ឧត្តមសេនីយ៍ដ៏ល្បីឈ្មោះម្នាក់នៅក្នុងជួរយោធារុស្ស៊ី ត្រូវបានបាញ់ប្រហារជាច្រើនគ្រាប់ និងរងរបួសនៅក្នុងទីក្រុងមូស្គូ។
ឧត្តមសេនីយ៍ទោ Vladimir Alexeyev ត្រូវបានបញ្ជូនទៅកាន់មន្ទីរពេទ្យភ្លាមៗ បន្ទាប់ពីរងការវាយប្រហារនៅក្នុងអគារស្នាក់នៅមួយកន្លែងនៅតំបន់ជាយក្រុងភាគពាយ័ព្យ ហើយស្ថានភាពរបស់លោកមិនទាន់ត្រូវបានគេដឹងនៅឡើយទេ។
លោក Alexeyev គឺជាមន្ត្រីកំពូលនៅក្នុងអគ្គនាយកដ្ឋាននៃអគ្គសេនាធិការយោធារុស្ស៊ី (GRU) ហើយលោកគឺជាឥស្សរជនយោធាជាន់ខ្ពស់ចុងក្រោយគេ ដែលត្រូវបានគេកំណត់គោលដៅ ចាប់តាំងពីការឈ្លានពានពេញទីទៅលើអ៊ុយក្រែនដែលបានចាប់ផ្តើមជិត ៤ ឆ្នាំមកហើយ។
លោកត្រូវបានដាក់ឱ្យស្ថិតនៅក្រោមទណ្ឌកម្មរបស់សហភាពអឺរ៉ុប បន្ទាប់ពី GRU ត្រូវបានចោទប្រកាន់ថា បាននៅពីក្រោយការវាយប្រហារដោយសារធាតុពុលដែលបង្កជំងឺសរសៃប្រសាទកាលពីឆ្នាំ ២០១៨ នៅក្នុងទីក្រុង Salisbury ចក្រភពអង់គ្លេស។
លោកស្រី Svetlana Petrenko នៃគណៈកម្មាធិការស៊ើបអង្កេតរបស់រុស្ស៊ី បាននិយាយថា៖ «ជនរងគ្រោះត្រូវបានបញ្ជូនទៅសម្រាកព្យាបាលនៅមន្ទីរពេទ្យមួយក្នុងចំណោមមន្ទីរពេទ្យនានាក្នុងទីក្រុង»។
លោក Alexeyev មានតួនាទីយ៉ាងសំខាន់ក្នុងអំឡុងពេលសង្គ្រាមនៅអ៊ុយក្រែន ដោយបានចូលរួមក្នុងកិច្ចចរចាជាមួយអ៊ុយក្រែន ក្នុងអំឡុងពេលរុស្ស៊ីឡោមព័ទ្ធទីក្រុង Mariupol កាលពីឆ្នាំ ២០២២។
លោកក៏ត្រូវបានបញ្ជូនទៅចរចាជាមួយប្រធានក្រុមទាហានស៊ីឈ្នួល Wagner គឺលោក Yevgeny Prigozhin ដែលបានដឹកនាំការបះបោររយៈពេលខ្លី និងបង្ហូរឈាមកាលពីខែមិថុនា ឆ្នាំ ២០២៣ ផងដែរ។
គេនៅមិនទាន់ដឹងថា តើនរណាជាអ្នកនៅពីក្រោយការបាញ់ប្រហារកាលពីព្រឹកថ្ងៃសុក្រនេះទេ នៅក្នុងអគារស្នាក់នៅមួយលើផ្លូវ Volokolamsk Highway ក្នុងទីក្រុងមូស្គូនោះ។
កន្លងមក អ៊ុយក្រែនធ្លាប់បានអះអាងទទួលខុសត្រូវលើការវាយប្រហារមួយចំនួនមកលើឥស្សរជនយោធារុស្ស៊ី។ មន្ត្រីស៊ើបការណ៍សម្ងាត់រុស្ស៊ីបានអះអាងថា ពួកគេបានទប់ស្កាត់ការប៉ុនប៉ងវាយប្រហារលើទាហានរុស្ស៊ីម្នាក់នៅទីក្រុង St Petersburg នៅចុងខែមុន៕