មន្ត្រីយោធាជើងទឹកជាន់ខ្ពស់អាមេរិកកំពុងបំពេញទស្សនកិច្ចនៅកម្ពុជា ក្នុងបេសកកម្មពង្រឹងកិច្ចសហប្រតិបត្តិការរបស់ខ្លួននៅតំបន់ឥណ្ឌូប៉ាស៊ីហ្វិក ស្ថិតក្នុងគោលនយោបាយតំបន់ឥណ្ឌូប៉ាស៊ីហ្វិកសេរី និងបើកចំហ។ អ្នកវិភាគចង់ឲ្យអាមេរិកធ្វើលើសពីនេះ គឺជំរុញឲ្យថៃគោរពបទឈប់បាញ់ និងកិច្ចព្រមព្រៀងនានា។
លោកឧត្តមនាវី Samuel J. Paparo មេបញ្ជាការប្រចាំនៅបញ្ជាការដ្ឋានរបស់សហរដ្ឋអាមេរិក នៅតំបន់ឥណ្ឌូប៉ាស៊ីហ្វិក បានជួបជាមួយលោកនាយករដ្ឋមន្រ្តី ហ៊ុន ម៉ាណែត នៅថ្ងៃទី២៦ មករានេះ ដើម្បីពិភាក្សាពីទំនាក់ទំនងកម្ពុជា និងសហរដ្ឋអាមេរិក ក្នុងវិស័យការពារជាតិ និងវិធីពង្រឹងចំណងទាក់ទងទ្វេភាគី និងការគាំទ្រដល់ស្ថិរភាពតំបន់។ នេះបើយោងតាមស្ថានទូតសហរដ្ឋអាមេរិកនៅទីក្រុងភ្នំពេញ។
ស្ថានទូតអាមេរិកបញ្ជាក់ថា៖ «កិច្ចពិភាក្សាបានផ្តោតលើការសន្ទនា ទំនុកចិត្តគ្នានិងស្ថិរភាពតំបន់។ សហរដ្ឋអាមេរិក និងកម្ពុជានឹងធ្វើការប្រកៀកស្មាគ្នា ដើម្បីលើកស្ទួយតំបន់ឥណ្ឌូប៉ាស៊ីហ្វិកដែលមានភាពសេរី និងបើកចំហ»។
ជាមួយនឹងដំណើរទស្សនកិច្ចរបស់លោក Samuel J. Paparo នាវាពិឃាតអាមេរិក USS Cincinnati (LCS 20) ក៏កំពុងចតនៅកំពង់ផែរាម ខេត្តព្រះសីហនុ រហូតដល់ថ្ងៃទី២៨ មករា ផងដែរ ក្នុងបេសកកម្មពង្រឹងកិច្ចសហប្រតិបត្តិការផ្នែកកងទ័ពជើងទឹក។ នាវានេះដឹកនាំដោយមេបញ្ជាការ Andrew J. Recame។
យ៉ាងណាក៏ដោយ មុនមកដល់កម្ពុជា លោក Samuel J. Paparo បានជួបជាមួយមេយោធាថៃ នៅទីក្រុងបាងកងនៅថ្ងៃទី២៥ ខែមករា ដែលជំនួបនោះក៏ដើម្បីបញ្ជាក់ពីភាពជាដៃគូយូរអង្វែងរវាងអាមេរិកនិងថៃ យុទ្ធសាស្ត្រឥណ្ឌូប៉ាស៊ីហ្វិកសេរី និងបើកចំហ និងការធ្វើសមយុទ្ធរួមគ្នា ផងដែរ។
ខណៈដែលសហរដ្ឋអាមេរិក មានភាពសកម្មក្នុងការចូលរួមកាត់បន្ថយភាពតានតឹងរវាងថៃ និងកម្ពុជា តាំងពីខែកក្កដា ឆ្នាំមុនមក កងទ័ពជើងទឹកអាមេរិកក៏គួរតែយកឱកាសនេះចូលរួមចំណែកកាត់បន្ថយភាពតានតឹងរវាងប្រទេសទាំងពីរនេះដែរ តាមរយៈការជំរុញឲ្យថៃគោរពបទឈប់បាញ់។ នេះជាការលើកឡើងរបស់លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា។
លោកថ្លែងដូច្នេះថា៖ «កងទ័ពសហរដ្ឋអាមេរិកហាក់ដូចជាមិនមានប្រតិកម្មណាមួយពាក់ព័ន្ធនឹងការឈ្លានពានរបស់ថៃមកលើកម្ពុជាទេ។ ដូច្នេះ អ្វីដែលកងទ័ពសហរដ្ឋអាមេរិកអាចធ្វើបានគឺស្នើឲ្យភាគីថៃគោរពស្មារតីបទឈប់បាញ់ ជាពិសេសគឺស្មារតីនៃសេចក្ដីប្រកាសរួមនៅទីក្រុងគូឡាឡាំពួរ ដែលមានលោក ដូណាល់ ត្រាំ ជាសាក្សី រួមជាមួយនាយករដ្ឋមន្ត្រី ម៉ាឡេស៊ី អាន់វ៉ា អ៊ីប្រាហ៊ីម ជាប្រធានអាស៊ាននាពេលនោះ»។
លោកថា នាពេលនេះ អ្វីដែលសំខាន់នោះគឺ សហរដ្ឋអាមេរិកត្រឹមតែធ្វើយ៉ាងណាឲ្យថៃគោរពច្បាប់ គោរពបទឈប់បាញ់ និងកិច្ចព្រមព្រៀងនានាដែលថៃបានធ្វើជាមួយកម្ពុជា ជាការស្រេចទៅហើយ៕
