លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការជាតិគាំពារ និងអភិវឌ្ឍកុមារតូច បានអះអាងថា ការគាំពារ និងអភិវឌ្ឍកុមារតូច បានដើរតួនាទីយ៉ាងសំខាន់ក្នុងការផ្តល់នូវមូលដ្ឋានគ្រឹះដ៏រឹងមាំ និងមិនអាចខ្វះបានក្នុងការអភិវឌ្ឍធនធានមនុស្ស ដោយផ្តើមចេញពីការគាំទ្រការអនុវត្ត តាមបែបពហុវិស័យបញ្ចូលគ្នា។
លោករដ្ឋមន្រ្តីថ្លែងបែបនេះ នៅពេលលោកចូលរួមជាអធិបតីក្នុងពិធីបើកសិក្ខាសាលាថ្នាក់ជាតិផ្សព្វផ្សាយអនុក្រឹត្យ ស្តីពី «ការគ្រប់គ្រងទារកដ្ឋាន» កាលពីព្រឹកថ្ងៃទី ១២ ខែមីនា នេះ ហើយលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកស្រី Tania Meyer ប្រធានគ្រប់គ្រងធនាគារពិភពលោកប្រចាំកម្ពុជា និងភាគីពាក់ព័ន្ធផ្សេងទៀត ក៏បានចូលរួមក្នុងកម្មវិធីនេះដែរ។
លោក ហង់ជួន ណារ៉ុន បានឱ្យដឹងថា ធនាគារពិភពលោកប្រចាំនៅកម្ពុជា គឺជាដៃគូដ៏សំខាន់របស់ក្រសួងអប់រំ ក្នុងការជួយឧបត្ថម្ភគាំទ្រដល់ដំណើរការរៀបចំអនុក្រឹត្យស្តីពី «ការគ្រប់គ្រងទារកដ្ឋាន» រហូតទទួលបានការឯកភាពពីរាជរដ្ឋាភិបាល និងបានដាក់ឱ្យអនុវត្តជាផ្លូវការនាពេលនេះ ក្រោមការខិតខំប្រឹងប្រែងរួមគ្នា ប្រកបដោយការយកចិត្តទុកដាក់ និងការទទួលខុសត្រូវខ្ពស់ ក្នុងការអនុវត្តជាក់ស្តែង ដើម្បីជាប្រយោជន៍ផ្ទាល់ដល់កុមារតូចៗ ដែលនឹងក្លាយខ្លួនជាអ្នកបន្តវេនដ៏មានសក្តានុពលរបស់ប្រទេសជាតិ។
រដ្ឋមន្រ្តីរូបនេះ បានបញ្ជាក់ថា៖ «ក្នុងបរិបទនេះ ការគាំពារ និងអភិវឌ្ឍកុមារតូច បានដើរតួនាទីយ៉ាងសំខាន់ក្នុងការផ្តល់នូវមូលដ្ឋានគ្រឹះដ៏រឹងមាំ និងមិនអាចខ្វះបានក្នុងការអភិវឌ្ឍធនធានមនុស្ស ដោយផ្តើមចេញពីការគាំទ្រការអនុវត្តតាមបែបពហុវិស័យបញ្ចូលគ្នា។ ជាក់ស្តែង ការស្រាវជ្រាវជាច្រើនបានឱ្យដឹងថា កុមារដែលបានទទួលសេវាថែទាំគាំពារប្រកបដោយវិជ្ជមាន និងឆ្លងកាត់ថ្នាក់មត្តេយ្យសិក្សា តែងតែបានចូលរៀននៅសាលាបឋមសិក្សាដោយជោគជ័យ ដោយពុំមានការត្រួតថ្នាក់ និងបោះបង់ការសិក្សាឡើយ»។
ការស្រាវជ្រាវផ្សេងទៀតក៏បានបង្ហាញដែរថា ជំនាញដែលត្រូវបានបង្កើតឡើងក្នុងឆ្នាំដំបូងដល់កុមារនៅវ័យជាទារក និងវ័យចូលមត្តេយ្យសិក្សា គឺជាកត្តាកំណត់នូវភាពជោគជ័យ ឬបរាជ័យក្នុងការសិក្សានៅសាលារៀន និងការសិក្សានៅកម្រិតបន្តបន្ទាប់ ហើយរាជរដ្ឋាភិបាលកម្ពុជា បានឯកភាពដាក់ចេញអនុក្រឹត្យស្តីពីការគ្រប់គ្រងទារកដ្ឋាន ដែលមានវិសាលភាពអនុវត្តចំពោះទារកដ្ឋានសហគមន៍ ទារកដ្ឋានសហគ្រាស និងទារកដ្ឋានឯកជននៅក្នុងប្រទេសកម្ពុជា។
លោក ហង់ជួន ណារ៉ុន បានបន្ថែមទៀតថា ការផ្តល់សេវាទារកដ្ឋានក្នុងយុគសម័យទំនើបនេះ មិនមែនគ្រាន់តែជាការមើលថែទាំកុមារតូចធម្មតាប៉ុណ្ណោះទេ ថែមទាំងជាប្រព័ន្ធផ្តល់សេវាអប់រំក្នុងដំណាក់កាលដំបូងនៃជីវិត ដែលរួមបញ្ចូលនូវបំណិនគ្រប់ជ្រុងជ្រោយតាមរយៈសកម្មភាការរៀនតាមរយៈការលេង ដែលផ្តល់ឱកាសកុមារបានរៀនសូត្រទាន់ពេលវេលា, ការអប់រំសង្គម និងអារម្មណ៍ (SEL), ការថែទាំប្រកបដោយការឆ្លើយតប, ផ្តល់សេវាដោយយកចិត្តទុកដាក់លើសុវត្ថិភាព និងសន្តិសុខដល់កុមារ និងយកចិត្តទុកដាក់ខ្ពស់លើផ្នែកសុខភាព អាហារូបត្ថម្ភ និងអនាម័យ។
ឆ្លើយតបនឹងតម្រូវការប្រកបដោយវិជ្ជមានរបស់កុមារនេះ លោក ហង់ជួន ណារ៉ុន បានសង្កត់ធ្ងន់ថា៖ «យើងត្រូវរួមគ្នាបែបពហុវិស័យផ្លាស់ប្តូរផ្នត់គំនិតមាតាបិតា រួមគ្នាវិនិយោគលើកុមារតូច តាមរយៈការបង្កើតទារកដ្ឋានសហគមន៍ ទារកដ្ឋានសហគ្រាស ទារកដ្ឋានឯកជន និងបណ្តុះបណ្តាលអ្នកជំនាញបច្ចេកទេសត្រឹមត្រូវសម្រាប់គ្រប់គ្រង និងមើលថែទាំកុមារនៅតាមទារកដ្ឋានស្របតាមបទដ្ឋានបច្ចេកទេស»។
ចំពោះបទដ្ឋានទាំងនោះរួមមាន ការផ្តល់អាហារប្រកបដោយអនាម័យនិងសុខភាព ផ្តល់កន្លែងគេង មានសម្ភារៈសម្រាប់កុមារលេង កន្លែងលេងក្នុងនិងក្រៅបន្ទប់ស្របតាមលក្ខណៈបច្ចេកទេសត្រឹមត្រូវ ដែលអាចឱ្យមាតាបិតាមានឱកាសប្រកបមុខរបរចិញ្ចឹមជីវិត និងបំពេញការងារប្រចាំថ្ងៃបានពេញលេញ បង្កើនជីវភាពរស់នៅក្នុងគ្រួសារកាន់តែល្អប្រសើរ។
«ហេតុនេះការយកចិត្តទុកដាក់ផ្តល់សេវាទារកដ្ឋាន មិនមែនគ្រាន់តែជាកន្លែងមើលថែធម្មតានោះទេ ថែមទាំងជាកន្លែងបណ្តុះបណ្តាលកុមារឱ្យមានមូលដ្ឋានបំណិនរឹងមាំ មានទំនុកចិត្ត និងភាពធន ដែលអាចសម្របខ្លួនទៅនឹងបរិយាកាសសិក្សាថ្មីៗ និងអភិវឌ្ឍខ្លួនដោយឯករាជ្យ»។ លោក ណារ៉ុន បានបន្ថែម។
លោករដ្ឋមន្រ្តី បានបន្ថែមថា៖ «ខ្ញុំជឿជាក់ថា ស្មារតីនៃកិច្ចសហការ និងការប្តេជ្ញាចិត្តខ្ពស់របស់ភាគីពាក់ព័ន្ធទាំងអស់ នឹងក្លាយជាកម្លាំងចលករយ៉ាងសំខាន់ក្នុងការជំរុញឱ្យការអនុវត្ត «អនុក្រឹត្យស្តីពីការគ្រប់គ្រងទារកដ្ឋាន» ទទួលបានជោគជ័យ និងមានប្រសិទ្ធភាពខ្ពស់ ដើម្បីបុព្វហេតុនៃការរីកចម្រើនរបស់កុមារគ្រប់រូបនៅកម្ពុជា»៕
