ខេត្ដព្រះសីហនុ៖ សហរដ្ឋអាមេរិក និងកម្ពុជាបានបង្ហាញសញ្ញានៃការពង្រឹងចំណងទំនាក់ទំនងការពារជាតិនៅថ្ងៃទី ២៦ ខែមករា ខណៈទីក្រុងវ៉ាស៊ីនតោនបានបញ្ជាក់ជាសាធារណៈអំពីអធិបតេយ្យភាពរបស់កម្ពុជាលើមូលដ្ឋានកងទ័ពជើងទឹករាម និងបានប្រកាសពីការពង្រីកកិច្ចសហប្រតិបត្តិការយោធាបន្ទាប់ពីភាពតានតឹងអស់រយៈពេលជាច្រើនឆ្នាំ។
ការផ្លាស់ប្តូរនេះត្រូវបានគូសបញ្ជាក់ក្នុងអំឡុងពេលជំនួបរវាងោកនាយករដ្ឋមន្ត្រី ហ៊ុន ម៉ាណែត និងនាយឧត្តមនាវី សាំមូអែល ប៉ាប៉ារ៉ូ មេបញ្ជាការនៃបញ្ជាការដ្ឋានឥណ្ឌូ-ប៉ាស៊ីហ្វិក នៃសហរដ្ឋអាមេរិក នៅវិមានសន្តិភាព បន្ទាប់មកដោយការកត់សម្គាល់របស់លោក ប៉ាប៉ារ៉ូ ទៅកាន់អ្នកយកព័ត៌មាននៅមូលដ្ឋានកងទ័ពជើងទឹករាម ក្នុងអំឡុងពេលទស្សនកិច្ចកំពង់ផែរបស់នាវាចម្បាំង USS Cincinnati។
លោក ប៉ាប៉ារ៉ូ បាននិយាយថា វត្តមានរបស់កងទ័ពជើងទឹកសហរដ្ឋអាមេរិកនៅរាមបានឆ្លុះបញ្ចាំងពីទំនុកចិត្តលើអធិបតេយ្យភាពរបស់កម្ពុជា ដែលជំរះមន្ទីលដោយផ្ទាល់នូវកង្វល់យូរអង្វែងនៅទីក្រុងវ៉ាស៊ីនតោនជុំវិញការប្រើប្រាស់មូលដ្ឋានយោធាបរទេស។
លោក ប៉ាប៉ារ៉ូ បានប្រាប់អ្នកយកព័ត៌មាននៅនាវា USS Cincinnati ដែលចតនៅមូលដ្ឋានកងទ័ពជើងទឹករាមថា៖ «ពេញមួយដំណើរទស្សនកិច្ច មិត្តភក្តិកម្ពុជារបស់យើងបានធានាយើងថា រាមនឹងក្លាយជាកំពង់ផែអធិបតេយ្យភាព»។
លោកបានបន្ដថា៖ «ដូច្នេះហើយ នេះជាមូលហេតុដែលដំណើរទស្សនកិច្ចរបស់នាវាចម្បាំង USS Cincinnati គឺជាការបង្ហាញពីទំនុកចិត្តរបស់យើងចំពោះអធិបតេយ្យភាពរបស់កម្ពុជា និងជាការបង្ហាញដោយសុច្ឆន្ទៈនៃភាពជាដៃគូរបស់យើងក្នុងការឆ្ពោះទៅមុខ»។
ដំណើរទស្សនកិច្ចនៅកំពង់ផែរាម ជាលើកដំបូងដោយនាវាកងទ័ពជើងទឹកអាមេរិកក្នុងរយៈពេលជាច្រើនឆ្នាំ ត្រូវបានគេមើលឃើញយ៉ាងទូលំទូលាយថាជាការកសាងទំនុកចិត្តឡើងវិញ បន្ទាប់ពីរយៈពេលមួយដែលទំនាក់ទំនងការពារជាតិបានស្ងប់ស្ងាត់ ក្រោយសហរដ្ឋអាមេរិកថា មូលដ្ឋាននេះកំពុងត្រូវបានបង្កើតឡើងសម្រាប់ការប្រើប្រាស់ផ្តាច់មុខដោយប្រទេសចិន ដែលត្រូវបានបដិសេធម្តងហើយម្តងទៀតដោយរាជធានីភ្នំពេញ។
