ក្រសួងពីរប្រកាសដាក់ឲ្យប្រើប្រាស់ប្រព័ន្ធបង្ហាញទីតាំងពេទ្យឯកជនដែលមានបញ្ជាក់ប្រភេទសេវា និងសុពលភាព និងប្រព័ន្ធតាមដាន ថាតើបុគ្គលម្នាក់ធ្លាប់បានទទួលវ៉ាក់សាំងប្រភេទអ្វីខ្លះ ខណៈដែលរដ្ឋាភិបាលកំពុងជំរុញការធ្វើបរិវត្តកម្មឌីជីថលក្នុងវិស័យសុខាភិបាលឱ្យបានកាន់តែលឿន។
ប្រព័ន្ធដែលត្រូវបានដាក់ឲ្យប្រើប្រាស់ផ្លូវការនៅថ្ងៃទី១២ ខែមីនា គឺប្រព័ន្ធគ្រប់គ្រងព័ត៌មានមូលដ្ឋានសុខាភិបាល (HFMIS) និងប្រព័ន្ធអេឡិចត្រូនិកចុះបញ្ជីផ្តល់ថ្នាំបង្ការ (EIR) ដែលដាក់ឲ្យដំណើរការក្រោមអធិបតីភាពរបស់លោក ជា វ៉ាន់ដេត រដ្ឋមន្ត្រី ក្រសួងប្រៃសណីយ៍និងទូរគមនាគមន៍ និងលោក ឈាង រ៉ា រដ្ឋមន្ត្រីក្រសួងសុខាភិបាល និងមានអ្នកចូលរួមជាង ៣៣០០នាក់ ទាំងផ្ទាល់និងតាម Zoom។
ប្រព័ន្ធគ្រប់គ្រងព័ត៌មានមូលដ្ឋានសុខាភិបាល (HFMIS) ត្រូវបានអភិវឌ្ឍឡើងក្នុងគោលបំណង ដូចជា មើលទីតាំងនៃមូលដ្ឋានសុខាភិបាលឯកជនទូទាំងប្រទេសកម្ពុជា, ស្វែងយល់ពីទំហំ និងប្រភេទនៃមូលដ្ឋានសុខាភិបាលឯកជននីមួយៗ ដូចជាចំនួននិងប្រភេទបុគ្គលិក និងប្រភេទសេវា, និង តាមដានស្ថានភាព និងភាពស្របច្បាប់របស់មូលដ្ឋានសុខាភិបាលឯកជន។ នេះបើតាមសេចក្ដីប្រកាសព័ត៌មានរួម។
ប្រព័ន្ធ HFMIS នេះ ក៏អាចមានព័ត៌មានបច្ចុប្បន្នភាពទិន្នន័យមូលដ្ឋានសុខាភិបាលទាំងអស់, បញ្ជាក់ពីសុពលភាពនៃអាជ្ញាបណ្ណពេទ្យឯកជន, ប្រភេទមូលដ្ឋានសុខាភិបាល និងបញ្ជីឈ្មោះមូលដ្ឋានសុខាភិបាល ដែលមានភ្ជាប់នៅលើ Google Map។
ចំណែកប្រព័ន្ធ EIR មានមុខងារសំខាន់ៗ ដូចជា បង្កើតគណនីនៃការចាក់ថ្នាំបង្ការជូនប្រជាពលរដ្ឋ និងអាចស្វែងរកព័ត៌មាននៃការចាក់ថ្នាំបង្ការបានយ៉ាងងាយស្រួលនិងឆាប់រហ័ស, កត់ត្រាប្រវត្តិនៃការទទួលថ្នាំបង្ការរបស់ទារក កុមារ និងប្រជាពលរដ្ឋទូទៅ និងកាលវិភាគដែលនឹងត្រូវទទួលថ្នាំបង្ការបន្ទាប់, និង តាមដាននិងផ្ទៀងផ្ទាត់ប្រវត្តិនៃការទទួលថ្នាំបង្ការគ្រប់ប្រភេទដោយស្វ័យប្រវត្តិ ដើម្បីជំនួសឱ្យការកត់ត្រាក្នុងទម្រង់ជាក្រដាស។
បន្ថែមពីលើនេះ ប្រព័ន្ធនឹងជួយឲ្យអ្នកផ្ដល់សេវានិងអ្នកប្រើប្រាស់អាចចូលទៅពិនិត្យមើល និងទាញយករបាយការណ៍ប្រចាំខែអំពីទិន្នន័យអ្នកទទួលថ្នាំបង្ការ ដើម្បីជាមូលដ្ឋានក្នុងការតាមដាន ត្រួតពិនិត្យ និងវាយតម្លៃ។
EIR កត់ត្រាប្រវត្តិនៃការចាក់ថ្នាំបង្ការដោយដៃនិងប្រើក្រដាស ទៅជាការកត់ត្រាតាមប្រព័ន្ធឌីជីថលដោយស្វ័យប្រវត្តិ ដែលរួមបញ្ចូល កាលវិភាគផ្តល់ថ្នាំបង្ការសម្រាប់ទារកអាយុក្រោម ២ឆ្នាំ (Routine Vaccination), ការផ្តល់ថ្នាំបង្ការជំងឺមហារីកមាត់ស្បូន (HPV Vaccines) សម្រាប់កុមារីអាយុ ៩ឆ្នាំ, ការផ្តល់វ៉ាក់សាំងតេតាណូស និងខាន់ស្លាក់សម្រាប់ស្ត្រីក្នុងវ័យបន្តពូជអាយុចាប់ពី១៥ឆ្នាំ ដល់ ៤៤ឆ្នាំ និង វ៉ាក់សាំងសម្រាប់ប្រជាពលរដ្ឋទូទៅ ដូចជាវ៉ាក់សាំងកូវីដ-១៩ ជាដើម។
ប្រព័ន្ធ EIR មានដើមកំណើតចេញពីប្រព័ន្ធចាក់វ៉ាក់សាំង (vaccine.gov.kh) ដែលត្រូវបានបង្កើតឡើងកាលពីសម័យកូវីដ១៩។ ដោយសារតែប្រសិទ្ធភាពនៃប្រព័ន្ធអេឡិចត្រូនិកសម្រាប់ចុះបញ្ជីផ្តល់ថ្នាំបង្ការកូវីដ១៩ ទើបប្រព័ន្ធនេះត្រូវបានអភិវឌ្ឍបន្ថែមសម្រាប់ដាក់ឲ្យប្រើប្រាស់លើការតាមដានការផ្ដល់និងប្រើប្រាស់វ៉ាក់សាំងយ៉ាងទូលំទូលាយ។
គិតត្រឹមខែកុម្ភៈ ឆ្នាំ២០២៦នេះ ប្រព័ន្ធ EIR ត្រូវបានប្រើប្រាស់រួចហើយនៅមូលដ្ឋានសុខាភិបាលចំនួន ១,៤៤៣ ទីតាំង បុគ្គលិកប្រើប្រាស់ចំនួន ២,៦៥៤ នាក់ ទិន្នន័យប្រជាពលរដ្ឋបានចុះក្នុងប្រព័ន្ធចំនួន ១៧៤,៦៨៨ នាក់ និងកំណត់ត្រាវ៉ាក់សាំងចំនួន ១,១០០,១៤៩។
ក្រសួងទាំងពីរបញ្ជាក់ថា៖ «ក្រោយពីដាក់ឱ្យដំណើរការសាកល្បងអស់រយៈពេលជាងមួយឆ្នាំកន្លងមក ប្រព័ន្ធ EIR ទទួលបានការសាទរជាច្រើន ដែលឈានដល់ការប្រកាសដាក់ឱ្យប្រើប្រាស់ជាផ្លូវការនៅតាមមន្ទីរពេទ្យជាតិ មន្ទីរពេទ្យខេត្ត មន្ទីរពេទ្យបង្អែកស្រុក មណ្ឌលសុខភាព និងប៉ុស្ដិ៍សុខភាព នៅទូទាំងប្រទេស។
ក្រសួងបន្តថា៖ «១ជាមួយគ្នានេះ ប្រជាពលរដ្ឋទូទៅក៏អាចពិនិត្យមើលប្រវត្តិនៃការទទួលថ្នាំបង្ការនៅតាមមន្ទីរពេទ្យ មណ្ឌលសុខភាព ឬប៉ុស្ដិ៍សុខភាពរបស់រដ្ឋ តាមរយៈកម្មវិធី MyHealth ដែលជាកូនកម្មវិធី (Mini-App) នៅក្នុងកម្មវិធី DGSuperApp ផងដែរ»៕
