កម្លាំងអធិការដ្ឋាននគរបាលខណ្ឌសែនសុខ បានចុះប្រតិបត្តិការជួយសង្គ្រោះជនរងគ្រោះករណីចាប់ជំរិត ស្ថិតនៅភូមិដំណាក់ សង្កាត់គោកឃ្លាង ខណ្ឌសែនសុខ ដោយបានជួយសង្គ្រោះជនរងគ្រោះម្នាក់ជាជនជាតិបង់ក្លាដេសឱ្យរួចផុតពីការបង្ខាំងធ្វើទុកបុកម្នេញពីសំណាក់ក្រុមឧក្រិដ្ឋជនឆបោកតាមប្រព័ន្ធបច្ចេកវិទ្យា។
ក្នុងប្រតិបត្តិការនៅថ្ងៃទី២៨ ខែកុម្ភៈម្សិលមិញ ជនសង្ស័យជាជនជាតិបង់ក្លាដែសចំនួន ២នាក់ ត្រូវបានឃាត់ខ្លួន ហើយសមត្ថកិច្ចកំពុងតាមប្រមាញ់ជនសង្ស័យបង់ក្លាដែស ២នាក់ ទៀតដែលកំពុងរត់គេខ្លួន។
ការបង្ក្រាបនេះ ធ្វើឡើងបន្ទាប់ពីសមត្ថកិច្ចទទួលពាក្យបណ្តឹងថា មានករណីបង្ខាំង ធ្វើទារុណកម្ម ជំរិតយកលុយបានសម្រេចចំនួន ៥០០០ដុល្លារ ដោយជនសង្ស័យចំនួន៤នាក់ជនជាតិបង់ក្លាដេស។ នេះបើតាមលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)។
រងគ្រោះបានប្រាប់សមត្ថកិច្ចខណ្ឌសែនសុខថា ខ្លួនត្រូវបានចាប់ជំរិតចេញពីទីតាំងប្រព្រឹត្តបទល្មើសឆបោក online scam មួយកន្លែង ដែលខ្លួនផ្ទាល់ជាអ្នកធ្វើការនៅទីនោះ ស្ថិតនៅផ្ទះលេខ G31 ផ្លូវបេតុងផ្សារខេស៊ី សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ក្រោយពីទទួលបានព័ត៌មាននេះ អាជ្ញាធរខណ្ឌពោធិ៍សែនជ័យ បានដឹកនាំកម្លាំងគណៈបញ្ជាការឯកភាពខណ្ឌ សហការជាមួយអធិការដ្ឋាននគរបាលខណ្ឌសែនសុខ ធ្វើការចុះត្រួតពិនិត្យទីតាំងផ្ទះលេខ G31 រកឃើញមានជនជាតិបង់ក្លាដែស ស្នាក់នៅប្រមូលផ្តុំ ចំនួន១៤នាក់ មានលិខិតឆ្លងដែន ចំនួន៤នាក់ មិនមានលិខិតឆ្លងដែន ចំនួន ១០នាក់។
សមត្ថកិច្ចរឹបអូសសម្ភារៈដែលបម្រើឲ្យសកម្មភាពឆបោកតាមអនឡាញ ដូចជា កុំព្យូទ័រ និងទូរស័ព្ទ ព្រមទាំងរកឃើញខ្សែកពណ៌លឿង ចំនួន ៥ខ្សែ ខ្សែកពណ៌ស ចំនួន ៩ខ្សែ ខ្សែដៃពណ៌លឿង ចំនួន ៣ខ្សែ ខ្សែដៃពណ៌ស ចំនួន ២ខ្សែ និងបន្តោងខ្សែកពណ៌លឿង ចំនួន ១។
សមត្ថកិច្ចនគរបាលខណ្ឌសែនសុខ បាននាំជនសង្ស័យនិងជនរងគ្រោះមកសាកសួរនៅអធិការដ្ឋាននគរបាលខណ្ឌសែនសុខ និងចាត់ការតាមនីតិវិធីច្បាប់។ នេះបើយោងតាមលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)៕
