ភ្នំពេញ៖ ក្រុមសម្របសម្រួល (CLG) កម្ពុជា នៅថ្ងៃព្រហស្បតិ៍ បានសម្របសម្រួលជូនក្រុមអ្នកសង្កេតការណ៍អាស៊ាន (AOT) ចុះសង្កេតការណ៍នៅតំបន់ប្រាសាទព្រះវិហារ ដើម្បីអនុញ្ញាតឱ្យអ្នកសង្កេតការណ៍តំបន់ ពិនិត្យ ផ្ទៀងផ្ទាត់ និងវាយតម្លៃស្ថានភាពជាក់ស្តែងនៅលើទីតាំងផ្ទាល់ បន្ទាប់ពីបទឈប់បាញ់រវាងកម្ពុជា និងថៃ បានចូលជាធរមានអស់រយៈពេលពីរខែ។
ដំណើរចុះសង្កេតការណ៍នេះ បានប្រព្រឹត្តទៅនៅវេលាម៉ោង ១០:០០នាទីព្រឹក ថ្ងៃទី២៦ ខែកុម្ភៈ ឆ្នាំ២០២៦ ស្ថិតក្នុងស្រុកជាំក្សាន្ត ខេត្តព្រះវិហារ យោងតាមសេចក្តីប្រកាសព័ត៌មានដែលចេញផ្សាយដោយ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ។
ក្នុងសេចក្តីប្រកាសព័ត៌មាន លោកស្រី សុជាតា បានបញ្ជាក់ថា៖ «ក្រុមអ្នកសង្កេតការណ៍អាស៊ាន ត្រូវបានសម្របសម្រួលឱ្យចុះសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពជាក់ស្តែងនៅក្នុងតំបន់ ក្រោយបទឈប់បាញ់បានចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ បន្ទាប់ពីមានភាពតានតឹងឡើងវិញតាមបណ្តោយព្រំដែន»។
សេចក្តីប្រកាសដដែល បានឱ្យដឹងថា ចាប់តាំងពីពេលបទឈប់បាញ់ចូលជាធរមានមក កម្ពុជាតែងតែគោរព និងអនុវត្តយ៉ាងខ្ជាប់ខ្ជួននូវលក្ខខណ្ឌនៃបទឈប់បាញ់ ព្រមទាំងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥។
រាជរដ្ឋាភិបាលកម្ពុជា ក៏បានបញ្ជាក់ឡើងវិញពីការប្តេជ្ញាចិត្តអនុវត្តតាមលទ្ធផលនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានប្រារព្ធឡើងកាលពីថ្ងៃទី២៧ ខែធ្នូ ឆ្នាំ២០២៥ ផងដែរ។
ថៃសាងសង់ផ្លូវមួយ ជាកន្លែងដែលកងទ័ពរបស់ខ្លួនកាន់កាប់ បន្ទាប់ពីបទឈប់បាញ់ចូលជាធរមាន ដែលនាំទៅដល់តំបន់ប្រាសាទព្រះវិហារ។ រូបថត សហការី
សេចក្តីប្រកាសបានបន្ដថា៖ «កម្ពុជានៅតែបន្តប្តេជ្ញាចិត្តចំពោះកិច្ចព្រមព្រៀងពាក់ព័ន្ធទាំងអស់ ដោយមានគោលបំណងស្វែងរកដំណោះស្រាយមួយដែលយុត្តិធម៌ ត្រឹមត្រូវ និងយូរអង្វែង ស្របតាមច្បាប់អន្តរជាតិ »។
ក្រសួងការពារជាតិ បានបន្ថែមថា កម្ពុជារំពឹងថា ភាគីថៃនឹងគោរព និងអនុវត្តកិច្ចព្រមព្រៀងទាំងអស់ដោយសុឆន្ទៈ និងភាពស្មោះត្រង់ដូចកម្ពុជាដែរ ដោយបញ្ជាក់ពីការអំពាវនាវឲ្យមានការអនុវត្តតាមកាតព្វកិច្ចទៅវិញទៅមក ជាមូលដ្ឋានសម្រាប់សន្តិភាពយូរអង្វែងតាមបណ្តោយព្រំដែនដែលមានភាពរសើប។
ការចុះសង្កេតការណ៍របស់ក្រុមអ្នកសង្កេតការណ៍អាស៊ាន លើកនេះ ត្រូវបានមើលឃើញថា ជាការបន្តកិច្ចខិតខំប្រឹងប្រែងក្នុងកម្រិតតំបន់ ដើម្បីថែរក្សាបទឈប់បាញ់ដែលនៅមានភាពផុយស្រួយ និងធានាភាពបើកចំហ និងតម្លាភាពនៅតំបន់ប្រាសាទព្រះវិហារ ដែលធ្លាប់ជាចំណុចក្តៅក្នុងទំនាក់ទំនងរវាងប្រទេសជិតខាងទាំងពីរ៕
