សហគ្រាសរដ្ឋឈានមុខគេមកពីប្រទេសចិនក្នុងវិស័យកែច្នៃដំឡូងមី Guangxi State Farms Mingyang Starch Development Co., Ltd. បានបង្ហាញពីឆន្ទះក្នុងការបង្កើនការបញ្ជាទិញដំឡូងមីពីកម្ពុជាក្នុងបរិមាណ ១ លានតោន ហើយក្រុមហ៊ុនក៏ចាប់អារម្មណ៍ការសិក្សាពីកាលានុវត្តភាពក្នុងការបង្កើតរោងចក្រកែច្នៃតម្លៃបន្ថែមដោយផ្ទាល់នៅកម្ពុជា។
ព័ត៌មាននេះត្រូវបានលោក Chen Mingyu ប្រធានក្រុមហ៊ុន Guangxi State Farms Mingyang Starch Development Co., Ltd. លើកឡើងក្នុងឱកាសជួបពិភាក្សាការងារជាមួយ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) នៅទីស្តីការក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី២៦ ខែមីនា ឆ្នាំ២០២៦។
ជាកិច្ចចាប់ផ្តើម លោក Chen Mingyu បានថ្លែងអំណរគុណចំពោះការទទួលស្វាគមន៍ពីសំណាក់ថ្នាក់ដឹកនាំរបស់ CDC ព្រមទាំងបានលើកឡើងពីស្ថិរភាពនយោបាយ និងកំណើនសេដ្ឋកិច្ចដ៏ល្អប្រសើររបស់ប្រទេសកម្ពុជា។ លោកបន្តថា កត្តាទាំងអស់នេះបានធ្វើឱ្យរូបលោក និងសហការីមានការចាប់អារម្មណ៍ខ្លាំងចំពោះការធ្វើអាជីវកម្ម និងការវិនិយោគផ្ទាល់នៅក្នុងប្រទេសកម្ពុជា។
លោកប្រាប់ទៀតថា៖«ដំណើរទស្សនកិច្ចរបស់ថ្នាក់ដឹកនាំក្រុមហ៊ុនមកប្រទេសកម្ពុជានាពេលនេះ គឺមានគោលបំណងយុទ្ធសាស្ត្រសំខាន់ៗចំនួន ៣ រួមមាន ១.បង្កើនការបញ្ជាទិញដំឡូងមីពីកម្ពុជាប្រមាណ ១លានតោន ដើម្បីនាំចេញទៅផ្គត់ផ្គង់ខ្សែច្រវាក់ផលិតកម្មតាមរយៈការសម្របសម្រួលរបស់ក្រសួងពាណិជ្ជកម្ម, ២.ការសិក្សាពីកាលានុវត្តភាពក្នុងការបង្កើតរោងចក្រកែច្នៃតម្លៃបន្ថែមដោយផ្ទាល់នៅកម្ពុជា, និង ៣. ការផ្ទេរចំណេះដឹងតាមរយៈការពិនិត្យលទ្ធភាពសហការជាមួយរាជបណ្ឌិត្យសភាកម្ពុជា ដើម្បីចែករំលែកបច្ចេកទេសដាំដុះ និងការកែច្នៃកម្រិតខ្ពស់ជូនដល់ប្រជាកសិករខ្មែរ។ជាការឆ្លើយតប លោក ចាន់ថុល បានសម្តែងការគាំទ្រ និងជំរុញយ៉ាងមោះមុតលើការបង្កើតរោងចក្រកែច្នៃក្នុងស្រុក ដែលជាឆ្អឹងខ្នងនៃយុទ្ធសាស្ត្រផ្ដល់តម្លៃបន្ថែមដល់កសិផលខ្មែរ និងការបង្កើតឱកាសការងារជូនប្រជាពលរដ្ឋ។ លោកបន្តថា កម្ពុជាគឺជាតួអង្គយុទ្ធសាស្ត្រដែលស្ថិតនៅចំកណ្តាលនៃមហាអនុតំបន់ទន្លេមេគង្គ និងតំបន់សេដ្ឋកិច្ចអាស៊ាន-ចិន ដែលផ្តល់នូវភាពអនុគ្រោះបំផុតសម្រាប់វិនិយោគិន។
ជាមួយគ្នានោះ លោកឧបនាយករដ្ឋមន្ត្រី ក៏បានផ្តល់អនុសាសន៍គន្លឹះលើការជ្រើសរើសទីតាំងរោងចក្រ និងបានជម្រាបជូនអំពី «ផែនការមេភស្តុភារកម្មប្រទាក់ក្រឡា»របស់កម្ពុជា ដែលនឹងជួយសម្រួលដល់ការដឹកជញ្ជូនឱ្យកាន់តែរហ័ស និងកាត់បន្ថយថ្លៃដើមផលិតកម្ម ធ្វើឱ្យផលិតផលកម្ពុជាមានសមត្ថភាពប្រកួតប្រជែងខ្ពស់នៅលើទីផ្សារសកល។
លោក ស៊ុន ចាន់ថុល បានអះអាងថា៖«ក្រុមប្រឹក្សាអភិវឌ្ឍន៍កម្ពុជាបានត្រៀមលក្ខណៈជាស្រេចរបស់ក្នុងនាមជាសេនាធិការដ៏រឹងមាំរបស់រាជរដ្ឋាភិបាលក្នុងការផ្តល់នូវកិច្ចសម្របសម្រួល និងគាំទ្រគ្រប់បែបយ៉ាងដល់ក្រុមហ៊ុន ដើម្បីធានាឱ្យបាននូវជោគជ័យនៃគម្រោងវិនិយោគនេះ។ វានឹងក្លាយជាសមិទ្ធផលថ្មីមួយទៀតក្រោមស្មារតីនៃកិច្ចសហប្រតិបត្តិការអន្តររដ្ឋាភិបាលកម្ពុជា-ចិន»។
តាមរយៈជំនួបនេះដែរ លោកឧបនាយករដ្ឋមន្ត្រីក៏បានរលឹកអំពីវឌ្ឍនភាពនៃ«កិច្ចសហប្រតិបត្តិការត្បូងពេជ្រ» រវាងប្រទេសទាំងពីរ ជាពិសេសយន្តការនៃ«គណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន» ដែលមាន លោក Wang Yi សមាជិកការិយាល័យនយោបាយ និងជាប្រធានការិយាល័យគណៈកម្មការកិច្ចការបរទេសនៃមជ្ឈិមបក្សកុម្មុយនីស្តចិន និងរូបលោកផ្ទាល់ជាសហប្រធាន។ យន្តការកម្រិតខ្ពស់នេះ គឺជាក្បាលម៉ាស៊ីនដ៏មានឥទ្ធិពលក្នុងការតម្រង់ទិស និងជំរុញរាល់គម្រោងវិនិយោគយុទ្ធសាស្ត្រឱ្យលេចចេញជាផ្លែផ្កាជាក់ស្តែង ដើម្បីឧត្តមប្រយោជន៍នៃប្រជាជាតិទាំងពីរ។
ុGuangxi State Farms Mingyang Starch Development គឺជាសហគ្រាសរដ្ឋឈានមុខ និងមានទ្រង់ទ្រាយធំមួយរបស់ចិន ក្នុងវិស័យកែច្នៃដំឡូងមី ដែលមានគុណភាពស្តង់ដារទទួលស្គាល់ដោយសហរដ្ឋអាមេរិក។
របាយការណ៍របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ឱ្យដឹងថា រយៈពេល ៩ខែ ឆ្នាំ២០២៥ កម្ពុជាបាននាំចេញដំឡូងមីសរុបជាង ៣,៤ លានតោន ដែលក្នុងនោះដំឡូងមីស្រស់មានចំនួន ២,០៥ លានតោន ធ្លាក់ចុះ ១៦,៥៧% ខណៈចំណិតដំឡូងមីក្រៀមបានចំនួន ១,៣៥ លានតោន កើនឡើង ៥៧,៦២%។
អគ្គនាយក នៃអគ្គនាយកដ្ឋានកសិកម្ម លោក ងិន ឆាយ ធ្លាប់បាននិយាយថា ការនាំចេញផលិតផលដំឡូងមីស្រស់ថយចុះ ដោយសារប្រជាកសិករបំប្លែងពីដំឡូងមីស្រស់ទៅក្រៀម និងកែច្នៃជាម្សៅ ដើម្បីអាចរក្សាទុកបានយូរ និងមានតម្លៃខ្ពស់៕
