ក្រោយបានកាន់កាប់ផ្នែកខ្លះនៃទឹកដីកម្ពុជាដោយខុសច្បាប់ ថៃកំពុងបង្វែរស្ថានការណ៍ដោយទាញចំណាប់អារម្មណ៍អន្តរជាតិឲ្យងាកត្រឡប់ទៅលើការប្រយុទ្ធប្រឆាំងនឹងការបោកប្រាស់នៅលើទឹកដីអធិបតេយ្យរបស់កម្ពុជាវិញ ដូចដែលពួកគេបានអះអាងពីមុននិងយកធ្វើជាលេសឈ្លានពានកម្ពុជា។
សកម្មភាពចុងក្រោយរបស់ពួកគេ គឺតាមរយៈដឹកនាំមន្ត្រីស៊ើបអង្កេតអាមេរិក FBI និងអនុព័ន្ធយោធាបរទេសពីប្រទេសចំនួន ២០ ទៅមើលសណ្ឋាគារដែលពួកគេចោទថាជាមជ្ឈមណ្ឌលបោកប្រាស់មួយនៅតំបន់អូរស្មាច់ ខេត្តឧត្តរមានជ័យ កាលពីថ្ងៃទី២ ខែកុម្ភៈម្សិលមិញ។ មួយផ្នែកនៃតំបន់អូរស្មាច់ បច្ចុប្បន្នស្ថិតក្រោមការកាន់កាប់របស់យោធាថៃដោយខុសច្បាប់ បន្ទាប់ពីការវាយប្រហារសង្គ្រុបនៅម៉ោងចុងក្រោយមុនបទឈប់បាញ់នាពេលថ្ងៃត្រង់នៅថ្ងៃទី ២៧ ខែធ្នូ។
ប្រព័ន្ធផ្សព្វផ្សាយថៃ The Nation បានរាយការណ៍ថា ដំណើរទស្សនកិច្ចនេះត្រូវបានដឹកនាំដោយលោក Teeranan Nandhakwang អគ្គនាយកនាយកដ្ឋានស៊ើបការណ៍កងទ័ពភូមិន្ទថៃ។ ខណៈពេលដែល The Nation បានអះអាងថា ដំណើរទស្សនកិច្ចនេះគឺទៅកាន់ច្រកទ្វារព្រំដែនជាំ (Chong Chom) ប្រព័ន្ធផ្សព្វផ្សាយមួយផ្សេងទៀតគឺ Thai Enquirer បានទទួលស្គាល់ថា ដំណើរទស្សនកិច្ចនេះបានធ្វើឡើងទៅកាន់អគារកាស៊ីណូ Royal Hill ក្នុងអូរស្មាច់ ខេត្តឧត្តរមានជ័យ របស់កម្ពុជា។
ទោះជាយ៉ាងណាក៏ដោយ លោក ធីTeeranan Nandhakwang បានទទួលស្គាល់ថា កងទ័ពថៃគ្រប់គ្រងទឹកដីកម្ពុជាប្រហែល ១០០ រ៉ៃ (១៦០,០០០ ម៉ែត្រការ៉េ) នៅតំបន់នេះ។
លោក Teeranan Nandhakwang បានប្រកាសថា ការគ្រប់គ្រងតំបន់នេះនាពេលអានគតនឹងត្រូវចរចាតាមរយៈយន្តការទ្វេភាគី រួមទាំង JBC និង GBC ប៉ុន្តែលោកបានបញ្ជាក់ថា កងកម្លាំងថៃនឹងរារាំងភាគីកម្ពុជាមិនឲ្យចូលទៅតំបន់នេះទេ ហើយភាពមិនច្បាស់លាស់នេះនឹងបន្តរហូតដល់រដ្ឋាភិបាលថៃថ្មីត្រូវបានបង្កើតឡើង។
មន្ត្រីជាន់ខ្ពស់កម្ពុជាម្នាក់ដែលសុំមិនបញ្ចេញឈ្មោះបាននិយាយថា តំបន់នេះគឺជាទឹកដីកម្ពុជា មិនមែនជាផ្នែកមួយនៃស្រុកកាប់ជើង (Kap Choeng) ក្នុងខេត្តសុរិន្ទរបស់ថៃដូចដែល The Nation បានអះអាងនោះទេ។ មន្ត្រីរូបនេះបានបញ្ជាក់ថា បន្ទាប់ពីគ្រប់គ្រងតំបន់នេះដោយខុសច្បាប់ក្រោយបទឈប់បាញ់ កងទ័ពថៃកំពុងអនុវត្តគោលការណ៍ fait accompli ឬ ការបង្កើតស្ថានភាពថ្មីនៅនឹងកន្លែង, អនុវត្តច្បាប់ថៃមកលើកម្ពុជា និងបង្វែរការចាប់អារម្មណ៍ពីការកាន់កាប់ដោយខុសច្បាប់របស់ពួកគេ ទៅផ្តោតលើការចោទប្រកាន់ពីការឆបោកតាមអនឡាញ។
លោកថ្លែងដូច្នេះថា៖ «កម្ពុជាគាំទ្រយ៉ាងពេញទំហឹងនូវកិច្ចសហប្រតិបត្តិការអន្តរជាតិដើម្បីប្រយុទ្ធប្រឆាំងនឹងឧក្រិដ្ឋកម្មតាមប្រព័ន្ធអ៊ីនធឺណិតឆ្លងដែន និងការជួញដូរមនុស្សក្នុងប្រតិបត្តិការបោកប្រាស់។ ទោះជាយ៉ាងណាក៏ដោយ យើងបដិសេធយ៉ាងដាច់អហង្ការចំពោះការកាន់កាប់ដោយយោធាណាមួយលើទឹកដីអធិបតេយ្យរបស់កម្ពុជាដោយអះអាងថាជាការអនុវត្តច្បាប់»។
លោកបន្តថា៖ «អូរស្មាច់គឺជាច្រកទ្វារព្រំដែនដែលត្រូវបានទទួលស្គាល់ជាអន្តរជាតិដែលបានព្រមព្រៀងដោយភាគីទាំងពីរ។ ការដាក់វត្តមានមន្ត្រីយោធាបរទេសនៅទីនោះ គឺជាភស្តុតាងយ៉ាងច្បាស់ដែលថាទាហានថៃពិតជាបានឈ្លានពាន និងកំពុងកាន់កាប់ទឹកដីកម្ពុជាដោយខុសច្បាប់»។
អ្នកស្រុកម្នាក់បានប្រាប់ភ្នំពេញប៉ុស្តិ៍ថា ច្រកអូរស្មាច់មិនមានការប្រយុទ្ធគ្នាទេក្នុងអំឡុងខែកក្កដា ហើយសូម្បីនៅក្នុងសង្គ្រាមខែធ្នូ ក៏មិនមានអ្វីកើតឡើងធ្ងន់ធ្ងរដែរ ទើបតែនៅថ្ងៃបទឈប់បាញ់ គឺថ្ងៃទី ២៧ ខែធ្នូទេ ដែលយោធាថៃសម្រុគបាញ់ទៅលើតំបន់នេះ។
យោងតាមក្រសួងការបរទេស និងសហប្រតិបត្តិការអន្តរជាតិ បច្ចុប្បន្ន យោធាថៃកំពុងកាន់កាប់ទីតាំងយ៉ាងតិច ១៤ កន្លែងក្នុងខេត្តរបស់កម្ពុជាចំនួន ៤ រួមមាន៖ ព្រះវិហារ ឧត្តរមានជ័យ បន្ទាយមានជ័យ និងពោធិ៍សាត់។
លោក គិន ភា នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងថា ការនាំមន្ត្រីយោធាបរទេស និងមន្ត្រី FBI អាមេរិកទៅទស្សនាតំបន់ទឹកដីនៃរដ្ឋអធិបតេយ្យមួយទៀតគឺជារឿងខុសច្បាប់ ដោយមិនរាប់បញ្ជូលថាតើទស្សនកិច្ចនេះធ្វើទៅកាន់មជ្ឈមណ្ឌលបោកប្រាស់តាមប្រព័ន្ធអ៊ីនធឺណិតដូចដែលថៃចោទប្រកាន់ឬយ៉ាងណានោះទេ។
លោកថ្លែងថា៖ «ប្រទេសថៃគ្មានអំណាចក្នុងការគ្រប់គ្រង ឬនាំប្រតិភូបរទេសចូលធ្វើអ្វីនៅក្នុងទឹកដីកម្ពុជានោះទេ។ នេះគឺជាការរំលោភលើកិច្ចព្រមព្រៀងបទឈប់បាញ់ និងកិច្ចព្រមព្រៀងសន្តិភាពទីក្រុងកូឡាឡាំពួ ព្រមទាំងកិច្ចព្រមព្រៀង ៥ ចំណុចដែលបានធ្វើឡើងនៅក្នុងកិច្ចប្រជុំបឹងហ្វូសៀន (Fuxian Lake Meeting) ក្នុងប្រទេសចិន។ នេះក៏ជាការរំលោភបំពានលើធម្មនុញ្ញអាស៊ាន និងធម្មនុញ្ញអង្គការសហប្រជាជាតិផងដែរ ដែលហាមប្រាមការកាន់កាប់ដោយខុសច្បាប់នៃប្រទេសមួយទៀត»។
លោក គិន ភា បានជំរុញឱ្យក្រសួងពាក់ព័ន្ធរបស់កម្ពុជា ដូចជាក្រសួងការបរទេស ក្រសួងការពារជាតិ ព្រមទាំងលេខាធិការដ្ឋានគណៈកម្មាធិការព្រំដែន ធ្វើការតវ៉ាជាសាធារណៈចំពោះសកម្មភាពបែបនេះដែលបានធ្វើឡើងដោយប្រទេសថៃ។
លោកថ្លែងថា៖ «ប្រទេសថៃកំពុងបង្កើតគោលការណ៍ fait accompli គឺការបង្កើតភាពធម្មតាថ្មីនៅលើដី ដើម្បីអះអាងថាតំបន់នោះជារបស់ពួកគេ។ ការណ៍នេះត្រូវតែមានការបដិសេធទាំងស្រុងដោយរដ្ឋាភិបាលកម្ពុជា»៕
