លោក Moran Hadad ប្រធានសភាពាណិជ្ជកម្មអ៊ីស្រាអែល (CICC) បានលើកឡើងពីគោលបំណងក្នុងការនាំយកជំនាញឈានមុខគេផ្នែកបច្ចេកវិទ្យា និងនវានុវត្តន៍របស់អ៊ីស្រាអែលមកកាន់កម្ពុជា ដើម្បីចូលរួមចំណែកជំរុញសន្ទុះនៃការអភិវឌ្ឍវិស័យអប់រំនៅកម្ពុជា។
លោក Moran Hadad បានបង្ហាញពីបំណងនេះនៅពេលលោកចូលជួបពិភាក្សាការងារជាមួយលោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា កាលពីថ្ងៃចន្ទទី១៦ ខែកុម្ភៈ រួមជាមួយថ្នាក់ដឹកនាំរបស់ក្រសួងអប់រំ យុវជន និងកីឡាមួយចំនួនទៀត។
ការចង់ចូលរួមចំណែកជំរុញសម្ទុះការអភិវឌ្ឍវិស័យអប់រំនៅកម្ពុជានេះ លោក Moran Hadad បានបញ្ជាក់ថា នឹងត្រូវធ្វើឡើងតាមរយៈកម្មវិធីភាពជាដៃគូ ដែលមានរចនាសម្ព័ន្ធរវាងស្ថាប័នឧត្តមសិក្សាអ៊ីស្រាអែល និងកម្ពុជា ដែលផ្តោតសំខាន់លើការរៀបចំកម្មវិធីបណ្តុះបណ្តាល និងកិច្ចសហការជាមួយគ្រឹះស្ថានឧត្តមសិក្សាដែលមានកិត្យានុភាព។ ទាំងនេះគឺក្នុងគោលដៅពង្រឹងសមត្ថភាព និងផ្លាស់ប្តូរជំនាញដល់យុវជនកម្ពុជា អភិវឌ្ឍធនធានមនុស្សកម្ពុជា ស្របតាមចក្ខុវិស័យរបស់រាជរដ្ឋាភិបាល។
លោក ហង់ជួន ណារ៉ុន បានថ្លែងអំណរគុណចំពោះកិច្ចសហប្រតិបត្តិការរវាងប្រទេសកម្ពុជា និងអ៊ីស្រាអែល នាពេលកន្លងមក ជាពិសេសក្នុងវិស័យអប់រំ ហើយលោកបានសម្តែងនូវការស្វាគមន៍ចំពោះគំនិតផ្តួចផ្តើមរបស់លោក Moran Hadad ប្រធាន CICC ដែលមានបំណងចូលរួមចំណែកជំរុញសម្ទុះការអភិវឌ្ឍវិស័យអប់រំ នៅកម្ពុជា។
លោកបានចាត់ទុកគំនិតផ្តួចផ្តើមរបស់លោក Moran Hadad ថា «នឹងផ្តល់ឱកាសឱ្យភាគីទាំងពីរបានស្វែងយល់ពីវប្បធម៌ការងារគ្នាទៅវិញទៅមក និងពង្រឹងកិច្ចសហការក្នុងជំនាញជាច្រើន ជាពិសេសក្នុងជំនាញបច្ចេកវិទ្យា»។
យោងតាមក្រសួអប់រំ ក្រសួងនឹងពិនិត្យមើលលទ្ធភាពនៃកិច្ចសហប្រតិបត្តិការឱ្យបានគ្រប់ជ្រុងជ្រោយ ដើម្បីជំរុញការកសាងហេដ្ឋារចនាសម្ព័ន្ធ និងការរៀបចំការបណ្តុះបណ្តាលតាមបែបផ្លូវការឱ្យកាន់តែប្រសើរឡើង។
ក្រសួងអប់រំបានបង្ហាញការជឿជាក់ថា កិច្ចសហប្រតិបត្តិការនេះ គឺជាជំហានដ៏វិជ្ជមានមួយក្នុងការបង្កើនលទ្ធភាពទទួលបានចំណេះដឹង និងការស្រាវជ្រាវថ្មីៗ ដែលនឹងក្លាយជាគ្រឹះដ៏សំខាន់ សម្រាប់យុវជនកម្ពុជា ក្នុងការត្រៀមខ្លួនសម្រាប់នាពេលអនាគត ក្នុងយុគសម័យឌីជីថលនេះ៕
