នៅក្នុងរយៈពេលពេញ១ខែកុម្ភៈ គិតចាប់ពីថ្ងៃទី១ រហូតដល់ថ្ងៃទី២៨ កន្លងមកនេះមានគ្រោះអគ្គិភ័យបានកើតមានឡើងចំនួន៩៧ករណី នៅទូទាំងប្រទេសកម្ពុជា។ នេះបើតាមរបាយការណ៍របស់ក្រសួងមហាផ្ទៃ ដោយគ្រោះអគ្គិភ័យទាំងនោះ បានបណ្ដាលឱ្យឆេះផ្ទះសំបែងប្រជាពលរដ្ឋ ៨៣ ខ្នង តូប ១ខ្នង ឃ្លាំង ១០ខ្នង កុដិ ៨ខ្នង វិហារ១ខ្នង បន្ទប់ ៤បន្ទប់ និងអគារស្នាក់នៅ ១ខ្នង។
ជាមួយគ្នានេះ គ្រោះកាចនេះ ក៏បណ្ដាលឱ្យឆេះអាហារដ្ឋាន ១ខ្នង ព្រៃ ៦កន្លែង រោង ១ខ្នង រោងចិញ្ចឹមសត្វ ១កន្លែង រោងចម្ការ ១កន្លែង ប្រអប់ភ្លើង ១កន្លែង ដេប៉ូលក់ឈើ ១កន្លែង គំនរកង់ឡាន ១កន្លែង គំនរអេតចាយ ១កន្លែង គំនរទុយយោទឹក ១កន្លែង ឡសម្ងួតធ្យូង ១កន្លែង រោងចក្រ ១ខ្នង រថយន្ត ៣គ្រឿង ព្រមទាំងសម្ភារប្រើប្រាស់មួយចំនួនទៀត។
ក្រសួងមហាផ្ទៃ បានបញ្ជាក់ថា ករណីអគ្គិភ័យទាំងនោះ បានកើតមានឡើងនៅក្នុងមូលដ្ឋានជាអាទិ៍ រាជធានីភ្នំពេញ ខេត្តកណ្ដាល កំពង់ស្ពឺ កំពត តាកែវ ស្វាយរៀង កំពង់ធំ កំពង់ចាម កំពង់ឆ្នាំង ពោធិ៍សាត់ បាត់ដំបង ក្រចេះ ស្ទឹងត្រែង ព្រៃវែង ត្បូងឃ្មុំ ព្រះវិហារ ព្រះសីហនុ កោះកុង សៀមរាប រតនៈគិរី និងខេត្តបន្ទាយមានជ័យ។
គួររំឭកថា ក្នុងរយៈពេល ១០ ខែ ឆ្នាំ ២០២៥ មានគ្រោះអគ្គិភ័យកើតឡើងជាង ៧០០លើក នៅទូទាំងប្រទេស បណ្តាលឱ្យមនុស្សស្លាប់-របួសជាង៧០នាក់ បំផ្លាញផ្ទះសំបែងប្រជាពលរដ្ឋជាង ៦៧០ ខ្នង និងហេដ្ឋារចនាសម្ព័ន្ធជាច្រើនទៀត។ ចំណែកនៅដើមឆ្នាំ ២០២៦នេះ ជាពិសេសក្នុងខែកុម្ភៈកន្លងមកនេះ គ្រោះអគ្គិសនីបានកើតមានឡើងកាន់តែច្រើន ដែលទាមទារឱ្យមានការប្រុងប្រយ័ត្នខ្ពស់បំផុត ដើម្បីបង្ការកុំឱ្យគ្រោះកាចនេះកើតមានឡើង៕
