លោកនាយករដ្ឋមន្ត្រី ហ៊ុន ម៉ាណែត បាននិយាយថា កម្ពុជាកំពុងលើកកម្ពស់ពាណិជ្ជកម្មដោយបុរេសកម្មជាមួយដៃគូសំខាន់ៗជាពិសេសសហរដ្ឋអាមេរិក និងប្រទេសចិន ខណៈបច្ចុប្បន្នកម្ពុជាក៏កំពុងចរចាដើម្បីចូលជាសមាជិកក្នុងកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក ក្នុងគោលបំណងធ្វើពិពិធកម្មក្នុងការនាំចេញ។
ការថ្លែងនេះធ្វើឡើងក្នុងពិធីបើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ ដែលរៀបចំនៅរាជធានីភ្នំពេញ នាព្រឹកថ្ងៃទី៤ ខែមីនា ក្រោមមូលបទ «ការផ្លាស់ប្តូរអាស៊ាន៖ នវានុវត្តន៍ សមាហរណកម្ម និងការវិវត្តឧស្សាហកម្ម»។
កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៦ មានការចូលរួមពីឥស្សរជនជាន់ខ្ពស់ ឯកអគ្គរដ្ឋទូត តំណាងស្ថាប័នពាក់ព័ន្ធ ក្រុមប្រឹក្សាពិគ្រោះយោបល់ធុរកិច្ចអាស៊ាន ក្រុមហ៊ុនអន្តរជាតិធំៗនៅកម្ពុជា និងអាស៊ាន និងអ្នកជំនាញពីគ្រប់វិស័យ។
លោកនាយករដ្ឋមន្ត្រីលើកឡើងថា ជាមួយនឹងបរិបទសកលនាពេលនេះ គឺរាជរដ្ឋាភិបាលកម្ពុជាថ្មីៗនេះបានសម្រួចយុទ្ធសាស្រ្តបញ្ចកោណដំណាក់កាលទី១ របស់ខ្លួនដើម្បីជំរុញសមត្ថភាពប្រកួតប្រជែង ការធ្វើពិពិធកម្ម និងភាពរឹងមាំ ដើម្បីជំរុញកំណើនសេដ្ឋកិច្ចជាតិឱ្យបោះជំហានទៅមុខកាន់តែលឿន។
លោកថ្លែងថា៖«កម្ពុជាមានសេដ្ឋកិច្ចបើកចំហរ និងជាសមាជិកសកម្មនៃ WTO(អង្គការពាណិជ្ជកម្មពិភពលោក)។ កម្ពុជាបានធ្វើសមាហរណកម្មស៊ីជម្រៅទៅក្នុងប្រព័ន្ធពាណិជ្ជកម្មសកល។ កម្ពុជាបាននិងកំពុងលើកកម្ពស់ពាណិជ្ជកម្មប្រកបដោយភាពសកម្ម និងបុរេសកម្មដោយមានដៃគូគន្លឹះដូចជា អាមេរិក និងចិន»។
លោកបន្តថា៖«លើសពីនេះទៀតកម្ពុជាក៏បាននិងកំពុងជំរុញការចរចាដើម្បីចូលទៅក្នុងកិច្ចព្រមព្រៀងគ្រប់ជ្រុងជ្រោយ និងវឌ្ឍនភាពសម្រាប់ភាពជាដៃគូអន្តរប៉ាស៊ីហ្វិក (CPTPP) ក្នុងគោលបំណងធ្វើពិពិធកម្មទីផ្សារនាំចេញ បង្កើនភាពប្រកួតប្រជែង និងធ្វើឱ្យសមាហរណកម្មកាន់តែស៊ីជម្រៅទៅក្នុងសេដ្ឋកិច្ចសកល»។
លោក ហ៊ុន ម៉ាណែត បានបញ្ជាក់ថា ដើម្បីទាញយកប្រយោជន៍ក្នុងតំបន់ រាជរដ្ឋាភិបាលកម្ពុជាក៏បានអនុវត្តនូវកម្មវិធីពិសេសដោយជំរុញការវិនិយោគនៅក្នុងខេត្តទាំង ៤ នៅក្នុងភូមិភាគឦសាន ឆ្នាំ២០២៥-២០២៨ បន្ថែមលើកម្មវិធី ពិសេស ក្នុងការវិនិយោគលើខេត្តព្រះសីហនុផងដែរ។
ប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា និងជាប្រធានសភាពាណិជ្ជកម្មកម្ពុជា លោក គិត ម៉េង បាននិយាយថា ក្នុងបរិបទដែលការប្រកួតប្រជែងជាយុទ្ធសាស្ត្ររវាងមហាអំណាចធំៗកាន់តែតានតឹង និងមានឥទ្ធិពលកាន់តែខ្លាំងលើស្ថិរភាពតំបន់ អាស៊ានត្រូវការពង្រឹងស្ថិរភាពទីផ្សារ រក្សាតុល្យភាពទំនាក់ទំនងពាណិជ្ជកម្ម និងលើកកម្ពស់កិច្ចសហប្រតិបត្តិការសេដ្ឋកិច្ចប្រកបដោយតម្លាភាព ដើម្បីធានាកំណើនប្រកបដោយចីរភាព និងភាពធន់នឹងការប្រែប្រួលភូមិសាស្ត្រនយោបាយ។ កម្ពុជាកំពុងធ្វើកិច្ចការជាច្រើនដើម្បីធ្វើសមាហរណកម្មសេដ្ឋកិច្ចរបស់ខ្លួនឱ្យកាន់តែរីកចម្រើន។
លោកលើកឡើងថា៖«យើងរៀបចំកិច្ចប្រជុំកំពូលនេះ នៅដំណាក់កាលដ៏សំខាន់មួយសម្រាប់សេដ្ឋកិច្ចពិភពលោក។ យើងកំពុងមើលឃើញសម័យកាលនៃការប្រកួតប្រជែងជាយុទ្ធសាស្ត្រកាន់តែខ្លាំងរវាងមហាអំណាចធំៗ ដែលអាស៊ានកំពុងតែធ្វើដំណើរឆ្លងកាត់រលកសម្ពាធ ដែលកើតចេញពីភាពតានតឹងរវាងសហរដ្ឋអាមេរិក និងចិន។ ភារកិច្ចរួមរបស់យើង គឺរក្សាអាស៊ានជាកម្លាំងដែលមានស្ថិរភាព ជាកម្លាំងជំរុញការសន្ទនា រក្សាទំនាក់ទំនងទីផ្សារ និងធានាថាកិច្ចសហប្រតិបត្តិការសេដ្ឋកិច្ចនៅតែត្រូវបានគ្រប់គ្រងដោយភាពត្រឹមត្រូវយុត្តិធម៌ តម្លាភាព និងការគោរពគ្នាទៅវិញទៅមក»៕
