នាវាចម្បាំងសហរដ្ឋអាមេរិក USS CINCINNATI (LCS 20) នឹងចតនៅកំពង់ផែរាម នាខេត្តព្រះសីហនុ រហូតដល់ថ្ងៃទី២៨ ខែមករា ក្នុងបេសកកម្មបំពេញទស្សនកិច្ចលើកកម្ពស់កិច្ចសហប្រតិបត្តិការវាងកងទ័ពកម្ពុជា និងសហរដ្ឋអាមេរិក។ នាវានេះបានមកដល់កំពង់ផែរាម នៅព្រឹកថ្ងៃទី២៤ ខែមករានេះ។
នាវានេះមានទម្ងន់ប្រមាណជា ៣ពាន់តោន មានប្រវែងប្រមាណ ១៣០ម៉ែត្រ ហើយមានកន្លែងផ្ទុកឧទ្ធម្ភាគចក្រផងដែរ ដែលដឹកនាំដោយមេបញ្ជាការវរនាវីត្រី Andrew J.Recame ហើយត្រូវបានទទួលស្វាគនមន៍ដោយលោក អ៊ិន សុខេមរា មេបញ្ជាការរងមូលដ្ឋានសមុទ្ររាមនៃកងទ័ពជើងទឹក។
យោងតាមមន្ត្រីនៃកងទ័ពជើងទឹក ចាប់តាំងពីឆ្នាំ ២០០៣ រហូតដល់ឆ្នាំ២០២៦ នេះ នាវាកងទ័ពជើងទឹកសហរដ្ឋអាមេរិក បានចូលសំចត បំពេញទស្សនកិច្ច សរុបទាំងអស់ចំនួន ៣១ លើកដែលមាននាវាសរុបចំនួន ៣៧គ្រឿង។
ការចូលចតលើកចុងក្រោយធ្វើឡើងនៅឆ្នាំ ២០២៤ ដែលពេលនោះគឺនាវាឈ្មោះ USS Savanna បានសំចតចាប់ពីថ្ងៃទី១៦-២០ ខែធ្នូ។
មកទល់ពេលនេះ ទំនាក់ទំនងការទូតរវាងកម្ពុជា និងសហរដ្ឋអាមេរិក មានរយៈពេល ៧៦ ឆ្នាំ ដែលចាប់ផ្តើមនៅថ្ងៃទី១១ ខែកក្កដា ឆ្នាំ១៩៥០ ក្រោយពេលបញ្ចប់សង្គ្រាមលោកលើកទី២។ ក្រោមទំនាក់ទំនងនេះ កងទ័ពជើងទឹកកម្ពុជា និងកងទ័ពជើងទឹកសហរដ្ឋអាមេរិក បានផ្លាស់ប្តូរកិច្ចសហប្រតិបត្តិការទៅវិញទៅ មកតាមរយៈការហ្វឹកហ្វឺននានា ការចូលជួបសវនាការសម្តែងការគួរសម និងជួយឧបត្ថម្ភគាំទ្រផ្សេងៗទៀត។
លោក អ៊ិន សុខេមរា ថ្លែងថា លោកសង្ឃឹមថានឹងមានកិច្ចសហប្រតិបត្តិការបន្តទៀតរវាងកងទ័ពជើងទឹកនៃប្រទេសទាំងពីរ ជាពិសេសពាក់ព័ន្ធទៅនឹងការបណ្តុះបណ្តាលធនធានមនុស្ស ការងារ ហ្វឹកហ្វឺនរួមគ្នាស្របទៅតាមការធ្វើទំនើបកម្មរបស់កងយោធពលខេមរភូមិន្ទ។
លោក អ៊ិន សុខេមរា ថ្លែងថា៖ «កងទ័ពជើងទឹកកកម្ពុជាត្រៀមខ្លួនរួចជាស្រេច ក្នុងការពង្រឹងកិច្ចសហប្រតិបតិត្តការរវាងកងទ័ពជើងទឹក ប្រទេសទាំងពីរជាមួយនិងការស្វាគមន៍បន្ថែមទៀតពីសំណាក់នាវាកងទ័ពជើងទឹកសហរដ្ឋអាមេរិក»។
មន្ត្រីដដែលបានថ្លែងថា ដំណើរទស្សនកិច្ចនេះ ក៏បង្ហាញពីការប្តេជ្ញាចិត្តរបស់កម្ពុជា ក្នុងការអនុវត្តគោលនយោបាយបើកចំហ តម្លាភាព និងសហប្រតិបត្តិការជាមួយដៃគូអន្តរជាតិ ដើម្បីរួមចំណែកថែរក្សាសន្តិភាព និងស្ថិរភាពតំបន់។
លោកថ្លែងថា៖ «កម្ពុជាបន្តគាំទ្រការលើកកម្ពស់សន្តិភាព ស្ថិរភាព និងវិបុលភាពក្នុងតំបន់អាស៊ាន និងឥណ្ឌូ-ប៉ាស៊ីហ្វិក តាមរយៈកិច្ចសហប្រតិបត្តិការដែលផ្អែកលើការគោរពអធិបតេយ្យភាព និងច្បាប់អន្តរជាតិ»៕