ឯកអគ្គរាជទូតខ្មែរប្រចាំប្រទេសបារាំង បានថ្លែងប្រាប់អន្តរជាតិថា ទោះបីជាមានបទឈប់បាញ់ កាលពីថ្ងៃទី២៧ ខែធ្នូ ឆ្នាំ២០២៥ រវាងថៃនិងកម្ពុជាក៏ដោយ វារឿងដែលគួរឲ្យសោកស្តាយ ដែលកងកម្លាំងយោធាថៃនៅតែបន្តបំផ្លាញផ្ទះសម្បែងរបស់ប្រជាពលរដ្ឋ រាយបន្លាលួស ដាក់ទូកុងតឺន័រ និងជីកលេណដ្ឋាន នៅក្នុងតំបន់ដែលខ្លួនកាន់កាប់លើទឹកដីអធិបតេយ្យរបស់កម្ពុជា។
ការលើកឡើងបែបនេះ ធ្វើឡើងដោយលោក លុយ ដាវីត ឯកអគ្គរាជទូតកម្ពុជាប្រចាំប្រទេសបារាំង នៅក្នុងបទអន្តរាគមន៍របស់លោក ក្នុងកិច្ចប្រជុំគណៈកម្មការនយោបាយនៃអង្គការប្រទេសនិយាយភាសាបារាំង (OIF) លើកទី២៥៧ នៅប្រទេសបារាំង កាលពីថ្ងៃទី១១ ខែកុម្ភៈ ឆ្នាំ២០២៦។ នេះបើតាមការចុះផ្សាយរបស់ AKP។
លោកថ្លែងថា កិច្ចប្រឹងប្រែងដោយខុសច្បាប់របស់ថៃ គឺដើម្បីបង្កើតស្ថានភាពថ្មីនៅលើទីតាំងជាក់ស្តែង និងរារាំងដល់ការវិលត្រឡប់ដោយសុវត្ថិភាព និងថ្លៃថ្នូររបស់ជនស៊ីវិលទៅផ្ទះសម្បែងរបស់ពួកគេវិញ។
លោក លុយ ដាវីត ថ្លែងថា៖ «ថៃបានបើកការវាយប្រហារ ក្នុងគោលបំណងឈ្លានពានកម្ពុជា ដោយបានប្រើប្រាស់អាវុធធុនធ្ងន់ កាំភ្លើងធំ ដ្រូន និងយន្តហោះចម្បាំង បានបណ្តាលឱ្យមានការបាត់បង់ជីវិតជនស៊ីវិល បំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធសំខាន់ៗ បណ្តាលឱ្យប្រជាពលរដ្ឋរាប់ម៉ឺននាក់ត្រូវភៀសខ្លួន និងធ្វើឱ្យខូចខាតធ្ងន់ធ្ងរដល់ទីតាំងបេតិកភណ្ឌវប្បធម៌សំខាន់ៗ រួមមានប្រាសាទព្រះវិហារដែលបានចុះបញ្ជីជាសម្បត្តិបេតិកភណ្ឌពិភពលោក ព្រមទាំងប្រាសាទតាក្របី និងតាមាន់ធំ»។
លោកបន្តថា៖ «ប្រាសាទទាំងនេះស្ថិតនៅលើទឹកដីអធិបតេយ្យរបស់កម្ពុជា ដូចដែលបានកំណត់យ៉ាងច្បាស់ក្នុងសន្ធិសញ្ញាបារាំង-សៀម ឆ្នាំ១៩០៤ និង១៩០៧ និងផែនទីភ្ជាប់ជាមួយ ដែលជាមូលដ្ឋានច្បាប់ដូចគ្នាដែលតុលាការយុត្តិធម៌អន្តរជាតិ (ICJ) បានយកមកប្រើជាសំអាង ក្នុងសាលក្រមឆ្នាំ១៩៦២ និងឆ្នាំ២០១៣ ពាក់ព័ន្ធនឹងប្រាសាទព្រះវិហារ»។
លោកបន្តថា កម្ពុជានិងថៃបានឈានដល់បទឈប់បាញ់ជាថ្មីនៅថ្ងៃទី២៧ ខែធ្នូ ក្នុងគោលបំណងបញ្ឈប់ការប្រយុទ្ធគ្នា បញ្ឈប់ការចល័តទ័ព និងអនុញ្ញាតឱ្យជនភៀសសឹកអាចវិលត្រឡប់ទៅលំនៅឋានវិញដោយសុវត្ថិភាព និងថ្លៃថ្នូរ។ ប៉ុន្តែ គួរឱ្យសោកស្តាយ ដែលយោធាថៃបន្តធ្វើសកម្មភាពផ្ទុយពីកិច្ចព្រមព្រៀង និងបង្កឲ្យមានស្ថានភាពអមនុស្សធម៌បែបដែលមិនអាចទទួលយកបាន។
លោក លុយ ដាវីត បានបន្តទៀតថា កម្ពុជាគោរពយ៉ាងម៉ឺងម៉ាត់នូវកិច្ចព្រមព្រៀងបទឈប់បាញ់ និងប្រកាន់ខ្ជាប់នូវកិច្ចព្រមព្រៀងដែលបានសម្រេចរវាងប្រទេសទាំងពីរ ព្រមទាំងស្វាគមន៍តួនាទីរបស់ក្រុមអ្នកសង្កេតការណ៍អាស៊ាន និងនៅតែបន្តប្តេជ្ញាចិត្តចំពោះការសន្ទនា ការគោរពគ្នាទៅវិញទៅមក និងការគោរពច្បាប់អន្តរជាតិ។
លោកថ្លែងថា៖ «យើងក៏សូមអំពាវនាវឱ្យភាគីថៃគោរពឱ្យបានពេញលេញនូវកាតព្វកិច្ចរបស់ខ្លួន ដកបន្លាលួស និងទូរកុងតឺន័រខុសច្បាប់ចេញទាំងអស់ និងអនុញ្ញាតឱ្យជនភៀសសឹកកម្ពុជាអាចវិលត្រឡប់ដោយសុវត្ថិភាព ទៅកាន់ភូមិឋានរបស់ពួកគេវិញ ស្របតាមកិច្ចព្រមព្រៀងបទឈប់បាញ់ថ្ងៃទី២៧ ខែធ្នូ ឆ្នាំ២០២៥។ យើងក៏សូមអំពាវនាវផងដែរដល់គ្រួសារហ្វ្រង់កូហ្វូនី និងសហគមន៍អន្តរជាតិ ឱ្យតាមដានយ៉ាងយកចិត្តទុកដាក់ចំពោះស្ថានការណ៍នេះ និងគាំទ្រដល់ការដោះស្រាយវិវាទដោយសន្តិវិធី ស្របតាមច្បាប់អន្តរជាតិ»។
លោកប្រាប់ទៅអង្គប្រជុំថា ព្រំដែនមិនអាចត្រូវបានកំណត់ដោយកម្លាំងឡើយ ហើយរាល់ការប៉ុនប៉ងផ្លាស់ប្តូរខ្សែបន្ទាត់ព្រំដែនដោយឯកតោភាគី គឺផ្ទុយនឹងច្បាប់អន្តរជាតិ។
លោក លុយ ដាវីត៖ «កម្ពុជានឹងបន្តអនុវត្តប្រកបដោយការទទួលខុសត្រូវ និងអត់ធ្មត់ ប៉ុន្តែព្រំដែន អធិបតេយ្យភាព និងកិត្តិយសរបស់ប្រជាជនកម្ពុជា មិនអាចឱ្យមានការរំលោភដោយកម្លាំងបានឡើយ»៕
