កណ្តាលៈ មន្ត្រីជំនាញនៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣ ខែមីនានេះ បានចុះទៅពិនិត្យនៅរោងចក្រ ស៊ី ហាវ ហ៊ែនប៊ែក ខូអិលធីឌី នៅផ្លូវជាតិលេខ៦ ស្ថិតនៅភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល បន្ទាប់ពីទទួលបានការរាយការណ៍ថា មានកម្មករនិយោជិតយ៉ាងហោចណាស់ ១៩នាក់ក្នុងរោងចក្រនេះបានដួលសន្លប់កាលពីរសៀលម៉ោង៣ នាថ្ងៃអង្គារ ទី៣ ខែមីនានេះ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោកស៊ុន មេសាបានឱ្យដឹងថា មន្ត្រីជំនាញនៃនាយកដ្ឋានពេទ្យការងារ មន្ទីរខេត្តកណ្តាល និងជំនាញពាក់ព័ន្ធ បានចុះទៅពិនិត្យភ្លាមៗដើម្បីអង្កេតរកមូលហេតុដែលធ្វើឱ្យមានការដួលសន្លប់ក្នុងពេលបំពេញការងារ ដោយក្នុងនោះ ក៏បានទាំងសាកសួរភាគីរោងចក្រ និងកម្មករ។
បើតាមលោកស៊ុន មេសា បច្ចុប្បន្ននេះ កម្មករត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកមុខកំពូល និងមន្ទីរពេទ្យគុយវែត។ រោងចក្រស៊ី ហាវ ហ៊ែនប៊ែក ខូអិលធីឌីនេះជារោងចក្រផលិតកាបូប ខ្សែក្រវ៉ាត់ និងសំភារៈបន្ទាប់បន្សំ។
ក្រសួងការងារ និងបណ្តុះបណ្តាលវិជ្ជាជីវៈ នឹងជូនដំណឹងលម្អិតពីលទ្ធផលនៃការអង្កេតនេះ ប៉ុន្តែយ៉ាងណាលោកថា ការចុះពិនិត្យភ្លាមៗគឺជាការយកចិត្តទុកដាក់របស់ថ្នាក់ដឹកនាំក្រសួង ចំពោះសុខសុវត្ថិភាពរបស់កម្មករនិយោជិត។
កម្មករចំនួន ២១នាក់ នៅក្នុងរោងចក្រ ខេមបូ យូនីសូល (Cambo Unisoll LTD) ក្នុងស្រុកខ្សាច់កណ្តាល ខេត្តកណ្តាលបានដួលសន្លប់ កាលពីថ្ងៃទី ២៧ ខែកុម្ភៈ ដែលក្នុងនោះ ម្នាក់បានស្លាប់ ដោយសារតែសម្ពាធឈាមបានឡើងខ្លាំង ដែលធ្វើឱ្យដាច់សរសៃឈាមក្នុងខួរក្បាល បន្ទាប់ពីបានមើលព័ត៌មានគ្រោះថ្នាក់ចរាចរណ៍របស់កម្មករធ្វើការជាមួយគ្នា។ អ្នកប្រើប្រាស់បណ្តាញសង្គមមួយចំនួនបានយកបញ្ហាមរណភាពរបស់កម្មកររូបនេះធ្វើការកេងចំណេញសម្រាប់ផលប្រយោជន៍ផ្ទាល់ខ្លួន។
ក្រសួងការងារបានឱ្យដឹងថា ថ្នាក់ដឹកនាំសហជីពធំៗនៅកម្ពុជា បានស្នើដល់ក្រុមអ្នកប្រើប្រាស់បណ្ដាញសង្គម និងសាធារណជន កុំយកបញ្ហាមរណភាពរបស់កម្មការិនីម្នាក់នៅរោងចក្រ ខេមបូ យូនីសូល ទៅកេងចំណេញបម្រើឱ្យផលប្រយោជន៍ផ្ទាល់ខ្លួន ដើម្បីចៀសវាងការយល់ច្រឡំពីសាធារណៈជន។
លោក សំ សឿន ប្រធានសហភាពពលកម្មជាតិកម្ពុជា(NLC) បានកត់សម្គាល់ឃើញថា ក្រុមអ្នកប្រើប្រាស់បណ្ដាញសង្គមមួយចំនួនពិតជាបានចែករំលែក និងបញ្ចេញមតិមិនសមរម្យនៅលើបណ្ដាញសង្គម ដើម្បីចង់បានការចាប់អារម្មណ៍ពីអ្នកមើល អ្នកចែករំលែក និងអ្នកបញ្ចេញមតិនានា ប៉ុន្ដែពួកគាត់មិនទទួលបានព័ត៌មានពិតប្រាកដនោះទេ។
លោកបន្តថា ការបញ្ចេញមតិដែលផ្ទុយពីការពិត គឺជាការមិនឱ្យតម្លៃទៅលើជនរងគ្រោះដែលបានទទួលមរណភាព និងជាការកេងចំណេញយកផលប្រយោជន៍ពីជនរងគ្រោះដោយមិនសមហេតុផល។ ជនគ្រោះ ត្រូវបានយកចិត្តទុកដាក់ពីថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈតាមរយៈបេឡាជាតិសន្ដិសុខសង្គម(ប.ស.ស.) ដើម្បីផ្ដល់អត្ថប្រយោជន៍នានាជូនដល់ជនរងគ្រោះទៅតាមច្បាប់។
លោកបញ្ជាក់ថា៖«ខ្ញុំក៏បានឃើញមានបងប្អូនយើងអ្នកប្រើប្រាស់បណ្ដាញសង្គម យករូបភាព ឬក៏ចែករំលែកព័ត៌មាន ដោយបន្ថែមបន្ថយខ្លឹមសារមិនត្រឹមត្រូវ ដែលធ្វើឱ្យមានការយល់ច្រឡំពីសាធារណៈជន។ រឿងនេះ ខ្ញុំក៏បានឃើញខាងក្រសួងការងារ និងបណ្ដុះបណ្ដាលវិជ្ជជីវៈ បានពន្យល់ បកស្រាយពីការពិតរួចហើយដែរ។ ដូចនេះ សូមបងប្អូនជឿជាក់ទៅលើមន្រ្តីជំនាញក្រសួង ហើយឈប់ចែករំលែងព័ត៌មានមិនពិតបន្តទៀត»។
ចំណែកឯ លោក ហ្វា សាលី ប្រធានសម្ព័ន្ធសហជីពជាតិបានថ្លែងថា ការលើកឡើងតាមរយៈបណ្ដាញសង្គមជុំវិញករណីនេះ គឺជារឿងមិនសមហេតុផល និងមិនអាចទទួលយកបានទេ។ ករណីនេះធ្វើឱ្យប៉ះពាល់ដល់វិស័យការងារ និងបង្កការភ័យខ្លាចដល់បងប្អូនកម្មករ កម្មការិនីដែលកំពុងបម្រើការងារនៅតាមរោងចក្រផ្សេងៗទៀត។
លោកបានអំពាវនាវដល់អ្នកប្រើប្រាស់បណ្ដាញសង្គម កុំបន្តចែករំលែកព័ត៌មានមិនពិត និងមិនមានប្រភពច្បាស់លាស់ ដើម្បីចៀសវាងការយល់ច្រឡំដល់សាធារណៈជន។ លោកបានស្នើកុំឱ្យយកករណីដ៏ក្រៀមក្រំរបស់កម្មករនៅក្នុងរោងចក្រខេត្តកណ្តាលនេះ ធ្វើជាអាជីវកម្ម និងទាញយកប្រជាប្រិយភាពផ្ទាល់ខ្លួន។
លោក ហ្វា សាលី ថ្លែងដូច្នេះថា៖«ខ្ញុំសូមបដិសេធមតិលើកឡើងថា ព្រោះអាហារបីពេល ប្រឹងធ្វើការរហូតដល់ស្លាប់ អ្នកខ្លះថា ពិបាកសុំច្បាប់ ទើបធ្វើឱ្យគាត់ស្លាប់ ខ្លះថា អាចមកពីឆក់ខ្សែភ្លើង ឬការបង្ខំឱ្យធ្វើការរហូតដល់ដាច់ខ្យល់ជាដើម។ ការលើកឡើងទាំងអស់នេះ គឺជារឿងមិនពិត គឺវាហាក់ដូចជា ប្រទេសយើង គ្មានក្រសួងការងារ គ្មានសហជីព និងគ្មានមន្រ្តីជំនាញធ្វើការងារត្រឹមត្រូវ។ ដូចនេះ ការបញ្ចេញមតិនេះ មិនអាចទទួលយកបានទេ ហើយសូមកុំលើកឡើងហួសពីការពិត»៕
