ប្រតិភូពីក្រសួងវប្បធម៌ មានសេចក្ដីរន្ធត់ ក្ដុកក្ដួល នៅពេលដែលបានទៅទស្សនាប្រាសាទព្រះវិហារដែលបានរងការខូចខាតចំនួន ៥៦២កន្លែងពីការវាយប្រហាររបស់យោធាថៃ នៅខែកក្កដា និងខែធ្នូឆ្នាំ២០២៥។
លោកស្រី ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ នៅថ្ងៃទី២០ មីនា បានទៅពិនិត្យ និងវាយតម្លៃការខូចខាតប្រាសាទព្រះវិហារ ដោយសារជម្លោះប្រដាប់អាវុធកាលពីខែកក្កដា និងខែធ្នូឆ្នាំ២០២៥កន្លងទៅ ដោយមានការចូលរួមពីលោក គីម រិទ្ធី អភិបាលខេត្តព្រះវិហារ លោក គង់ ពុទ្ធិការ អគ្គនាយកអាជ្ញាធរជាតិព្រះវិហារ និងលោក ហង់ ពៅ អគ្គនាយកអាជ្ញាធរជាតិអប្សរានិងមន្ត្រីជំនាញ។
អាជ្ញាធរជាតិព្រះវិហារ បានថ្លែងនៅថ្ងៃនេះថា ក្នុងបេសកកម្មខាងនេះ លោកស្រីរដ្ឋមន្រ្តី និងប្រតិភូទាំងអស់បានសម្តែងនូវមនោសញ្ចេតនារន្ធត់ ក្តុកក្តួល និងតក់ស្លុតយ៉ាងខ្លាំងចំពោះការបំផ្លិចបំផ្លាញដ៏ធំធេងបំផុតចំពោះបេតិកភណ្ឌពិភពលោកប្រាសាទព្រះវិហារដែលជាសម្បត្តិរបស់មនុស្សជាតិ។
លោកស្រី ភឿង សកុណា ត្រូវបានស្រង់សម្ដីដោយអាជ្ញាធរជាតិព្រះវិហារថា៖ «ការខូចខាត បាក់បែក ដែលបានពិនិត្យឃើញដោយផ្ទាល់ភ្នែកនេះមានទំហំរាប់រយដងលើសពីរបាយការណ៍ខូចខាតរៀបចំដោយអាជ្ញាធរជាតិព្រះវិហារកន្លងទៅដែលបានកត់ត្រាការខូចខាតសរុបចំនួន ៥៦២កន្លែង»។
អាជ្ញាធរជាតិព្រះវិហារថ្លែងថា គ្រប់ប្រទេសទាំងអស់មានភារកិច្ចក្នុងការការពារសម្បត្តិវប្បធម៌ ដោយមិនត្រូវយកសម្បត្តិបេតិកភណ្ឌជាគោលដៅនៃការវាយប្រហារនោះទេ ទោះក្នុងកាលៈទេសៈណាក៏ដោយ។ កាតព្វកិច្ចនេះដូចមានចែងក្នុងអនុសញ្ញាឆ្នាំ១៩៧២ ស្តីពីបេតិកភណ្ឌពិភពលោក និងអនុសញ្ញាឆ្នាំ១៩៥៤ ស្តីពីកិច្ចការពារសម្បត្តិបេតិកភណ្ឌវប្បធម៌ក្នុងជម្លោះប្រដាប់អាវុធ។
យោងតាម អាជ្ញាធរជាតិព្រះវិហារ ប្រាសាទព្រះវិហាររងការខូចខាតចំនួន ១៤២កន្លែង នៅក្នុងការវាយប្រហារដោយប្រដាប់អាវុធកាលពីខែកក្កដា និងខូចខាតបន្ថែមចំនួន ៤២០កន្លែងទៀតក្រោយខែធ្នូឆ្នាំ២០២៥ ដោយរាប់ចាប់ពីចំណុចពើយតាឌី គោបុរៈទី១ រហូតដល់គោបុរៈទី៥។
បន្ថែមពីលើនេះ ក៏មានការខូចខាតការដ្ឋានគម្រោងសហប្រតិបត្តិការរបស់ប្រទេសឥណ្ឌានៅគោបុរៈទី៥ និងការដ្ឋានជួសជុលជណ្តើរខាងជើង ដែលជាជំនួយរបស់ស្ថានទូតអាមេរិក និងការខូចខាតវត្តកែវសិក្ខាគិរីស្វរៈផងដែរ៕
