កម្ពុជា-បារាំង បានសន្យានឹងខិតខំជំរុញកិច្ចសហប្រតិបត្តិការសេដ្ឋកិច្ច និងវិនិយោគជាមួយគ្នាឱ្យកាន់តែរីកចម្រើនបន្ថែមទៀត ខណៈទំហំពាណិជ្ជកម្មរវាងប្រទេសទាំង ២ កាលពីឆ្នាំ២០២៥ សម្រេចបានជិត ៥៧០ លានដុល្លារ។
ការអះអាងនេះធ្វើឡើងក្នុងជំនួបរវាង លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) ជាមួយនឹង លោក Thomas Lam សមាជិកសភា និងជាប្រធានក្រុមមិត្តភាពរដ្ឋសភាកម្ពុជា-បារាំង នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៤ ខែកុម្ភៈ ឆ្នាំ២០២៦។
ជាកិច្ចចាប់ផ្តើម លោក សួន សុផល បានស្វាគមន៍ចំពោះដំណើរទស្សនកិច្ចរបស់គណៈប្រតិភូបារាំងដែលមកបំពេញទស្សនកិច្ចនៅកម្ពុជាដោយផ្ទាល់ និងបានមកជួបពិភាក្សាជាមួយតំណាង CDC ក្នុងន័យដើម្បីផ្លាស់ប្តូរទស្សនៈពីការពង្រឹងកិច្ចសហប្រតិបត្តិការសេដ្ឋកិច្ច និងវិនិយោគទ្វេភាគីឱ្យកាន់តែប្រសើរ។ លោកបានរំលឹកថា ប្រមុខរដ្ឋាភិបាលប្រទេសទាំង ២ សុទ្ធតែមានការប្តេជ្ញាចិត្តខ្ពស់ក្នុងការបន្តពូនជ្រុំទំនាក់ទំនងជាប្រវត្តិសាស្ត្ររវាងប្រទេសទាំង ២ ជាពិសេសការលើកកម្ពស់សកម្មភាពពាណិជ្ជកម្ម និងវិនិយោគទ្វេភាគី តាមរយៈការផ្សារភ្ជាប់ធុរកិច្ចបារាំងដែលមានសក្តានុពលចូលមកកាន់ទីផ្សារកម្ពុជា។
លោកបានប្រាប់ភាគីបារាំងទៀតថា បច្ចុប្បន្នរាជរដ្ឋាភិបាលកម្ពុជាកំពុងខិតខំយ៉ាងខ្លាំងក្នុងការកែលម្អបរិយាកាសវិនិយោគ តាមរយៈការដាក់ចេញនូវរបបវិនិយោគដែលមានភាពឆ្លាតវៃ និងអនុគ្រោះខ្ពស់, ការអភិវឌ្ឍហេដ្ឋារចនាសម្ព័ន្ធរូបវន្ត, ការបណ្តុះបណ្តាលកម្លាំងពលកម្មឱ្យស្របតាមតម្រូវការទីផ្សារ, ព្រមទាំងការដាក់ចេញនូវយន្តការកិច្ចសន្ទនារវាងរដ្ឋ និងផ្នែកឯកជនកម្ពុជា-សហភាពអឺរ៉ុប(ប្រទេសបារាំង គឺជាសមាជិកសហភាពអ៊ឺរ៉ុប) ដែលបានប្រព្រឹត្តទៅចំនួន ៣ លើករួចមកហើយ ដើម្បីកសាងជំនឿទុកចិត្ត និងដោះស្រាយរាល់កង្វល់របស់វិនិយោគិនប្រកបដោយប្រសិទ្ធភាព។
លោកថ្លែងថា៖«ខ្ញុំសូមស្នើឱ្យក្រុមមិត្តភាពកម្ពុជា-បារាំង បន្តរួមគ្នាដាក់ចេញនូវគំនិតផ្តួចផ្តើម និងផែនការសកម្មភាពនានាសំដៅពង្រឹងទំនាក់ទំនងធុរជន និងធុរជន(B2B) នៃប្រទេសទាំងពីរ ជាពិសេសការចាប់យកកាលានុវត្តភាពនៃកិច្ចប្រជុំកំពូលហ្រ្វង់កូហ្វូនីលើកទី២០ ដែលកម្ពុជានឹងធ្វើជាម្ចាស់ផ្ទះ ដើម្បីរៀបចំវេទិកាវិនិយោគ និងធុរកិច្ចឱ្យក្លាយជាព្រឹត្តិការណ៍អមដ៏មានសារៈសំខាន់មួយ»។
ក្នុងនាមតំណាងស្ថាប័ននីតិប្បញ្ញត្តិបារាំង លោក Thomas Lam បានបង្ហាញពីការប្តេជ្ញាចិត្តបន្តជំរុញធុរកិច្ចបារាំងលើវិស័យកសិឧស្សាហកម្ម, យានយន្ត, អេឡិចត្រូនិក, សុខាភិបាល និងភស្តុភារកម្ម ឱ្យចូលមកវិនិយោគនៅកម្ពុជា។ ជាមួយគ្នានេះភាគីបារាំងក៏បានសន្យាជំរុញឱ្យក្រុមហ៊ុនបារាំងចូលរួមយ៉ាងសកម្មក្នុង «វេទិកាវិនិយោគ និងធុរកិច្ច» ដែលនឹងត្រូវរៀបចំឡើងអមជាមួយកិច្ចប្រជុំកំពូលហ្រ្វង់កូហ្វូនីលើកទី២០ ដែលកម្ពុជានឹងធ្វើជាម្ចាស់ផ្ទះនាពេលខាងមុខ។
លោកបាននិយាយថា៖«ខ្ញុំសូមសម្តែងការអបអរសាទរចំពោះកម្ពុជាក្នុងការទទួលធ្វើជាម្ចាស់ផ្ទះនៃកិច្ចប្រជុំកំពូលហ្រ្វង់កូហ្វូនីលើកទី២០ និងសន្យានឹងបន្តជំរុញឱ្យធុរកិច្ចបារាំងដែលមានសក្តានុពលខ្ពស់ ឱ្យមកចាប់ផ្តើម និងពង្រីកប្រតិបត្តិការវិនិយោគនៅកម្ពុជាលើវិស័យដែលមានស្រាប់ ក៏ដូចជាវិស័យដែលទាក់ទាញនវានុវត្តន៍នានារួមមានវិស័យកសិឧស្សាហកម្ម, គណនេយ្យ និងហិរញ្ញវត្ថុ, ទេសចរណ៍, យានយន្ត និងអេឡិចត្រូនិក, សុខាភិបាល, និងភស្តុភារកម្ម ដើម្បីជំរុញកំណើនសេដ្ឋកិច្ចនៃប្រទេសទាំងពីរឱ្យកាន់តែរីកចម្រើន»។
តាមការផែនការប្រទេសកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលហ្រ្វង់កូហ្វូនីលើកទី២០ (កិច្ចប្រជុំកំពូលក្រុមប្រទេសនិយាយភាសាបារាំង) នៅខែវិច្ឆិកា ឆ្នាំ២០២៦។ កិច្ចប្រជុំនេះនឹងមានការចូលរួមពីសំណាក់ប្រមុខដឹកនាំប្រទេសជាច្រើន ក្នុងនោះក៏នឹងមានប្រធានាធិបតីបារាំង លោក អេម៉ានុយអែល ម៉ាក្រុង ផងដែរ។
ទិន្នន័យអគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ២០២៥ ការផ្លាស់ប្តូរទំនិញរវាងកម្ពុជា-បារាំងមានទឹកប្រាក់សរុប ៥៦៨,៧៤ លានដុល្លារ កើន ១១,៧% បើធៀបឆ្នាំ២០២៤ ក្នុងនោះកម្ពុជានាំទៅបារាំង ៤៤៧,៥២ លានដុល្លារ កើន ១២,៥% ចំណែកបារាំងនាំចូលវិញ ១២១,២១ លានដុល្លារ កើន ៩%។ បារាំង គឺជាដៃគូពាណិជ្ជកម្មធំជាងគេទី១៦ របស់កម្ពុជា។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៥ ខែកុម្ភៈថា ទំនាក់ទំនងរវាងប្រទេសកម្ពុជា-បារាំង គឺមានរយៈពេលជិត ២ សតវត្សមកហើយ ដូច្នេះប្រសិនបើបារាំងចូលមកវិនិយោគនៅកម្ពុជាគឺជាការល្អណាស់។ បារាំង គឺជាប្រទេសមានសេដ្ឋកិច្ចរីកចម្រើន និងធំមួយនៅតំបន់អឺរ៉ុប ដូច្នេះបើរដ្ឋាភិបាលបារាំងជួយលើកទឹកចិត្តវិនិយោគិនរបស់ខ្លួនឱ្យមកបើករោងចក្រផលិតនៅកម្ពុជាដើម្បីនាំចេញទៅទីផ្សាររបស់ខ្លួន ឬតំបន់អឺរ៉ុប គឺជាការចូលរួមចំណែកយ៉ាងច្រើនដល់កំណើនសេដ្ឋកិច្ចកម្ពុជា។
លោកថ្លែងថា៖«ក្រៅពីធ្លាប់ដាក់អាណានិគមលើប្រទេសកម្ពុជា ប្រទេសបារាំងក៏មានទំនាក់ទំនងការទូត និងពាណិជ្ជកម្មល្អជាមួយកម្ពុជាដែរ។ ក្នុងនាមជាប្រទេសកំពុងអភិវឌ្ឍន៍ គឺយើងពិតជាចង់ឃើញវិនិយោគិនបារាំង និងជនបរទេសផ្សេងទៀតចូលមកវិនិយោគផ្ទាល់នៅកម្ពុជាកាន់តែច្រើន»។
បើគិតចាប់ពីឆ្នាំ១៩៩៤ មកដល់ពាក់កណ្តាលឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងវិនិយោគមានលក្ខណៈសម្បត្តិគ្រប់គ្រាន់មកពីប្រទេសបារាំងសរុបចំនួន ៤៤ គម្រោងដែលមានទុនវិនិយោគប្រមាណ ៣៨០ លានដុល្លារ។ នេះបើយោងតាម CDC៕
