តុលាការខេត្តព្រះសីហនុ ផ្តន្ទាទោសជនជាប់ចោទជនជាតិវៀតណាម១នាក់ និងចិន ៣នាក់ ដាក់ពន្ធនាគារអស់មួយជីវិត ខណៈជនជាតិខ្មែរម្នាក់ចាប់ ២០ឆ្នាំករណីផលិតជួញដូរគ្រឿងញៀន និងសម្អាតប្រាក់ និងប្រើប្រាស់អាវុធដោយគ្មានលិខិតអនុញ្ញាត ដែលបានប្រព្រឹត្តកាលពីឆ្នាំ២០២៤។
ជនជាប់ចោទដែលត្រូវផ្ដន្ទាទោសដាក់ពន្ធនាគារមួយជីវិតមានឈ្មោះ ដូ ធានក្វាង (Do Thien Quang) ភេទប្រុស អាយុ២៥ឆ្នាំ ជនជាតិវៀតណាម, និងជនជាតិចិន៣នាក់ឈ្មោះ ស៊ាវ ឈីហុង (Xiao Qihong) អាយុ៣៣ឆ្នាំ, ចាង ឈូយី (Zhang Chu Yu) ភេទស្រី អាយុ៣២ ឆ្នាំ និង ថា ចាងវ័យ (Tang Zhang Wei) ភេទប្រុស អាយុ៣៨ឆ្នាំ។
បន្ថែមលើការជាប់ពន្ធនាគារនេះ ពួកគេត្រូវពិន័យជាប្រាក់ចំនួន ២០០.០០០.០០០៛ (ពីររយលាន) រៀល ផងដែរ។ នេះបើតាមអ្នកនាំពាក្យអយ្យការអមតុលាការខេត្តព្រះសីហនុ។
ជនជាតិខ្មែរម្នាក់ឈ្មោះ ហេង រិទ្ធថា អាយុ ៣៨ឆ្នាំ ត្រូវបានតុលាការផ្ដន្ទាទោសដាក់ពន្ធនាគារ ២០ឆ្នាំ ពិន័យប្រាក់ ១០០លានរៀល ពីបទសំគំនិតផលិត ជួញដូរគ្រឿងញៀន និងសម្អាតប្រាក់។
ក្រៅពីនេះ មានអ្នកពាក់ព័ន្ធជនជាតិចិន ៣នាក់ផ្សេងទៀត និងជនជាតិវៀតណាមម្នាក់ទៀតត្រូវបានដាក់ពន្ធនាគារ២ឆ្នាំ ពីបទរក្សាទុកដោយខុសច្បាប់នៃសារធាតុញៀន។
ជនជាប់ចោទទាំងអស់ពាក់ព័ន្ធនឹងការផលិត និងជួញដូរគ្រឿងញៀនកេតាមីន ជាង ៦០គីឡូក្រាម និងសារធាតុគីមីផ្សំជាង ៥០គីឡូក្រាម ដែលត្រូវបានបង្ក្រាបនៅខែមិថុនា ឆ្នាំ២០២៤ នៅខេត្តព្រះសីហនុ។ នេះបើយោងតាមមន្ទីរប្រឆាំងគ្រឿងញៀន៕
