លោកនាយករដ្ឋមន្ត្រី ហ៊ុន ម៉ាណែត សង្ឃឹមថា ភាគីថៃនឹងវិលមកបន្តការចរចា វាស់វែងបោះបង្គោលព្រំដែនឡើងវិញតាមយន្តការ គណៈកម្មការចម្រុះខណ្ឌសីមាព្រំដែនគោក (JBC) ក្រោយពេលថៃបោះឆ្នោត រួចរាល់ ដើម្បីបញ្ជៀសការលំបាកសម្រាប់ប្រជាជននៅព្រំដែន។ លោកបញ្ជាក់ថា កម្ពុជាការពារអធិបតេយ្យភាព បូរណភាពទឹកដី ដែលទទួលស្គាល់ដោយច្បាប់អន្តរជាតិ។
លោក ហ៊ុន ម៉ាណែត ថ្លែងថា៖ «ពិតណាស់ ឥឡូវធ្វើមិនទាន់កើត ដោយសារការបោះឆ្នោតនៅថៃ ប៉ុន្តែទៅមុខទៀត យើងសង្ឃឹមថា យន្តការនេះគឺជាអ្វីដែលនឹងត្រូវប្រើដើម្បីធានានូវសន្តិភាពរវាងប្រទេសទាំងពីរ ឲ្យប្រជាជននៅព្រំដែននៃប្រទេទាំងពីរកុំឲ្យមានការលំបាកដូច ៦ខែកន្លងមកនេះ»។
លោកថ្លែងដូច្នេះ ក្នុងពិធីជួបសំណេះសំណាលជាមួយសិស្សជាប់បាក់ឌុបនិទ្ទេស A នៅព្រឹកថ្ងៃទី១០ ខែកុម្ភៈនេះ។
លោកថ្លែងបន្តថា៖ «ពាក់ព័ន្ធនឹងព្រំដែនកម្ពុជាថៃ គឺព្រំដែនអន្តរជាតិ រវាងរដ្ឋនិងរដ្ឋ និងត្រូវបានការពារដោយច្បាប់អន្តរជាតិ ជាពិសេសធម្មនុញ្ញអង្គការសហប្រជាជាតិ។ ហេតុដូច្នេះ កម្ពុជាប្រកាន់ជំហរដាច់ខាតក្នុងការការពារអធិបតេយ្យភាពជាតិ និងបូរណភាពទឹកដី ទាំងបច្ចុប្បន្ន ទាំងទៅអនាគត ដោយប្រើប្រាស់គ្រប់មធ្យោបាយដែលកម្ពុជាមាន ស្របតាមច្បាប់អន្តរជាតិ។ ហើយកម្ពុជាមិនទទួលស្គាល់ដាច់ខាតនូវការកែប្រែខ្សែបន្ទាត់ព្រំដែន ឬការកាន់កាប់ទឹកដីដោយខុសច្បាប់អន្តរជាតិ គឺតាមរយៈការប្រើប្រាស់កម្លាំង»។
កម្ពុជានឹងដោះស្រាយជម្លោះព្រំដែនជាមួយថៃដោយយន្តការសន្តិវិធី តាមកិច្ចព្រមព្រៀងដែលភាគីទាំងពីរបានចុះហត្ថលេខា និងឯកសារនានាដែលបន្សល់ទុកពីសម័យអាណានិគមបារាំង។ កម្ពុជារកវិធីដោះស្រាយជម្លោះនេះឲ្យចប់ ដើម្បីកុំឲ្យវាបន្តរហូតដល់មនុស្សជំនាន់ក្រោយៗទៀត។ នេះបើតាមលោក ហ៊ុន ម៉ាណែត។
លោកនាយករដ្ឋមន្ត្រីបញ្ជាក់ដែរថា ទោះបីមិនសូវឃើញគ្ឌុងគ្ឌាំង ប៉ុន្តែ រាជរដ្ឋាភិបាលមិននៅស្ងៀមទេ គ្រាន់តែពេលខ្លះមិនអាចបង្ហាញតាមរយៈការធ្វើសន្និសីទសារព័ត៌មានរាល់ថ្ងៃ។ លោកថ្លែងអំណរគុណដល់ប្រជាពរលដ្ឋទាំងក្នុងនិងក្រៅប្រទេសដែលបានបង្ហាញសាមគ្គីជាមួយគ្នាក្នុងកិច្ចការពារទឹកដី៕
