ក្រសួងទេសចរណ៍ បញ្ជាក់ជាថ្មីថា កម្ពុជានៅតែជាគោលដៅទេសចរណ៍មានសុវត្ថិភាព សន្តិសុខ និងស្ថិរភាព សម្រាប់ភ្ញៀវទេសចរជាតិ និងអន្តរជាតិ ទោះបីប្រទេសថៃបានវាយប្រហារកាលពីខែធ្នូ ហើយបច្ចុប្បន្នយោធាពួកគេកំពុងឈរជើងលើទឹកដីកម្ពុជា។
ការបញ្ជាក់នេះ ធ្វើឡើងតបទៅនឹងការប្រកាសអំពីតំបន់សុវត្ថិភាពសម្រាប់ភ្ញៀវទេសចរ ដែលស្ថានទូតបរទេសនៅកម្ពុជា បានធ្វើបច្ចុប្បន្នភាពឲ្យពលរដ្ឋរបស់គេមានការប្រុងប្រយ័ត្ននៅពេលមកកម្ពុជា ដោយសារតំបន់ជាច្រើន នៅតាមព្រំដែនជាមួយថៃនៅតែមានគ្រោះថ្នាក់ បូករួមទាំងគ្រាប់មិនទាន់ផ្ទុះដែលភាគីថៃបានបាញ់ចូលកម្ពុជា។
ស្ថានទូតមួយចំនួនលើកទឹកចិត្តឲ្យពលរដ្ឋរបស់គេ កុំទៅតំបន់ព្រំដែនក្នុងចម្ងាយប្រមាណ ៥០គីឡូម៉ែត្រ។
នៅក្នុងសេចក្ដីជូនដំណឹងនៅថ្ងៃទី១៩ មករានេះ ក្រសួងទេសចរណ៍ថ្លែងអំណរគុណចំពោះការចែករំលែកព័ត៌មានស្តីពីការណែនាំការធ្វើដំណើរមកកម្ពុជា អមដោយការបង្ហាញផែនទីដែលបានផ្សព្វផ្សាយដោយបណ្តាស្ថានទូតប្រទេសជាមិត្តប្រចាំនៅកម្ពុជា។
ប៉ុន្តែក្រសួងថ្លែងថា ការផ្សព្វផ្សាយព័ត៌មាន និងការបង្ហាញផែនទីផ្សព្វផ្សាយ នាពេលកន្លងមក អាចបង្កឱ្យមានការភាន់ច្រឡំក្នុងចំណោមសាធារណជន និងភ្ញៀវទេសចរ ជាពិសេសភ្ញៀវទេសចរអន្តរជាតិ អំពីស្ថានភាព ទូទៅនៃសុវត្ថិភាពទេសចរនៅកម្ពុជា។ ក្រសួងថា ការប្រុងប្រយ័ត្នខ្ពស់ គឺមានកំណត់តែនៅតាមតំបន់ព្រំដែនខ្លះៗប៉ុណ្ណោះ ហើយមិនអាចទាញជាការសន្និដ្ឋានអំពីកត្តាសុខសុវត្ថិភាពទូទៅនៅទូទាំងកម្ពុជាបានទេ។
ក្រសួងថ្លែងថា៖ «ក្នុងន័យនេះ ក្រសួងទេសចរណ៍ សូមបញ្ជាក់ជូនថា ព្រះរាជាណាចក្រកម្ពុជា នៅតែជាគោលដៅទេសចរណ៍មានសុវត្ថិភាព សន្តិសុខ និងស្ថិរភាព សម្រាប់ភ្ញៀវទេសចរជាតិ និងអន្តរជាតិ។ តំបន់ទេសចរណ៍សំខាន់ៗ ដូចជារាជធានីភ្នំពេញ ខេត្តសៀមរាប ខេត្តព្រះសីហនុ និងគោលដៅទេសចរណ៍ ផ្សេងៗទៀត នៅតែបន្តបើកដំណើរការធម្មតា និងទទួលស្វាគមន៍ភ្ញៀវទេសចរជាបន្តបន្ទាប់ឥតដាច់ ក្រោមការធានាសុវត្ថិភាពយ៉ាងម៉ឺងម៉ាត់ពីសំណាក់អាជ្ញាធរមានសមត្ថកិច្ច»៕
