សមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) គឺជាដៃគូពាណិជ្ជកម្មដ៏សំខាន់របស់កម្ពុជា ដោយក្នុងខែដំបូងនៃឆ្នាំ២០២៦ ការផ្លាស់ប្តូរទំនិញរវាងកម្ពុជាជាមួយប្រទេសទាំងអស់នោះមានទឹកប្រាក់ប្រមាណ ៣,៧៦ ពាន់លានដុល្លារ ក្នុងនោះកម្ពុជាបានចេញជាង ៩២៧ លានដុល្លារ កើនឡើង ១៩,៣៤% និងនាំចូលមកវិញ ២,៨៣ ពាន់លានដុល្លារ កើនឡើង ១៣,៣២%។
RCEP គឺជាកិច្ចព្រមព្រៀងពាណិជ្ជកម្មលក្ខណៈតំបន់ដែលផ្តួចផ្តើមបង្កើតឡើងដោយប្រទេសសមាជិកអាស៊ានទាំង ១០ (ឆ្នាំ២០១២)។ បច្ចុប្បន្ន RCEP មានសមាជិក ១៥ ប្រទេស ដោយ ១០ប្រទេសជាសមាជិកអាស៊ាន និងប្រទេសដៃគូចំនួន ៥ រួមមាន ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។ កិច្ចព្រមព្រៀងនេះបានចូលជាធរមាននៅឆ្នាំ២០២២ ដោយផ្តោតការអនុគ្រោះពន្ធគយ និងជំរុញការវិនិយោគ។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE)បង្ហាញថា ប្រទេសសមាជិក RCEP ដែលជាដៃគូពាណិជ្ជកម្មធំរបស់កម្ពុជា រួមមាន ចិន វៀតណាម ជប៉ុន និងកូរ៉េខាងត្បូង។ ក្នុងនោះសមាជិក RCEP ដែលនាំចូលទំនិញពីកម្ពុជាច្រើនជាងគេ គឺវៀតណាម មានទឹកប្រាក់ ៣៣៧,៥៤ លានដុល្លារ កើន ២១,១% តាមពីក្រោយដោយជប៉ុន ១៧៦,៣ លានដុល្លារ កើន ១៦,៦%, ចិន ១៦៤,១៦ លានដុល្លារ កើន ៥៩,៣% និងកូរ៉េខាងត្បូង ៣៤,៦ លានដុល្លារ កើន ២៣,៥%។
ចំណែកសមាជិក RCEP ដែលនាំចូលកម្ពុជាច្រើនជាងគេ គឺចិន មានទឹកប្រាក់ ១,៧៤ ពាន់លានដុល្លារ កើនឡើង ១៩,៩%, វៀតណាម ៣៨២,២១ លានដុល្លារ ថយចុះ ២,៥%, សិង្ហបុរី ១៦៦,៦១ លានដុល្លារ កើន២៥២%, ថៃ ១៥១,០២ លានដុល្លារ ថយចុះ ៤៩,៣%, ម៉ាឡេស៊ី ១០៣,៥៩ លានដុល្លារ កើន ៣៦,២% និងប្រទេសជប៉ុន ១០០ លានដុល្លារ កើន ៣៦%។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២០ ខែកុម្ភៈថា RCEP គឺជាកិច្ចព្រមព្រៀងលក្ខណៈតំបន់ដែលមានការចូលរួមពីបណ្តាលប្រទេសមានប្រជាជនច្រើន និងសេដ្ឋកិច្ចរីកចម្រើនលំដាប់ពិភពលោក ដូចជា ចិន ជប៉ុន និងកូរ៉េខាងត្បូង។ កិច្ចព្រមព្រៀងនេះពិតជាសំខាន់សម្រាប់កម្ពុជាក្នុងការនាំចេញទំនិញកម្ពុជាទៅក្រៅប្រទេស។ វាក៏ជួយឱ្យទីផ្សារនាំចេញកាន់តែមានភាពចម្រុះ និងបើកទូលាយកាន់តែធំ។
លោកបន្តថា ក្នុងកាលៈទេសៈដែលនយោបាយ និងសេដ្ឋកិច្ចពិភពលោក ស្ថិតក្នុងភាពមិនច្បាស់លាស់គឺវាពិតជាចាំបាច់ណាស់ដែលកម្ពុជាត្រូវខិតខំស្វែងរកទីផ្សារនាំចេញផលិតផលរបស់ខ្លួនឱ្យបានកាន់តែច្រើន។
លោកបានថ្លែងថា៖«រាល់កិច្ចព្រមព្រៀងពាណិជ្ជកម្ម ទោះលក្ខណៈទ្វេភាគី ឬពហុភាគី គឺសុទ្ធតែផ្តល់ផលវិជ្ជមានដល់គូភាគីតាមរយៈការរក្សា និងជំរុញកំណើនសេដ្ឋកិច្ចជាតិឱ្យបោះជំហានទៅមុខកាន់តែលឿន។ ដោយសារ RCEP មានប្រទេសជាសមាជិកច្រើន ទំហំសេដ្ឋកិច្ច និងទីផ្សារធំ ដូច្នេះវាក៏ជួយទាក់ទាញវិនិយោគិនបរទេស ជាពិសេសក្រុមហ៊ុនលំដាប់អន្តរជាតិធំៗឱ្យមកវិនិយោគផ្ទាល់នៅកម្ពុជាកាន់តែច្រើនផងដែរ»។
បើតាមលោក វណ្ណៈ អ្វីដែលកម្ពុជាត្រូវធ្វើនាពេរលនេះគឺការង្រឹងសមត្ថភាពផលិតកម្មរបស់ខ្លួនឱ្យកាន់តែប្រសើរ និងមានភាពបត់បែនស្របតាមការចង់បានពីគ្រប់មជ្ឈដ្ឋានបញ្ជាទិញ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់បានប្រាប់ភ្នំពេញប៉ុស្តិ៍ថា កិច្ចព្រមព្រៀង RCEP កំពុងចូលរួមចំណែកយ៉ាងច្រើនក្នុងការជំរុញសកម្មភាពពាណិជ្ជកម្មអន្តរជាតិរបស់កម្ពុជា តាមរយៈការបង្កើនសមត្ថភាពនាំចេញ-នាំចូលទំនិញរវាងប្រទេសសមាជិកទាំង ១៥។ លោកបានបន្តថា អត្ថប្រយោជន៍ដែលកម្ពុជាទទួលបានពីកិច្ចព្រមព្រៀងនេះ រួមមានការអនុគ្រោះពន្ធលើទំនិញផ្សេងៗ ការផ្ទេរបច្ចេកវិទ្យា ការអភិវឌ្ឍជំនាញ និងឱកាសការងារដែលជំរុញដោយការវិនិយោគផ្ទាល់ពីបរទេស(FDI)។
លោកបានថ្លែងថា៖««អត្ថប្រយោជន៍ ដែល RCEP បានផ្ដល់មកកម្ពុជា គឺមានទំហំធំធេងណាស់សម្រាប់ការនាំចេញរបស់កម្ពុជា ក៏ដូចជាការបង្កើនពាណិជ្ជកម្មពិភពលោកដែលជាការរួមចំណែកមួយ សម្រាប់ការនាំចេញ និងនាំចូល នៃបណ្ដាប្រទេស RCEP»។
ទាក់ទងនឹងចំនួនទឹកប្រាក់នាំចូលច្រើនជាងការនាំចេញ លោកពន្យល់ថា តួលេខនាំចូលច្រើនគឺមិនមែនជាក្តីបារម្ភនោះទេ ព្រោះទំនិញដែលកម្ពុជានាំចូលក្រោមកិច្ចព្រមព្រៀង RCEP គឺជាវត្ថុធាតុដើម គ្រឿងបន្លាស់ គ្រឿងបង្គុំរថយន្ដ និងប្រេង ដែលផលិតផលទាំងអស់នេះភាគច្រើនបានចូលរួមក្នុងផលិតកម្មកែច្នៃសម្រាប់នាំចេញទៅកាន់ទីផ្សារអន្តរជាតិ។
ទិន្នន័យ GDCE បង្ហាញថា ក្នុងឆ្នាំ ២០២៥ ទំហំពាណិជ្ជកម្មរបស់កម្ពុជាជាមួយប្រទេសសមាជិក RCEP មានទំហំទឹកប្រាក់ប្រមាណ ៤០,២៣ ពាន់លានដុល្លារ កើនឡើង ១៦,២៦% ធៀបនឹងឆ្នាំ ២០២៤ ក្នុងនោះ កម្ពុជាបាននាំចេញទំនិញមានតម្លៃ ៩,៨ ពាន់លានដុល្លារ ចំណែកឯការនាំចូលប្រទេសជាសមាជិកមានទឹកប្រាក់ប្រមាណ ៣០,៤៤ ពាន់លានដុល្លារ កើន ១៩,៥៨%៕
