ខេត្ដកំពង់ចាម៖ សំណង់ច្រាំងទន្លេនៅក្រុងកំពង់ចាម ខេត្តកំពង់ចាម បានបាក់ស្រុតយ៉ាងធ្ងន់ធ្ងរ កាលពីយប់ថ្ងៃទី៣០ ខែមករា ឆ្នាំ២០២៦ វេលាម៉ោងប្រមាណ ១១យប់ ដែលបណ្ដាលឲ្យផ្លូវកៅស៊ូ និងសំណង់ទប់ច្រាំងមួយផ្នែកធំ បាក់ចូលទៅក្នុងទន្លេ។
ឧប្បត្ដិហេតុនេះនាំឱ្យអាជ្ញាធរខេត្តចាត់វិធានការបិទចរាចរណ៍បណ្ដោះអាសន្ន និងស្នើសុំអន្តរាគមន៍ពីអង្គភាពជាតិ ដើម្បីចុះពិនិត្យវាយតម្លៃ និងសិក្សាលទ្ធភាពស្តារឡើងវិញ។
យោងតាមសេចក្តីប្រកាសព័ត៌មានរបស់រដ្ឋបាលខេត្តកំពង់ចាម បានឱ្យដឹងថា៖ «ករណីបាក់ស្រុតនេះ បានកើតឡើងនៅចំណុចភូមិទី១៥ សង្កាត់កំពង់ចាម ក្រុងកំពង់ចាម»។
សេចក្តីប្រកាសព័ត៌មានបានបន្ដថា៖ «ផ្នែកខាងលើ បានបាក់ស្រុតសំណង់ច្រាំង និងសំណង់សួនទាំងស្រុង រួមទាំងសំណង់ផ្លូវកៅស៊ូ មួយផ្នែកធំ ដែលមានបណ្តោយប្រវែងប្រមាណ ៧០ម៉ែត្រ ខណៈផ្នែកខាងក្រោម សំណង់បេតុងទប់ច្រាំង មានបណ្តោយប្រវែងប្រមាណ ៧០ម៉ែត្រ និងទទឹង ៣២ម៉ែត្រ បានបាក់ស្រុតចូលទឹកទន្លេទាំងស្រុង»។
រដ្ឋបាលខេត្តបានឱ្យដឹងថា ការវាយតម្លៃបឋមបង្ហាញថា មូលហេតុនៃការបាក់ស្រុតច្រាំងទន្លេនេះ បណ្តាលមកពីទីតាំងស្ថិតនៅខាងមុខអន្លង់ទឹកកួច ដែលមានជម្រៅចាប់ពី ១,២ ម៉ែត្រ ទៅ ៦ ម៉ែត្រ និងសំណង់ច្រាំងទន្លេត្រូវបានសាងសង់តាំងពីឆ្នាំ២០១២ ដែលមកដល់ពេលនេះ បានតស៊ូការពារការបាក់ស្រុតច្រាំងទន្លេអស់រយៈពេលជាង ១៤ឆ្នាំមកហើយ។
ឆ្លើយតបនឹងស្ថានការណ៍នេះ រដ្ឋបាលខេត្តកំពង់ចាម បានដាក់ចេញវិធានការភ្លាមៗ ចំនួន ២ចំណុច ដោយបានប្រើប្រាស់កម្លាំងសមត្ថកិច្ច ហាមឃាត់ការធ្វើចរាចរណ៍ និងការធ្វើដំណើរចេញចូលតំបន់បាក់ស្រុតច្រាំងទន្លេ ជាបណ្តោះអាសន្ន ដើម្បីការពារសុវត្ថិភាពប្រជាពលរដ្ឋទូទៅ។
ជាមួយគ្នានេះ អ្នកប្រកបរបររកស៊ីក្នុងទីតាំង ឬជាប់នឹងទីតាំងកើតហេតុ ដែលប្រឈមហានិភ័យ ក៏ត្រូវបានណែនាំឱ្យផ្លាស់ប្តូរទៅទីតាំងមានសុវត្ថិភាពផងដែរ។
រដ្ឋបាលខេត្តបានធ្វើរបាយការណ៍ដល់រាជរដ្ឋាភិបាល និងស្នើសុំអន្តរាគមន៍ទៅគណៈកម្មាធិការជាតិគ្រប់គ្រងគ្រោះមហន្ត និងក្រសួងធនធានទឹក និងឧតុនិយម ដើម្បីស្នើសុំការចុះពិនិត្យ វាយតម្លៃលក្ខណៈបច្ចេកទេស និងពិនិត្យលទ្ធភាពក្នុងការស្តារ និងសាងសង់សំណង់ច្រាំងទន្លេឡើងវិញ។
ជាក់ស្តែង នៅព្រឹកថ្ងៃទី៣១ ខែមករា ឆ្នាំ២០២៦ ក្រុមការងារបច្ចេកទេសរបស់ក្រសួងធនធានទឹក និងឧតុនិយម សហការជាមួយរដ្ឋបាលខេត្ត បានចុះមកដល់ទីតាំងកើតហេតុរួចហើយ។
រដ្ឋបាលខេត្តកំពង់ចាម បានស្នើដល់ប្រជាពលរដ្ឋដែលរស់នៅក្នុងតំបន់ ឬធ្វើដំណើរទៅក្នុង ឬជិតតំបន់កើតហេតុ សូមបង្កើនការប្រុងប្រយ័ត្នខ្ពស់ និងចូលរួមសហការជាមួយសមត្ថកិច្ចដែលកំពុងប្រចាំការ រៀបចំសណ្តាប់ធ្នាប់ក្នុងតំបន់ ដោយមានការយោគយល់ ខណៈការវាយតម្លៃបច្ចេកទេស និងវិធានការបន្ត កំពុងដំណើរការ៕
