឈប់ប្រយុទ្ធជាបន្ទាន់ ហើយខ្ញុំបានលើកឡើងថា បើសិនមានការឯកភាពអីចឹង ខ្ញុំបានសង្កត់ធ្ងន់ថា ភាគីទាំងពីរអាចឯកភាពគ្នាចាប់ផ្ដើមបញ្ឈប់ការប្រទូស្តសរាយគ្នានេះចាប់ពីម៉ោង ១០យប់ (២២ធ្នូ)។ បទឈប់បាញ់ទាល់តែឈប់ទាំងសងខាង បង្ខំឲ្យភាគីតែម្ខាងឈប់បាញ់ វាអត់កើត»។
ចំណុចទី២ លោកស្នើឲ្យអង្គប្រជុំជំរុញឲ្យភាគីទាំងពីរដកកម្លាំងយោធាទៅកាន់ទីតាំងដើមរៀងៗខ្លួនដូចមុនជម្លោះកើតឡើង ហើយលោកស្នើឲ្យប្រជាពលរដ្ឋអាចត្រូលប់ទៅគេហដ្ឋានរបស់ខ្លួនជាធម្មតាវិញ។ ចំណែកសំណូមពរទី៣ គឺការដោះស្រាយជម្លោះដោយសន្តិវិធី មិនប្រើកម្លាំង ដោយគោរពច្បាប់ និងអនុសញ្ញា និងសន្ធិសញ្ញាដែលមានស្រាប់។ លោកក៏បានស្នើឲ្យដោះលែងទាហានកម្ពុជា ១៨នាក់ផងដែរ។
ជាជំហានទៅមុខទៀត លោក ប្រាក់ សុខុន ថ្លែងថា ស្របពេលដែលមានការជួបគ្នាផ្នែកយោធានៃប្រទេសទាំងពីរនៅថ្ងៃទី២៤ ធ្នូ កម្ពុជាក៏នឹងបន្តស្វែងរកដំណោះស្រាយតាមផ្លូវការទូតបន្តទៀត មិនថាជាកម្រិតទ្វេភាគី ឬ មានការចូលរួមពីខាងក្រៅនោះទេ។
លោកថ្លែងថា៖ «នេះជាវិធីល្អបំផុតដើម្បីដោះស្រាយបញ្ហាដោយសន្តិវិធីជាមួយគ្នា ពីព្រោះយើងអត់ចង់ច្បាំងទេ យើងមិនជ្រើសរើសផ្លូវយោធានោះទេ។ អ្វីដែលយើងចង់បានគឺបញ្ឈប់ការប្រយុទ្ធគ្នា បញ្ចប់នូវទុក្ខវេទនារបស់ប្រជាជន ការស្លាប់ទាំងសងខាង ការរងរបួស ការខូចខាត បាត់បង់ទ្រព្យសម្បត្តិ និងការភៀសខ្លួនពីផ្ទះសម្បែង»។
លោកបន្តថា កម្ពុជាចង់ឃើញមានការការចរចា និង ការកសាងទំនុកចិត្តរវាងគ្នាឡើងវិញ៕