កម្ពុជា និងអូស្ត្រាលី កំពុងពង្រឹងកិច្ចសហប្រតិបត្តិការកាន់តែជិតស្និទ្ធក្នុងការការពារបរិស្ថាន និងធនធានធម្មជាតិស្របតាមយុទ្ធសាស្រ្តចក្រាវិស័យបរិស្ថាន តាមរយៈការអនុវត្តនូវគម្រោងរួមគ្នាការពារទន្លេមេគង្គ ដោយបានរៀបចំឱ្យមាន អនុក្រឹត្យស្តីពីនីតិវិធីនៃការវាយតម្លៃបរិស្ថានជាយុទ្ធសាស្ត្រ (SEA)។
យោងតាមក្រសួងបរិស្ថាន អនុក្រឹត្យស្តីពីនីតិវិធីនៃការវាយតម្លៃបរិស្ថានជាយុទ្ធសាស្ត្រ (SEA) គឺជាមូលដ្ឋានគ្រឹះផ្នែកច្បាប់ និងការណែនាំប្រតិបត្តិ សម្រាប់ការអនុវត្តនៅកម្ពុជា ហើយមានគោលបំណង ធានានូវការអភិវឌ្ឍប្រកបដោយចីរភាព និងបរិយាបន្ននៅក្នុងតំបន់ទន្លេមេគង្គ។
កិច្ចសហប្រតិបត្តិការនេះ ត្រូវបានបញ្ជាក់តាមរយៈការចុះហត្ថលេខាលើលិខិតព្រមព្រៀងរវាងក្រសួងបរិស្ថាន និង អង្គការមូលនិធិអាស៊ី (The Asia Foundation) ស្ដីពីការរៀបចំអនុក្រឹត្យស្ដីពី នីតិវិធីនៃការវាយតម្លៃបរិស្ថានជាយុទ្ធសាស្ត្រ និងការអភិវឌ្ឍសមត្ថភាពស្ថាប័ននៅកម្ពុជា នាថ្ងៃទី ១២ ខែកុម្ភៈ ឆ្នាំ២០២៦ នៅទីស្តីការក្រសួងបរិស្ថាន។
លោក ជួប ប៉ារីស៍ រដ្ឋលេខាធិការក្រសួងបរិស្ថាន ត្រូវបានចាត់តាំងជាតំណាងក្រសួងបរិស្ថាន ដើម្បីចុះហត្ថលេខាដោយផ្ទាល់ជាមួយលោកស្រី Meloney C. Lindberg តំណាងអង្គការមូលនិធិអាស៊ីប្រចាំកម្ពុជា ដោយមានលោក Derek Yip ឯកអគ្គរដ្ឋទូតអូស្រ្តាលីប្រចាំកម្ពុជា ជាសាក្សី ក្រោមអធិបតីភាពលោក អ៊ាង សុផល្លែត រដ្ឋមន្រ្តីក្រសួងបរិស្ថាន។
ក្រសួងបរិស្ថានបានដឹងថា អនុក្រឹត្យស្តីពីនីតិវិធីនៃការវាយតម្លៃបរិស្ថានជាយុទ្ធសាស្ត្រ បានដើរតួនាទីយ៉ាងសំខាន់ក្នុងការបញ្ជ្រាបបញ្ហាបរិស្ថានទៅក្នុងការរៀបចំគោលនយោបាយ ផែនការ និងកម្មវិធីតាមវិស័យនីមួយៗ។
ក្រសួងបរិស្ថានបញ្ជាក់ថា៖ «ការវាយតម្លៃបរិស្ថាន មិនមែនគ្រាន់តែជាការណែនាំបច្ចេកទេសក្នុងជួយបង្កើនសក្តានុពលការវាយតម្លៃបរិស្ថានជាយុទ្ធសាស្រ្តប៉ុណ្ណោះទេ តែវាគឺជាឧបករណ៍ប្រមើលមើលពីសក្តានុពលនៃផលប៉ះពាល់បរិស្ថាន និងសង្គម ដែលអនុញ្ញាតឱ្យយើងបញ្ជូលទៅក្នុងគោលនយោបាយ កម្មវិធី និងផែនការថ្នាក់ជាតិ និងតាមវិស័យ ធានានូវកំណើនសេដ្ឋកិច្ច មានដំណើរទៅព្រមជាមួយនឹងគោលដៅបរិស្ថានប្រកបដោយចីរភាព»។
បន្ថែមលើនេះ ការវាយតម្លៃបរិស្ថានជាយុទ្ធសាស្ត្រ ក៏បានបង្កើតឱកាសសម្រាប់ការអភិវឌ្ឍបៃតង ក្នុងវិស័យឧស្សាហកម្ម រ៉ែ ថាមពល កសិកម្ម ទេសចរណ៍ ហេដ្ឋារចនាសម្ព័ន្ធ ប្រព័ន្ធទូរគមនាគមន៍ និងវិស័យសំខាន់ៗ ដែលមានចែងក្នុងក្រមបរិស្ថាន និងធនធានធម្មជាតិ ហើយក៏នឹងរួមចំណែកយ៉ាងសំខាន់ក្នុងការបង្កើនគុណភាពនៃការអនុវត្តការវាយតម្លៃហេតុប៉ះពាល់បរិស្ថានផងដែរ៕