ប្រតិភូធុរកិច្ចម៉ាឡេស៊ី បានស្នើឱ្យក្រសួងទេសចរណ៍កម្ពុជាជួយគាំទ្រលើការរៀបចំព្រឹត្តិការណ៍ជំរុញទេសចរណ៍កម្រិតអន្តរជាតិនៅកម្ពុជា ចំនួន ៣ ដែលគ្រោងនឹងធ្វើឡើងនាពេលខាងមុខ ខណៈក្នុងឆ្នាំ២០២៥ ចំនួនភ្ញៀវទេសចរអន្តរជាតិដែលធ្វើដំណើរមកកម្ពុជាបានធ្លាក់ចុះជិត ២០%។
សំណើនេះត្រូវបានលោក Michael Cheow ប្រធានក្រុមហ៊ុន C. Michael International Sdn. Bhd. និងប្រតិភូធុរកិច្ចម៉ាឡេស៊ី លើកឡើងក្នុងជំនួបជាមួយរដ្ឋមន្ត្រីក្រសួងទេសចរណ៍ លោក ហួត ហាក់ នៅទីស្តីការក្រសួងទេសចរណ៍ កាលពីថ្ងៃទី២ ខែមីនា ឆ្នាំ២០២៦។
ក្នុងជំនួបនេះ លោក Michael Cheow បានបង្ហាញក្តីរីករាយដែលបានជួបពិភាក្សាជាមួយថ្នាក់ដឹកនាំក្រសួងទេសចរណ៍កម្ពុជា ដោយលោកបានស្នើសុំឱ្យភាគីកម្ពុជាជួយគាំទ្រ និងផ្តល់អនុសាសន៍លើគម្រោង «The Kingdom’s Grand Prix & Gala» ដែលប្រតិភូធុរកិច្ចម៉ាឡេស៊ី គ្រោងរៀបចំព្រឹត្តិការណ៍ជំរុញវិស័យទេសចរណ៍នៅក្នុងប្រទេសកម្ពុជានាពេលខាងមុខ។
លោក Michael Cheow បានលើកឡើងថា មានព្រឹត្តិការណ៍ជំរុញទេសចរណ៍កម្រិតអន្តរជាតិនៅកម្ពុជា ចំនួន ៣ ដែលប្រតិភូធុរកិច្ចម៉ាឡេស៊ីគ្រោងរៀបចំនៅកម្ពុជា រួមមាន ១. មហោស្រពតន្ត្រីអន្តរជាតិ ដែលជាពិធីបុណ្យតន្ត្រីកម្រិតពិភពលោកដើម្បីអបអរសាទរទាំងទេពកោសល្យសិល្បៈសម័យទំនើប និងមរតកវប្បធម៌ដ៏សម្បូរបែបរបស់កម្ពុជា, ២. ការប្រណាំងទូកល្បឿនលឿនអាជីពដែលជាព្រឹត្តិការណ៍កីឡាលើទឹកដ៏រំភើបញាប់ញ័រនៅតំបន់ឆ្នេរដ៏ស្រស់ស្អាតរបស់កម្ពុជា ដើម្បីលើកកម្ពស់ទេសចរណ៍តំបន់ឆ្នេរ និងការយល់ដឹងពីបរិស្ថាន, និង ៣. ការប្រណាំងរថយន្តកម្រិត GT (Grand Touring) ដែលជាព្រឹត្តិការណ៍ប្រណាំងរថយន្តដ៏ឆ្នើមបង្កើតឡើងក្នុងគោលបំណងលើកកម្ពស់កេរ្តិ៍ឈ្មោះប្រទេសកម្ពុជាទៅកាន់មជ្ឈដ្ឋានអ្នកស្នេហាវិស័យយានយន្តអន្តរជាតិ និងក្រុមទេសចរដែលនិយមចំណាយខ្ពស់។
លោក Cheow បាននិយាយថា៖«ខ្ញុំមានជំនឿយ៉ាងមុតមាំថា ព្រឹត្តិការណ៍ទាំងនេះមិនត្រឹមតែជួយជំរុញសេដ្ឋកិច្ចក្នុងស្រុក និងបង្កើតការងារប៉ុណ្ណោះទេ ប៉ុន្តែថែមទាំងបង្ហាញពីការត្រៀមលក្ខណៈរួចរាល់របស់កម្ពុជាក្នុងការធ្វើជាម្ចាស់ផ្ទះរៀបចំព្រឹត្តិការណ៍អន្តរជាតិខ្នាតធំ និងទំនើបៗផងដែរ»។
ជាកិច្ចឆ្លើយតប លោក ហួត ហាក់ បានកោតសរសើរ និងថ្លែងអំណរគុណចំពោះគំនិតផ្តួចផ្តើមនេះ ដោយលោកបានបញ្ជាក់ពីការគាំទ្ររបស់ក្រសួងទេសចរណ៍ចំពោះព្រឹត្តការណ៍ដ៏ធំ និងកម្រិតអន្តរជាតិជាលើកដំបូងនៅកម្ពុជា ក្នុងឆ្នាំ២០២៦ នេះ។ លោករំពឹងថា ព្រឹត្តិការណ៍នេះនឹងក្លាយជាសមិទ្ធផលគួរជាទីមោទនៈសម្រាប់អ្នកវិនិយោគ និងផលប្រយោជន៍សេដ្ឋកិច្ចដ៏ធំធេងចំពោះប្រជាពលរដ្ឋកម្ពុជា។
បន្ថែមលើនេះ លោករដ្ឋមន្ត្រីក៏ស្នើឱ្យប្រតិភូធុរជនម៉ាឡេស៊ី ជួយផ្សព្វផ្សាយសារវិជ្ជមាន និងកត្តាសុខសន្តិភាពពីកម្ពុជាទៅកាន់ប្រជាជនម៉ាឡេស៊ីផងដែរ។
លោក ហួត ហាក់ បាននិយាយថា៖«កម្ពុជានៅតែជាគោលដៅទេសចរណ៍សុខសុវត្ថិភាព និងពោរពេញដោយសក្តានុពលខ្ពស់សម្រាប់ការវិនិយោគវិស័យទេសចរណ៍»។
ក្រសួងទេសចរណ៍បានឱ្យដឹងថា វិបត្តិនយោបាយ និងសេដ្ឋកិច្កចសកល ព្រមទាំងការបង្កសង្គ្រាមឈ្លានពាននៅព្រំដែនពីសំណាក់យោធាថៃ បានធ្វើឱ្យចំនួនភ្ញៀវទេសចរបរទេសដែលធ្វើដំណើរមកកម្ពុជាធ្លាក់ចុះមួយកម្រិត។ ជាក់ស្តែងក្នុងឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិសរុប ៥,៥៧ លាននាក់ ថយចុះ ១៦,៩% បើធៀបនឹងឆ្នាំ២០២៤។ ក្នុងនោះជនជាតិម៉ាឡេស៊ី មានចំនួន ៩៦ ២៦៨នាក់ កើនឡើង ២,១%។
របាយការណ៍ធនាគារជាតិនៃកម្ពុជា(NBC) បានប៉ាន់ប្រមាណថា ក្នុងឆ្នាំ២០២៥ កម្ពុជាទទួលបានចំណូលពីទេសចរណ៍អន្តរជាតិសរុបប្រហែល ៣,៧ ពាន់លានដុល្លារ កើនឡើង ៣% បើធៀបនឹងឆ្នាំ២០២៤៕
