ក្រសួងការពារជាតិកម្ពុជា បានសម្របសម្រួលជូនប្រតិភូអនុព័ន្ធយោធាបរទេស ប្រចាំកម្ពុជាចំនួន ១២ប្រទេស ចុះទៅពិនិត្យទីតាំងជាក់ស្តែងនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅរសៀលថ្ងៃទី៤ ខែមីនានេះ។
នៅទីតាំងនេះ ក្រុម AOT បានចុះទៅទីតាំងដែលទទួលរងការវាយប្រហារ រាយបន្លាលួស និងដាក់ពង្រាយទូកុងតឺន័រកាន់កាប់ដោយខុសច្បាប់របស់យោធាថៃ។ ពួកគេក៏បានពិនិត្យស្ថានការណ៍នៃការអនុវត្តបទឈប់បាញ់រវាងកម្ពុជា និងថៃ ដែលបានចូលជាធរមានចាប់តាំងពីវេលាម៉ោង ១២:០០នាទី ថ្ងៃទី២៧ ខែធ្នូ ឆ្នាំ២០២៥ ផងដែរ។ នេះបើតាមលោកស្រី ម៉ាលី សុជាតា អ្នកនាំពាក្យក្រសួងការពារជាតិ។
លោកស្រីថ្លែងថា កម្ពុជាតែងតែបញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ច្បាស់លាស់ក្នុងការគោរព និងអនុវត្តយ៉ាងពេញលេញខ្ជាប់ខ្ជួន ចំពោះបទឈប់បាញ់រវាងប្រទេសទាំងពីរ ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាព និងសុវត្ថិភាពយូរអង្វែងនៅតាមបណ្តោយព្រំដែន។
លោក ឆាំង យុ ប្រធានមជ្ឈមណ្ឌលឯកសារកម្ពុជា យល់ឃើញថា ក្រុមអ្នកសង្កេតការណ៍អាស៊ាន (AOT) បាននិងកំពុងបំពេញការងារយ៉ាងសកម្ម ដើម្បីវាយតម្លៃស្ថានភាពជាក់ស្តែង ហើយដំណើរទស្សនកិច្ចរបស់ពួកគេកាលពីពេលថ្មីៗនេះ ទៅកាន់តំបន់ប្រាសាទព្រះវិហារ ពិតជាស័ក្តិសមទទួលបានការកោតសរសើរ។
តាមរយៈការសហការជាមួយក្រុមការងារទំនាក់ទំនងកម្ពុជា ក្រុម AOT ដែលបច្ចុប្បន្នដឹកនាំដោយប្រទេសហ្វីលីពីន បានចុះទៅកាន់តំបន់ប្រាសាទព្រះវិហារនិងតំបន់ដទទៃទៀត ដើម្បីសង្កេតមើលការខូចខាតនៅក្នុងតំបន់នេះ ដែលបណ្តាលមកពីជម្លោះព្រំដែនកាលពីពេលថ្មីៗនេះ។
លោកថ្លែងថា កិច្ចព្រមព្រៀងបទឈប់បាញ់រវាងកម្ពុជា និងថៃ នៅតែស្ថិតក្នុងស្ថានភាពផុយស្រួយនៅឡើយ ដូច្នេះហើយ ដំណើរទស្សនកិច្ចរបស់ក្រុម AOT ទៅកាន់តំបន់នេះ បានបង្ហាញឱ្យឃើញយ៉ាងច្បាស់ពីភាពក្លាហាន និងការប្តេជ្ញាចិត្តរបស់ក្រុមនេះចំពោះបេសកកម្ម។
លោក ឆាំង យុ ថ្លែងថា៖ «នៅក្នុងសង្គ្រាម ប្រហែលជាគ្មានវីរបុរសណាដែលអស្ចារ្យជាងអ្នកដែលបានប្តេជ្ញាចិត្តខ្ពស់បំផុតចំពោះសន្តិភាពនោះឡើយ។ ដូច្នេះ នៅថ្ងៃនេះ យើងសូមទទួលស្គាល់ និងកោតសរសើរចំពោះតួនាទីរបស់ក្រុម AOT ក្នុងការថែរក្សាសន្តិភាព និងការចូលរួមចំណែកដល់ស្ថិរភាពនាពេលអនាគតនៅក្នុងតំបន់ជម្លោះទាំងនេះ ក៏ដូចជាសម្រាប់តំបន់ និងពិភពលោកទាំងមូល»៕
