កម្ពុជាដាក់ចេញយុទ្ធនាការបង្ក្រាបគ្រឿងញៀនលើកទី១១ ខណៈដែលអំពើជួញដូរគ្រឿងញៀនសាកលនៅតែកើនឡើង។ នៅឆ្នាំ២០២៥ កម្ពុជារឹបអូសគ្រឿងញៀនបាន ៥ ៨៩៧ គីឡូក្រាម និងសារធាតុគីមីផ្សំប្រមាណ ៤២ ៨១៤ គីឡូក្រាម។ នេះបើយោងតាមឯកសារយុទ្ធនាការបង្ក្រាបគ្រឿងញៀនឆ្នាំ២០២៦ របស់លោកនាយករដ្ឋមន្ត្រី ហ៊ុន ម៉ាណែត។
លោក ហ៊ុន ម៉ាណែត ថ្លែងថា នៅឆ្នាំ២០២៥កន្លងទៅ និន្នាការនៃឧក្រិដ្ឋកម្មគ្រឿងញៀនជាសកល នៅតែបន្តប្រែប្រួលស្មុគស្មាញ និង មានកំណើនគួរឱ្យបារម្ភ ជាពិសេសការប្រែប្រួលទាំងរូបភាពនិងសកម្មភាពនៃការផលិត ការកែច្នៃ ការជួញដូរ ច្រកដឹកជញ្ជូនឆ្លងកាត់ និងការពង្រីកភូមិសាស្ត្រនៃការប្រើប្រាស់។ កម្ពុជាក៏ទទួលរងផលអវិជ្ជមាននៃនិន្នាការនេះដែរ។
យោងតាមឯកសារដដែល វិធានការច្បាប់បានឈានទៅដល់ការបិទទីតាំងអាជីវកម្មដែលជាប់ពាក់ព័ន្ធគ្រឿងញៀនចំនួន ១២ កន្លែង, ប្រតិបត្តិការបង្ក្រាបបទល្មើសគ្រឿងញៀន ១០ ៧៤៣ ករណី ដោយឃាត់ខ្លួន ជនសង្ស័យសរុបចំនួន ២៧ ៨៨៤ នាក់។
ក្នុងអំឡុងពេលនេះដែរ សមត្ថកិច្ចបានបញ្ជូនអ្នកញៀនគ្រឿងញៀនទៅទទួលការព្យាបាល និងស្តារនីតិសម្បទាសរុបចំនួន ១៦ ២១៦ នាក់ និងបានធ្វើសមាហរណកម្មចូលក្នុងគ្រួសារនិងសហគមន៍វិញ សរុបចំនួន ១០ ៦៤០ នាក់។
កាលពីឆ្នាំមុន លោកនាយករដ្ឋមន្ត្រី ក៏បានដាក់ចេញបទបញ្ជាលេខ០១ បប ស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួងស្ថាប័ននិងរដ្ឋបាលថ្នាក់ក្រោមជាតិ ដោយបានធ្វើតេស្តមន្ត្រីរាជការ និងកងកម្លាំង ប្រដាប់អាវុធសរុបចំនួន ១៣១ ៤៧៣ នាក់ រកឃើញវិជ្ជមានចំនួន ១០៤ នាក់ ក្នុងនោះ ១០៣ នាក់ ត្រូវបានបញ្ចប់មុខតំណែងនិងបណ្ដេញចេញពីក្របខណ្ឌ ហើយ ១នាក់ កំពុងបន្តនីតិវិធី។
ក្រៅពីវិធានការច្បាប់ អាជ្ញាធរក៏បានរៀបចំការអប់រំតាមគ្រប់មធ្យោបាយចំនួន២០៨ ៣១៨ លើក ដែលមានអ្នកចូលរួមនិងទទួលសារអប់រំក្នុងម្នាក់អាចទទួលសារអប់រំលើសពីម្តង ២៣ ៣០១ ៤៤២ នាក់។
នៅក្នុងលិខិតនេះ លោក ហ៊ុន ម៉ាណែត បានប្រាប់ឲ្យអាជ្ញាធរពាក់ព័ន្ធបន្តអនុវត្តយុទ្ធនាការលើកទី១១នេះ ឲ្យបានផុសផុល ទាំងការបង្ក្រាប និងការអប់រំ ក៏ដូចជាការព្យាបាល ស្ដារនីតិសម្បទាអ្នកញៀនគ្រឿងញៀន៕ភ្នំពេញប៉ុស្តិ៍
