អ្នកកាសែត ៣នាក់ ត្រូវបានរាយការណ៍ថាត្រូវបានឃាត់ខ្លួនពាក់ព័ន្ធនឹងការរាយការណ៍រឿងឆបោកតាមអនឡាញ។ ក្រសួងព័ត៌មានត្រៀមផ្ដល់ជំនួយផ្នែកច្បាប់ដល់ពួកគេ ស្នើកិច្ចសហការរវាងអាជ្ញាធរនិងអ្នកកាសែត និងស្នើអ្នកកាសែតគោរពក្រមសីលធម៌វិជ្ជាជីវៈ។
នៅក្នុងខែកុម្ភៈនេះ មានករណីឃាត់ខ្លួនអ្នកសារព័ត៌មានចំនួន ៣ នាក់ ដែលម្នាក់នៅខេត្តបន្ទាយមានជ័យ និង ២នាក់នៅខេត្តតាកែវ ពាក់ព័ន្ធនឹងការផ្សព្វផ្សាយរឿងឆបោកតាមអនឡាញ ដែលអាជ្ញាធរមើលឃើញថាជាការចោទប្រកាន់ខុសពីការពិត និងជាការញុះញង់។
ករណីនៅខេត្តបន្ទាយមានជ័យ គឺអ្នកកាសែតឈ្មោះ ហែម វណ្ណា ចាងហ្វាងកាសែត HVNN TV Online ដែលត្រូវសាលាដំបូងខេត្តបន្ទាយមានជ័យ ចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា៤៩៥ និងបទ «ស្តាប់ឬថតពាក្យសម្តីឯកជន» តាមមាត្រា៣០១ នៃក្រមព្រហ្មទណ្ឌ កាលពីថ្ងៃទី៤ ខែកុម្ភៈ ឆ្នាំ២០២៦។ ការចោទនិងឃុំខ្លួននេះ ធ្វើឡើងមួយថ្ងៃបន្ទាប់ពីលោករាយការណ៍ថាមានអំពើហិង្សាលើជនបរទេសនៅក្នុងអគារបិទខ្ទប់មួយកន្លែង ដែលសង្ស័យថាជាកន្លែងបង្ខំមនុស្សឱ្យធ្វើការឆបោកតាមប្រព័ន្ធអនឡាញ។ នេះបើតាមសមាគមអាដហុក។
ចំណែកករណីនៅខេត្តតាកែវ អ្នកសារព័ត៌មាន ២នាក់ គឺលោក ព្រំ សុផៃ និពន្ធនាយករងកោះសន្តិភា និងលោក ស៊ាង ប៊ុនសុង ចាងហ្វាង Sunday News ត្រូវបានរាយការណ៍ថា ត្រូវនគរបាលឃាត់ខ្លួននៅថ្ងៃទី១២ ខែកុម្ភៈ ដោយសារពួកគេផ្សាយព័ត៌មានថា ខេត្តតាកែវមានទីតាំងឆបោកតាមអនឡាញ ហើយថា អភិបាលស្រុកបាទី និងអធិការនគរបាលស្រុកបាទី យកលុយ ៥ពាន់ដុល្លារ ពីក្រុមឆបោក។ អាជ្ញាធរចាត់ទុកការចោទប្រកាន់បែបនេះថាជារឿងមិនពិត។
យ៉ាងណាក៏ដោយ មិនទាន់មានព័ត៌មានអំពីការវិវត្តនៃករណីរបស់ពួកគេនៅឡើយ។
លោក វ៉ី សំណាង អភិបាលខេត្តតាកែវ បានប្រាប់ភ្នំពេញប៉ុស្តិ៍ថា អ្នកសារព័ត៌មានទាំងពីរនាក់ បានចោទថា ខេត្តតាកែវនៅមានវត្តមានក្រុមឆបោកតាមអនឡាញ ដែលតាមពិត ខេត្តនេះលែងមានក្រុមជនល្មើសនេះតាំពីឆ្នាំមុនមកម្លេះ។ យ៉ាងណាក៏ដោយលោកថា មានអគារជាច្រើននៃក្រុមហ៊ុន សុភក្តិមិត្តរ៉េស៊ីដិន ឯ.ក នៅស្រុកបាទី ដែលធ្លាប់មានក្រុមឆបោកតាមអនឡាញកាលពីមុន ត្រូវបានរក្សាទុកដើម្បីដាក់ក្រុមដែលពាក់ព័ន្ធនឹងបទល្មើសឆបោកជាបណ្ដោះអាសន្ន រង់ចាំការអនុវត្តនីតិវិធី ឬបណ្ដេញចេញ។
លោកថ្លែងដូច្នេះថា៖ «គាត់ផ្សាយថានៅខេត្តតាកែវ មានកន្លែង online scam ហើយត្រូវបានលាក់បាំងដោយអាជ្ញាធរ ជាពិសេសចោទទៅលើអធិការស្រុកបាទី និងចៅហ្វាយស្រុកថា យកលុយគេ ៥ពាន់ដុល្លារ។ តំបន់ហ្នឹង គ្រាន់តែរកឃើញបទល្មើសភ្លាម រាជរដ្ឋាភិបាលបានធ្វើការណែនាំ ហើយយើងបានចុះទៅបិទទីតាំងនោះតាំងពីថ្ងៃទី២២ ខែកក្កដា ឆ្នាំ២០២៥ មកម្លេះ។ ហើយអគារទាំងអស់នោះ ប្រមុខរាជរដ្ឋាភិបាលសម្រេចទុកជាអគារសម្រាប់ដាក់ជនល្មើសទាំងឡាយដែលត្រូវបណ្ដេញចេញ»។
លោកពន្យល់ថា ការបង្ក្រាបបទល្មើសអនឡាញ មានពាក់ព័ន្ធនឹងជនល្មើសជាជនបរទេសជាច្រើន ដោយ ខ្លះមានឯកសារ ខ្លះទៀតមិនមានឯកសារ។ ហេតុដូច្នេះ អាជ្ញាធរត្រូវធ្វើការជាមួយស្ថានទូតនៃប្រទេសរបស់ជនពាក់ព័ន្ធ ហើយវាត្រូវការពេលវេលាច្រើនសម្រាប់ស្ថានទូតខ្លះក្នុងការផ្ដល់ឯកសារដល់ពលរដ្ឋរបស់ខ្លួន។ ភាពយឺតយ៉ាវ និងចំនួនជនបរទេសពាក់ព័ន្ធច្រើននេះ ត្រូវឲ្យរដ្ឋាភិបាលប្រើប្រាស់អគារក្រុមហ៊ុន សុភក្តិមិត្តរ៉េស៊ីដិន ឯ.ក ទាំង១៣ នៅស្រុកបាទី ដើម្បីដាក់ជាបណ្ដោះអាសន្ននៃជនពាក់ព័ន្ធ ដោយអ្នកខ្លះត្រូវបានបញ្ជូនពីខេត្តផ្សេងទៀត រង់ចាំការបណ្ដេញចេញ។
យ៉ាងណាក៏ដោយ បើតាមលោកអភិបាលខេត្ត អគារទាំងអស់មិនទាន់ត្រូវបានប្រើប្រាស់ជាកន្លែងដាក់ក្រុមឆបោកនៅឡើយទេ ដោយអាជ្ញាធរកំពុងរៀបចំដាក់របាការពារកុំឲ្យជនដែលនឹងត្រូវយកមកដាក់ទីនេះប្រព្រឹត្តបទល្មើសផ្សេងៗ ដូចជាការអត្តឃាតជាដើម។
លោក ទេព អស្នារិទ្ធ អ្នកនាំពាក្យក្រសួងព័ត៌មានបានថ្លែងនៅថ្ងៃទី១៣ ខែកុម្ភៈ នេះថា ក្រសួងព័ត៌មានបានតាមដានយ៉ាងជាប់លាប់លើករណីពាក់ព័ន្ធនឹងអ្នកសារព័ត៌មាននៅខេត្តបន្ទាយមានជ័យ និងខេត្តតាកែវ ហើយបានសហការជាមួយអាជ្ញាធរសមត្ថកិច្ចពាក់ព័ន្ធ ដើម្បីទទួលព័ត៌មានបន្ថែមជុំវិញករណីទាំងនេះ។ លោកថា ករណីទាំងនេះចាំបាច់ត្រូវមានការពិនិត្យ ស្វែងយល់បន្ថែមអំពីអង្គហេតុ និងអង្គច្បាប់ពាក់ព័ន្ធនឹងករណីនីមួយៗ។
លោកបន្តថា៖ «ក្រសួងព័ត៌មានត្រៀមខ្លួនក្នុងការផ្តល់ការគាំទ្រផ្នែកច្បាប់ ដោយអាចពិនិត្យសំណើមកក្រសួងដើម្បីក្រសួងចូលរួមផ្តល់ការគាំទ្រផ្នែកច្បាប់លើសំណុំរឿង អាចរាប់ទាំងការគាំទ្រក្នុងដំណើរការនីតិវិធីតុលាការ»។
លោកបន្តទៀតថា នៅពេលទទួលបានសំណើសុំពីអ្នកសារព័ត៌មាន ក្រសួងនឹងពិនិត្យមើលលើលក្ខខណ្ឌ ទាំងការអនុវត្តការងារដោយប្រតិបត្តិក្នុងក្របខណ្ឌច្បាប់កំណត់ និងដោយក្រមសីលធម៌ ស្របតាមធម្មនុញ្ញវិជ្ជាជីវៈសារព័ត៌មាន ក្នុងចំណោមលក្ខខណ្ឌត្រូវពិនិត្យ។
ពាក់ព័ន្ធនឹងការបង្ក្រាបអំពើឆបោកតាមអនឡាញ លោក អស្នារិទ្ធ ថ្លែងថា រាជរដ្ឋាភិបាល ក្រសួង ស្ថាប័ន និងរដ្ឋបាលរាជធានី ខេត្ត បាននិងកំពុងបន្តធ្វើយ៉ាងសកម្ម ដោយមានការទទួលស្គាល់ពីបណ្តាប្រទេស និងដៃគូអន្តរជាតិ និងការចូលរួមពីសារព័ត៌មាន ក្នុងការផ្សាយព័ត៌មានដោយមានមូលដ្ឋានព័ត៌មានត្រឹមត្រូវ មានប្រភពព័ត៌មានច្បាស់លាស់ ពិតប្រាកដអាចទុកចិត្តបាន។
ការផ្សព្វផ្សាយដោយមានប្រភពច្បាស់លាស់ និងដោយក្រមសីលធម៌វិជ្ជាជីវៈត្រឹមត្រូវ គួរត្រូវបានលើកទឹកចិត្ត។ កន្លងទៅ មានករណីឆបោកខ្លះ សមត្ថកិច្ចក៏បានទទួលព័ត៌មាន ហើយបានចាត់វិធានការបង្ក្រាបឆ្លើយតបទៅនឹងព័ត៌មានដែលទទួលបាន។ នេះជាការលើកឡើងរបស់អ្នកនាំពាក្យក្រសួងព័ត៌មាន។
លោក ទេព អស្នារិទ្ធ បន្តថា៖ «ខ្ញុំសូមស្នើដល់អាជ្ញាធរពាក់ព័ន្ធ សូមមេត្តាផ្តល់អាទិភាពដល់ការធានាតម្លាភាព និងយុត្តិធម៌ ស្របតាមច្បាប់កំណត់ ដោយធានាថា អង្គហេតុ និងអង្គច្បាប់ ក៏ដូចជាព័ត៌មានពាក់ព័ន្ធ និងការស្រាវជ្រាវ ត្រូវបានដាក់បញ្ចូលក្នុងដំណើរការនៃសំណុំរឿង សម្រាប់ការពិនិត្យ និងពិចារណាគ្រប់ជ្រុងជ្រោយ»។
លោកក៏បានក្រើនរំលឹកដល់អ្នកសារព័ត៌មានឱ្យពង្រឹងការប្រតិបត្តិក្រមសីលធម៌ក្នុងការអនុវត្តការងាររបស់ខ្លួន និងផ្តល់កិច្ចសហការជាមួយសមត្ថកិច្ច និងអាជ្ញាធរអនុវត្តច្បាប់ ដើម្បីផ្តល់ព័ត៌មាន ដែលខ្លួនទទួលបានដល់សមត្ថកិច្ច ដើម្បីឲ្យពួកគេអនុវត្តនីតិវិធីទៅតាមជំនាញរបស់ខ្លួន។
លោកថា៖ «ទាំងនេះគឺ ដើម្បីធានាសុវត្ថិភាពដល់អ្នកសារព័ត៌មានសម្រាប់ការអនុវត្តសកម្មភាពក្នុងវិជ្ជាជីវៈរបស់ខ្លួន និងការចូលរួមចំណែកក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យានេះជាមួយរាជរដ្ឋាភិបាល»៕
