លោក ប្រាក់ សុខុន បន្តបេសកកម្មនាំយកស្ថានភាពព្រំដែនកម្ពុជាថៃ ទៅបង្ហាញដល់មិត្តអន្តរជាតិ បន្ថែមលើការពង្រឹងទំនាក់ទំនងទ្វេភាគីរវាងកម្ពុជា និងប្រទេសទាំងនោះ។ អ្នកវិភាគយល់ថា ទស្សនកិច្ចរបស់លោកពិតជាមានសារៈសំខាន់ នៅចំពោះមុខស្ថានភាពព្រំដែនបច្ចុប្បន្ន។
លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស នៅថ្ងៃទី១១ ខែមីនានេះ បានជួបជាមួយលោក វីវៀន បាឡាគ្រីស្សណាន់ រដ្ឋមន្ត្រីការបរទេសសិង្ហបុរី ដោយក្នុងជំនួបនេះ ភាគីទាំងពីរបានបង្ហាញពីការប្តេជ្ញាចិត្តឥតងាករេ ក្នុងការពង្រឹង និងធ្វើឱ្យកាន់តែស៊ីជម្រៅនូវចំណងមិត្តភាពទ្វេភាគីដ៏យូរអង្វែង ដែលរួមចំណែកដល់សន្តិភាព ស្ថិរភាព និងវិបុលភាពរួមក្នុងតំបន់។
យោងតាមក្រសួងការបរទេស រដ្ឋមន្ត្រីការបរទេសទាំងពីរក៏បានផ្លាស់ប្តូរទស្សនៈអំពីបញ្ហាតំបន់ និងអន្តរជាតិដែលជាកង្វល់រួម ក៏ដូចជាពិភាក្សាយ៉ាងស៊ីជម្រៅលើវឌ្ឍនភាពថ្មីៗនៃស្ថានភាពព្រំដែនកម្ពុជា-ថៃ ផងដែរ។
បន្ទាប់ពីសិង្ហបុរី លោក ប្រាក់ សុខុន នឹងបន្តដំណើរទៅប្រទេសនូវែលសេឡង់ និងអូស្ត្រាលី ពីថ្ងៃទី១៣ ដល់ថ្ងៃទី១៦ មីនា ក្នុងគោលបំណងដូចគ្នានេះ។ នេះបើតាមក្រសួងការបរទេស។
លោក ប្រាក់ សុខុន កាលពីពេលថ្មីៗនេះ បានថ្លែងនៅក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវ ប្រទេសស្វ៊ីស ដោយលោកបានបង្ហាញពីស្ថានភាពពិតនៃជម្លោះកម្ពុជា-ថៃ ជាពិសេសការបន្តកាន់កាប់ទឹកដីកម្ពុជា យ៉ាងហោចណាស់ ១៤ទីតាំងដោយយោធាថៃ និងសកម្មភាពមិននៅស្ងៀមផ្សេងៗទៀតរបស់ថៃ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានថ្លែងថា ទស្សនកិច្ចរបស់លោក ប្រាក់ សុខុន នាពេលនេះមានសារៈសំខាន់ខ្លាំងណាស់ ពីព្រោះ ក្រៅការពង្រឹងទំនាក់ទំនងពាណិជ្ជកម្ម និងការទូត ជាមួយប្រទេសជាមិត្ត ទស្សនកិច្ចនេះនឹងលាតត្រដាងបន្ថែមទៀតដល់អន្តរជាតិអំពីស្ថានភាពព្រំដែន។
លោកថ្លែងថា៖ «តាមរយៈដំណើរទស្សនកិច្ចនេះ ឯកឧត្តមឧបនាយករដ្ឋមន្ត្រីអាចពន្យល់ដល់សមភាគីរបស់លោកឲ្យបានយល់ពីស្ថានភាពជាក់ស្ដែងនៃជម្លោះព្រំដែនរវាងកម្ពុជា-ថៃ នោះគឺការរំលោភបំពានដែនអធិបតេយ្យភាពរបស់ថៃលើកម្ពុជា»៕
