ប្រមុខការទូតកម្ពុជា លោក ប្រាក់ សុខុន ជំរុញឲ្យអ្នកការទូតកម្ពុជាប្រឹងប្រែងបំពេញការងារការទូតរបស់ខ្លួនឲ្យកាន់តែខ្លាំង នៅពេលដែលកម្ពុជាកំពុងរងការឈ្លានពាន ទន្ទ្រានយកទឹកដី និងបង្ខូចកេរ្តិ៍ឈ្មោះពីប្រទេសជិតខាង។
ថ្លែងនៅក្នុងកិច្ចប្រជុំបូកសរុបការងារប្រចាំរបស់ក្រសួងការបរទេស នៅថ្ងៃទី៥ ខែមីនានេះ លោកឧបនាយករដ្ឋមន្ត្រី ប្រាក់ សុខុន លើកឡើងថា កម្ពុជាកំពុងប្រឈម និងរងគ្រោះពីការឈ្លានពាន ការទន្ទ្រានយកទឹកដី ការបង្ខូចកេរ្តិ៍ឈ្មោះពីអ្នកជិតខាងរបស់ខ្លួន ដែលមានប្រៀបផ្នែកយោធា និងសេដ្ឋកិច្ច។
ស្របពេលជាមួយគ្នានេះ ការប្រែប្រួលនៅលើពិភពលោក ការប្រកួតប្រជែងនៃប្រទេសមហាអំណាច ក៏បានដាក់សម្ពាធយ៉ាងខ្លាំងដល់កម្ពុជា លើការធ្វើសេចក្ដីសម្រេច ការជ្រើសរើស និងការប្រកាន់ជំហរនយោបាយដែលធ្វើឲ្យផលប្រយោជន៍ជាតិកម្ពុជា ត្រូវរងហានិភ័យខ្ពស់។ នេះបើតាមលោករដ្ឋមន្ត្រីការបរទេស ដែលត្រូវបានស្រង់សម្ដីដោយទូរទស្សន៍ BTV។
លោកថ្លែងដូច្នេះថា៖ «ប្រទេសជាតិរបស់យើងកំពុងប្រឈម និងរងគ្រោះដោយការឈ្លានពាន ការទន្ទ្រានទឹកដី ការបង្ខូចកេរ្តិ៍ឈ្មោះពីអ្នកជិតខាង ដែលប្រើប្រៀបយោធា និង សេដ្ឋកិច្ចមកសង្កត់លើយើង។ ពេលនេះ ជាងពេលណាៗទាំងអស់ ដែលអ្នកការទូតយើងត្រូវខិតខំប្រឹងប្រែង ទាំងកម្លាំងកាយ ទាំងកម្លាំងចិត្ត និងជាពិសេសប្រាជ្ញា ដើម្បីការពារដាច់ខាតនូវផលប្រយោជន៍គោលរបស់ជាតិ ដើម្បីប្រជាជនយើង»។
ទោះបីជាលោក ប្រាក់ សុខុន មិនបានលើកចំឈ្មោះប្រទេសថៃពាក់ព័ន្ធនឹងការទន្ទ្រានកាន់កាប់ទឹកដីកម្ពុជា និងការបង្ខូចកេរ្តិ៍ ក៏ដោយ ក៏លោកទំនងសំដៅទៅលើប្រទេសថៃ ដែលបច្ចុប្បន្ននេះ យោធាថៃកាន់កាប់ទឹកដីខ្មែរនៅទីតាំងយ៉ាងហោចណាស់ ១៤កន្លែង។
ស្របពេលជាមួយគ្នានេះ រដ្ឋមន្ត្រីការបរទេសថៃ សីហាសាក់ ភួងកេតកែវ កាលពីពេលថ្មីៗនេះ បានដើរប្រាប់អន្តរជាតិ អំពីស្ថានភាពជម្លោះព្រំដែនជាមួយកម្ពុជា ដោយថែមទាំងចោទថា កម្ពុជាបានប្រើប្រាស់ប្រាសាទព្រះវិហារដែលជាសម្បត្តិបេតិកភណ្ឌពិភពលោករបស់អង្គការយូណេស្កូ ជាមូលដ្ឋានទ័ព។ ការចោទប្រកាន់នេះ ត្រូវបានកម្ពុជាច្រានចោល។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ ថ្លែងថា ភាគីថៃ បានបង្ខូចកេរ្តិ៍ឈ្មោះកម្ពុជា លើរឿង២យ៉ាងចុងក្រោយនេះ គឺការចោទប្រកាន់ថាកម្ពុជាប្រើប្រាស់ប្រាសាទព្រះវិហារជាមូលដ្ឋានយោធា និង ការអះអាងទាញហេតុផលរបស់ខ្លួនក្នុងការប្រើលេសបង្ក្រាបការឆបោកតាមអនឡាញដើម្បីឈ្លានពានកម្ពុជា។
លោកថា៖ ការចោទប្រកាន់ថា កម្ពុជាប្រើប្រាសាទព្រះវិហារជាមូលដ្ឋានយោធា អត់ឃើញមានអន្តរជាតិណាប្រតិកម្មឬជឿថៃទេ ព្រោះអ្នកការទូត និងក្រុមសង្កេតការណ៍អាស៊ានបានចុះទៅប្រាសាទព្រះវិហារច្រើនដង។ វាខុសពីភាគីថៃ ដែលលាក់ព័ត៌មាន បិទបាំង និងដើរភូតកុហក់អន្តរជាតិ និងប្រឌិតសាច់រឿង»។
លោកបន្តថា៖ «ដូច្នេះ ខ្ញុំយល់ថា អ្វីដែលភាគីថៃបានលើកឡើងនៅវេទិកាអន្តរជាតិនានាកន្លងមក ក្នុងចេតនាភូតកុហកមតិអន្តរជាតិ ក៏ដូចជា ការក្រឡៃសភាពការណ៍បែបណានោះ កម្ពុជាមិនសូវចាប់អារម្មណ៍នោះទេ។ ចំណែកកម្ពុជា គេទទួលស្គាល់ថាជាប្រទេសដែលរងគ្រោះពីការឈ្លានពានរបស់ប្រទេសថៃ»៕
